ଦେବଦୂତ ସାଜି ଆସିଲେ କ୍ରିକେଟର ଶାମୀ: ଦୁର୍ଘଟଣାର ଶିକାର ବ୍ୟକ୍ତିଙ୍କୁ ଦେଲେ ନୂଆ ଜୀବନ
ନୂଆଦିଲ୍ଲୀ: ଦିନିକିଆ ବିଶ୍ୱକପରେ ଟିମ ଇଣ୍ଡିଆ ପାଇଁ ଅନେକ ମ୍ୟାଚରେ ସଙ୍କଟମୋଚକ ସାଜିଛନ୍ତି ଷ୍ଟାର ବୋଲର ମହମ୍ମଦ ଶାମୀ । ବିଶ୍ୱକପରେ ଦମଦାର ପ୍ରଦର୍ଶନ ପରେ ତାଙ୍କୁ ନେଇ ଲଗାତାର ଚର୍ଚ୍ଚା ଲାଗି ରହିଛି । ତେବେ ଖେଳ ବ୍ୟତୀତ ବର୍ତ୍ତମାନ ତାଙ୍କର ଆଉ ଏକ କାମକୁ ନେଇ ଏବେ ସବୁଆଡ଼େ ତାଙ୍କର ପ୍ରଶଂସା କରାଯାଉଛି । ରାସ୍ତାରେ ଦୁର୍ଘଟଣାର ଶିକାର ହୋଇ ପଡ଼ିଥିବା ଜଣେ ବ୍ୟକ୍ତିଙ୍କୁ ସାହାଯ୍ୟ କରି ନୂଆ ଏକ ଜୀବନ ଦେଇଛନ୍ତି ମହମ୍ମଦ ଶାମୀ । ନେନିତାଲକୁ ଯିବା ବାଟରେ ଏହି ଦୁର୍ଘଟଣା ହୋଇଥିବା ବେଳେ ଶାମୀ ସେହି ବ୍ୟକ୍ତିଙ୍କ ପାଇଁ ଦେବଦୂତ ସାଜି ତାଙ୍କ ଜୀବନ ବଞ୍ଚାଇଛନ୍ତି ।
ସୂଚନା ଅନୁସାରେ, ଶାମୀ ନିଜ ଗାଡ଼ିରେ ଉତ୍ତରାଖଣ୍ଡର ନେନିତାଲକୁ ଯାଉଥିଲେ । ତେବେ ଏହି ସମୟରେ ତାଙ୍କ ଆଗରେ ଯାଉଥିବା ଆଉ ଏକ ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି । ଏହି ଦୁର୍ଘଟଣାରେ ଗୋଟିଏ କାର୍ ରାସ୍ତା ତଳକୁ ଖସି ପଡ଼ିଛି । ତେବେ ଦୁର୍ଘଟଣା ଦେଖିବା ପରେ ଶାମୀ ଗାଡ଼ିରୁ ଓହ୍ଲାଇ ଦୁର୍ଘଟଣାର ଶିକାର ହୋଇଥିବା ବ୍ୟକ୍ତିଙ୍କୁ ଉଦ୍ଧାର କରିବାକୁ ସେଠାରେ ପହଞ୍ଚିଛନ୍ତି । ରାସ୍ତା କଡ଼ରେ ଖସି ପଡ଼ିଥିବା ଗାଡ଼ିରେ ଥିବା ବ୍ୟକ୍ତିଙ୍କୁ ଉଦ୍ଧାର କରି ଗାଡ଼ିରୁ ବାହାର କରିବା ସହ ଆହତଙ୍କୁ ପ୍ରାଥମିକ ଚିକିତ୍ସା ଯୋଗାଇ ଦେଇଛନ୍ତି ମହମ୍ମଦ ଶାମୀ । ଏହି ଘଟଣାର ଏକ ଭିଡିଓ ଶାମୀ ନିଜ ସୋସିଆଲ ମିଡିଆରେ ଅପଲୋଡ କରିଛନ୍ତି । ଭିଡିଓରେ ଶାମୀ ଆହତଙ୍କ ହାତରେ ପଟି ବାନ୍ଧୁଥିବାର ମଧ୍ୟ ଦେଖାଯାଇଛି ।
View this post on Instagram
ସୂଚନା ଅନୁସାରେ, ଶାମୀ ଏହାର ଏକ ଭିଡିଓ ଇନଷ୍ଟାଗ୍ରାମରେ ସେୟାର କରି ଲେଖିଛନ୍ତି ଯେ, ମୁଁ ଜଣେ ବ୍ୟକ୍ତିଙ୍କ ଜୀବନ ରକ୍ଷା କରି ଖୁସି ଅନୁଭବ କରୁଛି । ୩୧ ସେକେଣ୍ଡର ଏହି ଭିଡିଓ ସୋସିଆଲ ମିଡିଆରେ ଅପଲୋଡ ବର୍ତ୍ତମାନ ଏହା ଭାଇରାଲ ହେବାରେ ଲାଗିଛି । ବିଶ୍ୱକପ ପ୍ରଦର୍ଶନ ପରେ ଶାମୀଙ୍କର ଏପରି କାର୍ଯ୍ୟକୁ ବର୍ତ୍ତମାନ ସବୁଆଡ଼େ ପ୍ରଶଂସା କରାଯାଉଛି ।
