ପତ୍ନୀଙ୍କ ନାମରେ କିଣାଯାଇଥିବା ସମ୍ପତ୍ତି ଉପରେ ପରିବାରର ରହିଛି ଅଧିକାର:ସମ୍ପତ୍ତି-ଜମି ରେଜିଷ୍ଟ୍ରି କରିବା ପୂର୍ବରୁ ଜାଣନ୍ତୁ ହାଇକୋର୍ଟଙ୍କ ନିଷ୍ପତ୍ତି
ନୂଆଦିଲ୍ଲୀ: ପାରିବାରିକ ସମ୍ପତ୍ତି ବିବାଦରେ ଆହ୍ଲାବାଦ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି ଏବଂ କହିଛନ୍ତି ଯେ ଯଦି ଜଣେ ବ୍ୟକ୍ତି ତାଙ୍କ ପତ୍ନୀଙ୍କ ନାମରେ କୌଣସି ସମ୍ପତ୍ତି କିଣି ଏହାକୁ ପଞ୍ଜୀକୃତ କରିଥିବେ, ତା’ହେଲେ ତାଙ୍କ ପରିବାର ସଦସ୍ୟ ମଧ୍ୟ ଏଥିରେ ଭାଗ ନେବେ ।
ହାଇକୋର୍ଟ ତାଙ୍କ ନିଷ୍ପତ୍ତିରେ ସ୍ପଷ୍ଟ କରିଛନ୍ତି ଯେ, ପରିବାର ସଦସ୍ୟଙ୍କ ସମ୍ପତ୍ତି ଉପରେ ସେମାନଙ୍କର ଅଧିକାର ରହିବ ବୋଲି ବିବେଚନା କରାଯିବ ନାହିଁ ଯେତେବେଳେ ଏହା ପ୍ରମାଣିତ ହେବ ଯେ ମହିଳା ଜଣକ ନିଜର ରୋଜଗାରରେ ସମ୍ପତ୍ତି କିଣିଛନ୍ତି । କିନ୍ତୁ ଯଦି ମହିଳା ଜଣକ ଜଣେ ଗୃହିଣୀ ଏବଂ ଅନ୍ୟ ତାଙ୍କ ନାମରେ ସମ୍ପତ୍ତି କିଣାଯାଇଛି, ତେବେ ପରିବାରର ଅବଶିଷ୍ଟ ସଦସ୍ୟମାନେ ମଧ୍ୟ ଏହାର ଅଧିକାର ପାଇବେ ।
ଜଣେ ମୃତ ପିତାଙ୍କ ସମ୍ପତ୍ତିରେ ଅଧିକାର ମାଗୁଥିବା ପୁଅର ଏକ ଆବେଦନ ଶୁଣାଣି କରି ଜଷ୍ଟିସ ଅରୁଣ କୁମାର ସିଂ ଦେଶୱାଲ କହିଛନ୍ତି ଯେ, ଆବେଦନକାରୀଙ୍କ ପିତା କିଣିଥିବା ସମ୍ପତ୍ତି ପାରିବାରିକ ସମ୍ପତ୍ତି ଭାବରେ ବିବେଚନା କରାଯିବ କାରଣ ସାଧାରଣତଃ ଜଣେ ହିନ୍ଦୁ ସ୍ୱାମୀ ପରିବାରର ହିତ ପାଇଁ ଏହି ସମ୍ପତ୍ତି ତାଙ୍କ ପତ୍ନୀଙ୍କ ନାମରେ କିଣନ୍ତି ।
କୋର୍ଟ କହିଛନ୍ତି, ‘ଯଦି ଏହା ପ୍ରମାଣିତ ନହୁଏ କି ପତ୍ନୀଙ୍କ ଦ୍ୱାରା ରୋଜଗାରର ପରିମାଣରୁ ଏହି ସମ୍ପତ୍ତି କ୍ରୟ କରାଯାଇଥିଲା, ତେବେ ଏହା ସ୍ୱାମୀ ଦ୍ୱାରା ନିଜ ଆୟରୁ କିଣାଯାଇଥିବା ସମ୍ପତ୍ତି ବୋଲି ବିବେଚନା କରାଯିବ ଏବଂ ପରିବାରର ମଧ୍ୟ ଏହା ଉପରେ ଅଧିକାର ରହିବ ।’
ରିପୋର୍ଟ ଅନୁଯାୟୀ, ଆବେଦନକାରୀ ସୌରଭ ଗୁପ୍ତା ତାଙ୍କ ପିତାଙ୍କ ଦ୍ୱାରା କିଣାଯାଇଥିବା ସମ୍ପତ୍ତିରେ ଏକ ଚତୁର୍ଥାଂଶ ଅଂଶ ପାଇବାକୁ ଏକ ସିଭିଲ୍ ମକଦ୍ଦମା ଦାୟର କରିଥିଲେ ଏବଂ ତାଙ୍କୁ ଏହି ସମ୍ପତ୍ତିରେ ସହ-ଅଂଶୀଦାର ଘୋଷଣା କରିବାକୁ କୋର୍ଟ କହିଥିଲେ । ସେ ଯୁକ୍ତି କରିଛନ୍ତି ଯେ, ଯେହେତୁ ଏହି ସମ୍ପତ୍ତି ତାଙ୍କ ମୃତ ପିତାଙ୍କ ଦ୍ୱାରା କିଣାଯାଇଥିଲା, ତେଣୁ ସେ ତାଙ୍କ ମାଙ୍କ ସହ ଏହି ସମ୍ପତ୍ତିରେ ସହଭାଗିଦାରୀ । ଏହି ମାମଲାରେ ସୌରଭ ଗୁପ୍ତାଙ୍କ ମା ପ୍ରତିବାଦୀ ଥିଲେ ।
