ଆଉ କେତେ ଦୁର୍ଘଟଣା? ଯୁବତୀଙ୍କୁ ଧକ୍କା ଦେଲା ମୋ ବସ୍, କଟିଗଲା ବାମ ହାତ

ଭୁବନେଶ୍ବର: ପୁଣି ଦୁର୍ଘଟଣା ଘଟାଇଛି ମୋ ବସ୍ । ଭୁବନେଶ୍ବର ସ୍ଥିତ ଚନ୍ଦ୍ରଶେଖରପୁର ପେଟ୍ରୋଲ ପମ୍ପ ନିକଟରେ ଜଣେ ଯୁବତୀଙ୍କ ଉପରେ ମାଡି ଯାଇଛି ମୋ ବସ୍ । ତେବେ ଦୁର୍ଘଟଣାରେ ଯୁବତୀଜଣଙ୍କର ହାତ କଟିଯାଇଥିବା ଖବର ସାମ୍ନାକୁ ଆସିଛି । ଗୁରୁତର ଯୁବତୀଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଦୁର୍ଘଟଣାରେ ଯୁବତୀଙ୍କର ବାମ ହାତ ଛିଡିଯାଇଛି ।

ସୂଚନା ଅନୁସାରେ, ସକାଳ ପ୍ରାୟ 9ଟା ସମୟରେ ଯୁବତୀଜଣକ ସ୍କୁଟିରେ ଯାଉଥିଲେ । ତେବେ ମୋ ବସ୍ ପଛରୁ ଆସି ତାଙ୍କୁ ଧକ୍କା ଦେଇଥିଲା । ଫଳରେ ଯୁବତୀଜଣକ ଛିଟିକି ହୋଇ ତଳେ ପଡିଯାଇଥିଲେ । ତେବେ ଯୁବତୀଜଣକ ତଳେ ପଡିଯିବା ପରେ ବସ୍ ଚାଳକ ତାଙ୍କ ହାତ ଉପରେ ମାଡି ନେଇଯାଇଥିଲେ । ଭୟଙ୍କର ଦୁର୍ଘଟଣାରେ ଯୁବତୀଙ୍କର ହାତ କଟିଯାଇଥିବା ଜଣାପଡିଛି । ମୋ ବସ୍ ଡ୍ରାଇଭର ଦୁର୍ଘଟଣା ଘଟାଇ ଘଟଣାସ୍ଥଳରୁ ଚମ୍ପଟ ମାରିଛି । ସ୍ଥାନୀୟ ଲୋକେ ଯୁବତୀଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିବା ବେଳେ ଘଟଣାସ୍ଥଳରେ ଚାପା ଉତ୍ତେଜନା ଦେଖାଯାଇଛି । ସ୍ଥାନୀୟ ଲୋକ ସେହି ରାସ୍ତା ଦେଇ ଯାଉଥିବା ମୋ ବସକୁ ଅଟକାଇବା କାରଣରୁ ନନ୍ଦନକାନନ-ଜୟଦେବ ବିହାର ରାସ୍ତାରେ ଗାଡି ଚଳାଚଳ ଏକ ପ୍ରକାର ପ୍ରଭାବିତ ହୋଇଛି । ଦୁର୍ଘଟଣାସ୍ଥଳରେ ପଛକୁ ପଛ ହୋଇ 15ଟି ମୋ ବସ୍ ଅଟକି ରହିଛି ।