ଜୁନିୟର ଏନଫୋର୍ସମେଣ୍ଟ ଅଫିସର ଓ ଜୁନିୟର ଆକାଉଣ୍ଟାଣ୍ଟ ପ୍ରିଲିମିନାରୀ ପରୀକ୍ଷା ପାଇଁ ଶିଡ୍ୟୁଲ ଘୋଷଣା କଲା OSSC

ଭୁବନେଶ୍ୱର(ଓଡ଼ିଶା ଭାସ୍କର): ଜୁନିୟର ଏନଫୋର୍ସମେଣ୍ଟ ଅଫିସର ଓ ଜୁନିୟର ଆକାଉଣ୍ଟାଣ୍ଟ ପ୍ରିଲିମିନାରୀ ପରୀକ୍ଷା ପାଇଁ ଅସ୍ଥାୟୀ ଶିଡ୍ୟୁଲ ଜାରି ହୋଇଛି । ଆସନ୍ତା ଡିସେମ୍ବର କିମ୍ବା ଜାନୁଆରୀ ମାସରେ ଏହି ଦୁଇ ପଦର ସମ୍ଭାବ୍ୟ ପ୍ରିଲିମିନାରୀ ପରୀକ୍ଷା ହେବ । ଏନେଇ ଓଡ଼ିଶା କର୍ମଚାରୀ ଚୟନ ଆୟୋଗ (ଓଏସଏସସି) ତରଫରୁ ଏକ ବିଜ୍ଞପ୍ତି ଜାରି କରି ସୂଚନା ଦିଆଯାଇଛି । ସୂଚନାଯୋଗ୍ୟ ଯେ, ଜୁନିୟର ଏନଫୋର୍ସମେଣ୍ଟ ଅଫିସର ଓ ଜୁନିୟର ଆକାଉଣ୍ଟାଣ୍ଟ ପଦ ପୂରଣ ପାଇଁ ଗତବର୍ଷ ଡିସେମ୍ବର ମାସରେ ଓଏସଏସସି ଦ୍ୱାରା ନୋଟିଫିକେସନ ଜାରି କରାଯାଇଥିଲା । ପରବର୍ତ୍ତୀ ସମୟରେ ଏହାର ଆବେଦନ ତାରିଖ ପରିବର୍ତ୍ତନ କରାଯାଇଥିଲା । ଏପରିକି ଓଏସଏସସି ତରଫରୁ କରିଜେଣ୍ଡମ୍ ଜାରି କରାଯାଇ ଏହି ନିଯୁକ୍ତି ବିଜ୍ଞପ୍ତିର ତ୍ରୁଟି ସଂଶୋଧନ କରାଯାଇଥିଲା । ଏହି ଦୁଇ ପଦର ପ୍ରିଲିମ୍ସ ପରୀକ୍ଷାକୁ ନେଇ ଅସ୍ଥାୟୀ ଶିଡ୍ୟୁଲ ଜାରି ହେବା ପରେ ଏବେ ଆଶାୟୀଙ୍କୁ ମିଳିଛି ଆଶ୍ୱସ୍ତି ।