କେଜ୍ରିୱାଲଙ୍କ ଉପରେ କୋର୍ଟ ଲଗାଇଲେ ୭୫ ହଜାର ଟଙ୍କା ଜୋରିମାନା, ଅନ୍ତରୀଣ ଜାମିନ ଲାଗି କରାଯାଇଥିଲା ଦାବୀ
ନୂଆଦିଲ୍ଲୀ:ଦିଲ୍ଲୀ ହାଇକୋର୍ଟ ସେହି ଜନହିତ ଯାଚିକାକୁ ଖାରଜ କରି ଦେଇଛନ୍ତି ଯେଉଁଥିରେ ଅରବିନ୍ଦ କେଜ୍ରିୱାଲଙ୍କ ଲାଗି ସମସ୍ତ ଅପରାଧିକ ମାମଲାରେ ଅନ୍ତରୀଣ ଜାମିନ ଦାବୀ କରାଯାଇଥିଲା । କୋର୍ଟ କେବଳ ଏହି ଜନହିତ ଯାଚିକାକୁ ଖାରଜ କରି ଦେଇନାହାନ୍ତି ବରଂ ଆବେଦନକର୍ତ୍ତାଙ୍କ ଉପରେ ୭୫ ହଜାର ଟଙ୍କା ଜୋରିମାନା ଲଗାଇ ଦେଇଛନ୍ତି ।
ଦିଲ୍ଲୀ ହାଇକୋର୍ଟରେ ଜନହିତ ଯାଚିକା ଦାଖଲ କରି ଦାବୀ କରାଯାଇଥିଲା କି ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ସମସ୍ତ ଅପରାଧିକ ମାମଲାରୁ ଅନ୍ତରୀଣ ଜାମିନ ପ୍ରଦାନ କରାଯାଉ । ଏହି ଯାଚିକାରେ କୁହାଯାଇଥିଲା କି କେଜ୍ରିୱାଲ ଯେ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ରହିଛନ୍ତି ଓ ତାଙ୍କ ଟ୍ରାଏଲ ଶେଷ ହୋଇନାହିଁ ସେ ପର୍ଯ୍ୟନ୍ତ ସମସ୍ତ ମାମଲାରେ ତାଙ୍କୁ ଅନ୍ତରୀଣ ଜାମିନ ଦିଆଯାଉ । ଯାଚିକାକର୍ତ୍ତା ଦାବୀ କରିଥିଲେ କି ସେ ଭାରତର ନାଗରିକଙ୍କ ପ୍ରତିନିଧିତ୍ୱ କରୁଛନ୍ତି ଓ ଦିଲ୍ଲୀବାସୀଙ୍କ କଲ୍ୟାଣକୁ ନେଇ ଚିନ୍ତିତ ଅଛନ୍ତି ।
ଦିଲ୍ଲୀ ହାଇକୋର୍ଟ ମୁଖ୍ୟ ବିଚାରପତି ମନମୋହନ ଓ ବିଚାରପତି ମନମୀତ ପ୍ରୀତମ୍ ସିଂହ ଆରୋରାଙ୍କ ବେଞ୍ଚ ଯାଚିକାକୁ ଖାରଜ କରି କହିଛନ୍ତି, ‘କୋର୍ଟ ଉଚ୍ଚ ପଦବୀରେ ରହିଥିବା ବ୍ୟକ୍ତି ବିରୁଦ୍ଧରେ ଚାଲିଥିବା ଅପରାଧିକ ମାମଲାରେ ଅସାଧାରଣ ଅନ୍ତରୀଣ ଜାମିନ ଦେଇପାରିବେ ନାହିଁ । କୋର୍ଟ ଆଦେଶରେ ଏହିପରି ବହୁଜଣ ନ୍ୟାୟିକ ହେପାଜତରେ ଅଛନ୍ତି । ସୁପ୍ରିମକୋର୍ଟ ପର୍ଯ୍ୟନ୍ତ ବି ମାମଲା ଯାଇଛି । ସୁପ୍ରିମକୋର୍ଟ ପଦକ୍ଷେପ ନେଉଛନ୍ତି ଓ ଉପାୟର ଉପଯୋଗ କରୁଛନ୍ତି । ଆଇନ ସମସ୍ତଙ୍କ ଲାଗି ସମାନ ।’
