ଧାର ପାଇଁ ଆଉ ଦୋକାନୀଙ୍କୁ କରିବେନି ଖୋସାମତ ! ୟୁପିଆଇ ଉଠାଇବ ଖର୍ଚ୍ଚ, ଶୀଘ୍ର ମିଳିବ ଫାଇଦା
ନୂଆଦିଲ୍ଲୀ :ଏପରି ଅନେକଥର ହୁଏ, ଯେତେବେଳେ ଆମର ତୁରନ୍ତ ଖର୍ଚ୍ଚ ପାଇଁ ଟଙ୍କା ନଥାଏ ଏବଂ ଜଣାଶୁଣା ଦୋକାନୀଙ୍କଠାରୁ ସାମଗ୍ରୀ ଧାର କରି ନେବାକୁ ପଡେ । କିନ୍ତୁ ସାଧାରଣ ଲୋକଙ୍କର ଏହି ସମସ୍ୟା ଶୀଘ୍ର ଶେଷ ହେବାକୁ ଯାଉଛି ।
ନ୍ୟାସନାଲ ପେମେଣ୍ଟ କର୍ପୋରେସନ୍ ଅଫ୍ ଇଣ୍ଡିଆ (ଏନପିସିଆଇ) ଖୁବ୍ ଶୀଘ୍ର ୟୁପିଆଇ ବ୍ୟବହାର କରୁଥିବା ଗ୍ରାହକଙ୍କ ପାଇଁ ଏକ ବଡ଼ ସୁବିଧା ଆରମ୍ଭ କରିବାକୁ ଯାଉଛି । ନୂତନ ସୁବିଧା ଆରମ୍ଭ ହେବା ପରେ ଆପଣଙ୍କର ୟୁପିଆଇ ଆକାଉଣ୍ଟ ଏକ କ୍ରେଡିଟ୍ କାର୍ଡ ପରି କାମ କରିବ, ଯେଉଁଠାରେ ଗ୍ରାହକ ଆକାଉଣ୍ଟରେ ଟଙ୍କା ନଥିଲେ ମଧ୍ୟ ଆରାମରେ ୟୁପିଆଇ ପେମେଣ୍ଟ କରିପାରିବେ ।
ଏନପିସିଆଇ କହିଛି ଯେ ବର୍ତ୍ତମାନ ବ୍ୟବହାରକାରୀଙ୍କ ୟୁପିଆଇ ଆକାଉଣ୍ଟ୍ କ୍ରେଡିଟ୍ କାର୍ଡ ଭାବରେ କାମ କରିବ ଏବଂ ପ୍ରତ୍ୟେକ ଗ୍ରାହକ ତାଙ୍କ ସିବିଲ୍ ସ୍କୋର ଅନୁଯାୟୀ ଏକ କ୍ରେଡିଟ୍ ଲାଇନ୍ ପାଇବେ । ଏହି କ୍ରେଡିଟ୍ କେବଳ ବଣିକ ସହିତ ବ୍ୟବହାର କରାଯାଇପାରିବ । ଏହାର ପ୍ରତିବଦଳରେ ବ୍ୟାଙ୍କଗୁଡ଼ିକ ମଧ୍ୟ ସ୍ଥିର ସୁଧ ଆଦାୟ କରିବେ । ବର୍ତ୍ତମାନ ଏନପିସିଆଇ ଅନେକ ବେସରକାରୀ ଏବଂ ସରକାରୀ ବ୍ୟାଙ୍କ ସହ କଥା ହୋଇଛି ଯେଉଁମାନେ ଏଥିପାଇଁ ସହମତ ହୋଇଛନ୍ତିି । ଏହି ସୁବିଧା ପାଇଁ ଏନପିସିଆଇକୁ ଏପର୍ଯ୍ୟନ୍ତ ଆଇସିଆଇସିଆଇ ବ୍ୟାଙ୍କ, ଏଚଡିଏଫସି ବ୍ୟାଙ୍କ, ପିଏନବି, ଇଣ୍ଡିଆନ ବ୍ୟାଙ୍କ ଏବଂ ଆକ୍ସିସ ବ୍ୟାଙ୍କର ସମର୍ଥନ ମିଳିଛି ।
ଦୋକାନୀମାନଙ୍କ ସମସ୍ୟା ହେବ ଶେଷ :-
ଏହା ନୁହେଁ ଯେ ଏହି ସୁବିଧା ଦ୍ୱାରା କେବଳ ଗ୍ରାହକ ଉପକୃତ ହେବେ, ଦୋକାନୀମାନେ ମଧ୍ୟ ଏଥିରୁ ଉପକୃତ ହେବେ । ବର୍ତ୍ତମାନ, କ୍ରେଡିଟ କାର୍ଡ ମାଧ୍ୟମରେ ୨ ହଜାରରୁ ଅଧିକ ଟଙ୍କା ଦେବା ପାଇଁ ଦୋକାନୀମାନଙ୍କୁ ପ୍ରାୟ ୨ ପ୍ରତିଶତ ଚାର୍ଜ ଦେବାକୁ ପଡିବ । ୟୁପିଆଇରେ କ୍ରେଡିଟ୍ ଲାଇନ୍ ପାଇବା ପରେ ଏହିପରି ଫିସ୍ ଦେବାକୁ ପଡିବ ନାହିଁ । ଏହା ଏକ ଭିନ୍ନ ବିଷୟ ଯେ ଆପଣଙ୍କୁ କାର୍ଡରେ କୌଣସି ସୁଧ ଦେବାକୁ ପଡିବ ନାହିଁ, ଯେତେବେଳେ କି ଆପଣଙ୍କୁ ୟୁପିଆଇର କ୍ରେଡିଟ୍ ଲାଇନ୍ ଉପରେ ସୁଧ ଦେବାକୁ ପଡିବ ।