କର୍କଟ ରୋଗରେ ବିଶ୍ୱର ୮୭% ପୁରୁଷଙ୍କ ହେବ ମୃତ୍ୟୁ; ଆସିଲା ଆଶ୍ଚର୍ଯ୍ୟ କରିଦେଲା ଭଳି ରିପୋର୍ଟ

ନୂଆଦିଲ୍ଲୀ: ମହାମାରୀ ଭଳି କାୟା ମଲାଇଲାଣି କର୍କଟ ରୋଗ । ଦେଖିବାକୁଗଲେ ସମଗ୍ର ବିଶ୍ୱରେ ମୃତ୍ୟୁର ଏକ ପ୍ରମୁଖ କାରଣ ହେଉଛି କର୍କଟ ରୋଗ, ପ୍ରତିବର୍ଷ ଲକ୍ଷ ଲକ୍ଷ ଲୋକ ଏହି ରୋଗରେ ପ୍ରାଣ ହରାଉଛନ୍ତି । ଏହା ଏପରି ଏକ ରୋଗ ଯାହାର କୌଣସି ସୀମା ନାହିଁ, ଏହା ଯେ କୌଣସି ବୟସରେ ଯେ କୌଣସି ବ୍ୟକ୍ତିଙ୍କୁ ହୋଇପାରେ । ଏହା ଏତେ ବିପଜ୍ଜନକ ରୋଗ ଯେ ଏହା ସମଗ୍ର ପରିବାରର ସାମାଜିକ-ଅର୍ଥନୈତିକ ପୃଷ୍ଠଭୂମିକୁ ପ୍ରଭାବିତ କରିପାରେ । ତେବେ ନିକଟରେ ହୋଇଥିବା ଏକ ଗବେଷଣାରେ ଏହାକୁ ନେଇ ଅନେକ ଚିନ୍ତା ପ୍ରକଟ ହୋଇଥିବା ବେଳେ ୨୦୫୦ ବେଳକୁ ପୁରୁଷଙ୍କ ଠାରେ କର୍କଟ ଜନିତ ମୃତ୍ୟୁ ସଂଖ୍ୟା ବଢ଼ିବାକୁ ଯାଉଛି।

ସମଗ୍ର ବିଶ୍ୱରେ ଆୟୁଷ ଯେତିକି ବୃଦ୍ଧି ପାଉଛି, ସେତିକି କ୍ୟାନସର ହେବାର ଆଶଙ୍କା ମଧ୍ୟ ବଢିବାରେ ଲାଗିଛି । ବୟସ୍କ ପୁରୁଷମାନେ ପ୍ରୋଷ୍ଟେଟ୍ ଏବଂ ଫୁସଫୁସ୍ କର୍କଟ ଭଳି କେତେକ ପ୍ରକାରକର୍କଟ ପ୍ରତି ଅଧିକ ସମ୍ବେଦନଶୀଳ ହୋଇଥାନ୍ତି, ଯାହା କି ପୁରୁଷମାନଙ୍କର କର୍କଟ ରୋଗର ଅନ୍ୟତମ ସାଧାରଣ ରୂପ ଅଟେ । ଗବେଷକମାନେ ୧୮୫ଟି ଦେଶ ଏବଂ ଅଞ୍ଚଳର ୩୦ ପ୍ରକାର କର୍କଟ ପ୍ରକାର ଏବଂ ଜନସଂଖ୍ୟାର ତଥ୍ୟକୁ ଅନୁଧ୍ୟାନ କରି ପୁରୁଷଙ୍କ ଠାରେ କର୍କଟ ରୋଗ ଏବଂ ମୃତ୍ୟୁ ହାର ଆକଳନ କରିଥିଲେ। ଏହି ଗବେଷଣାରେ ଗବେଷକମାନେ ଜାଣିବାକୁ ପାଇଛନ୍ତି ଯେ ମହିଳାଙ୍କ ତୁଳନାରେ ପୁରୁଷମାନେ ଧୂମପାନ ଏବଂ ମଦ୍ୟପାନ କରିବାର ସମ୍ଭାବନା ଅଧିକ ଥାଏ।

ଯାହା କର୍କଟ ଏବଂ କର୍କଟ ଜନିତ ମୃତ୍ୟୁର ଆଶଙ୍କାକୁ ବଢ଼ାଇଥାଏ । ଏହାବ୍ୟତୀତ ପୁରୁଷମାନେ କାମ କରିବା ସମୟରେ କାର୍ସିନୋଜେନ୍ ସଂସ୍ପର୍ଶରେ ଆସିବାର ସମ୍ଭାବନା ଅଧିକ ଥାଏ ଏବଂ ସେମାନଙ୍କର କର୍କଟ ସ୍ଥିତି ଯାଞ୍ଚ ହେବାର ସମ୍ଭାବନା କମ୍ ଥାଏ । ୨୦୨୨ରୁ ୨୦୫୦ ମଧ୍ୟରେ ୮୭% ରୁ ଅଧିକ ବୃଦ୍ଧି ସହିତ ଫୁସଫୁସ୍ କର୍କଟ ୨୦୫୦ ରେ ସମଗ୍ର ବିଶ୍ୱରେ କର୍କଟ ମାମଲା ଏବଂ ମୃତ୍ୟୁର ପ୍ରାଥମିକ କାରଣ ହେବ ବୋଲି ଆଶା କରାଯାଉଛି । ପରବର୍ତ୍ତୀ ସମୟରେ କୋଲୋରେକ୍ଟାଲ ଏବଂ ପ୍ରୋଷ୍ଟେଟ୍ କର୍କଟ ଆସିଥାଏ । ୨୦୫୦ ବେଳକୁ ପ୍ରୋଷ୍ଟେଟ୍ କର୍କଟ ଅଧିକ ମାରାତ୍ମକ ହେବାକୁ ଯାଉଛି। ସେହିପରି ଚର୍ମ କର୍କଟ ରୋଗରେ ଅଧିକ ଲୋକଙ୍କ ମୃତ୍ୟୁ ହୋଇପାରେ ।