Pushpa-2 ଟ୍ରେଲର ରିଲିଜରେ ଚପଲ ଫିଙ୍ଗିଲେ ଦର୍ଶକ… ସୀମା ପାର୍ କଲେ ‘ପୁଷ୍ପାରାଜ’ଙ୍କ ଫ୍ୟାନ୍ସ

ପାଟନା: ପାଟନାର ଗାନ୍ଧୀ ମଇଦାନରେ ବିରାଟ ଇଭେଣ୍ଟରେ ଲଞ୍ଚ୍ ହୋଇଛି ‘ପୁଷ୍ପା-୨ ଦ ରୁଲ୍’ର ଟ୍ରେଲର । ଅଲ୍ଲୁ ଅର୍ଜୁନ ଏବଂ ରଶ୍ମିକା ମନ୍ଦାନାଙ୍କ ସହ ସିନେମାର ଅନ୍ୟ ସଦସ୍ୟଙ୍କ ଉପସ୍ଥିତିରେ ଏହି ଫିଲ୍ମର ଟ୍ରେଲର ଲଞ୍ଚ୍ କରାଯାଇଛି । ବହୁ ପ୍ରତିକ୍ଷୀତ ଏହି ସିନେମାରେ ସାମିଲ ହେବାକୁ ହଜାର ହଜାର ଫ୍ୟାନ୍ସ ସେଠାରେ ଉପସ୍ଥିତ ରହିଥିଲେ । କିନ୍ତୁ ଏହି ଇଭେଣ୍ଟରେ ଘଟିଯାଇଛି ଏକ ଲଜ୍ଜାଜନକ ଘଟଣା । ଷ୍ଟାଇଲିସ ଷ୍ଟାରଙ୍କ ଟ୍ରେଲର ଲଞ୍ଚ୍ ଇଭେଣ୍ଟରେ ଦର୍ଶକ ଚପଲ ମାଡ଼ କରିଛନ୍ତି । ଏସବୁକୁ ରୋକିବାରେ ବିଫଲ ହୋଇଥିବା ବେଳେ ଶେଷରେ ଲାଠି ଚାର୍ଜ କରିବାକୁ ବାଧ୍ୟ ହୋଇଥିଲା ପୋଲିସ ।

‘ପୁଷ୍ପା-୨’ର ଟ୍ରେଲର ଲଞ୍ଚ୍ ଇଭେଣ୍ଟରେ ଆଇକନ୍ ଷ୍ଟାର ଅଲ୍ଲୁ ଅର୍ଜୁନ ଟିକିଏ ବିଳମ୍ବରେ ପହଞ୍ଚିଥିଲେ । ଷ୍ଟେଜରେ ନିଜ ସୁପରଷ୍ଟାରଙ୍କୁ ଦେଖିବା ପାଇଁ ହଜାର ହଜାର ଦର୍ଶକ ଗାନ୍ଧୀ ମଇଦାନରେ ଅପେକ୍ଷା କରି ରହିଥିଲେ । ତେବେ ଅଲ୍ଲୁ ଅର୍ଜୁନଙ୍କୁ ଦେଖିବା ପାଇଁ ପ୍ରବଳ ଭିଡ଼ ଲାଗିଥିବା ବେଳେ ଏହାକୁ ନିୟନ୍ତ୍ରଣ କରିବା ପୋଲିସ ପାଇଁ ଏକ ବଡ଼ ଚାଲେଞ୍ଜ ସାଜିଥିଲା । ଏହାଭିତରେ ଷ୍ଟେଜରେ ଅଲ୍ଲୁ ଅର୍ଜୁନଙ୍କ ନ ଦେଖି ଦର୍ଶକ ଖୁବ ନିରାଶ ହେବା ସହ ଏକ ଲଜ୍ଜାଜନକ କାଣ୍ଡ କରି ବସିଛନ୍ତି । ଭିଡ଼ ଭିତରୁ ଜୋତା-ଜପ୍ପଲ ମାଡ଼ କରିବା ଆରମ୍ଭ କରିଛନ୍ତି ଅଲ୍ଲୁ ଅର୍ଜୁନଙ୍କ ଫ୍ୟାନ୍ସ । ଏଭଳି ପରିସ୍ଥିତି ପରେ ପୋଲିସକୁ ଭିଡ଼ ରୋକିବା ଆହୁରି କଷ୍ଟକର ହୋଇ ପଡ଼ିଥିଲା । ଯାହାଫଳରେ ପୋଲିସ ମଧ୍ୟ ବଳ ପ୍ରୟୋଗ କରିବାକୁ ବାଧ୍ୟ ହୋଇଛି ।

ପୁଷ୍ପା-୨ ଫିଲ୍ମର ଟ୍ରେଲର ଲଞ୍ଚ୍ ହେବା ମାତ୍ରେ ଦର୍ଶକ ବେକାବୁ ହୋଇଯାଇଛନ୍ତି । ଏହାପରେ ଦର୍ଶକଙ୍କ ଭିଡ଼ ବ୍ୟାରିକେଡ ଭାଙ୍ଗିବା ସହ ଡ୍ରୋନ୍ ଭଳି ଚପଲ ଉଡ଼ାଇଛନ୍ତି । ଅଲ୍ଲୁ ଅର୍ଜୁନଙ୍କୁ ଷ୍ଟେଜରେ ଦେଖିବା ପରେ ଏହାକୁ ଅପେକ୍ଷା କରିଥିବା ବିଶାଳ ସମାଗମ ଆହୁରି ବେକାବୁ ହୋଇଯାଇଛନ୍ତି । ଫଳରେ ପୋଲିସ ସ୍ଥିତି ନିୟନ୍ତ୍ରଣ କରିବା ପାଇଁ ଲାଠିଚାର୍ଜ କରିବାକୁ ବାଧ୍ୟ ହୋଇଛି । ଲୋକଙ୍କ ଭିଡ଼ ନିୟନ୍ତ୍ରଣ କରିବା ପାଇଁ କଡ଼ା ଆକ୍ସନ ନେଉଥିବା ବେଳେ ଭିଆଇପି ଗ୍ୟାଲେରୀକୁ ପାଣି ବୋତଲ ମାଡ଼ ମଧ୍ୟ ହୋଇଛି । ତେଣୁ ଫ୍ୟାନ୍ସମାନଙ୍କୁ ସଂଯମତା ରକ୍ଷା କରିବା ପାଇଁ ଅପିଲ କରିଥିଲା ପୋଲିସ । କିନ୍ତୁ ପୁଷ୍ପା-୨ ପ୍ରତି ଲୋକଙ୍କ ଭଲପାଇବା ଏବଂ ଉତ୍ସାହ ଏଥିରୁ ସ୍ପଷ୍ଟ ବାରି ହୋଇଛି ।

ସୂଚନା ଅନୁସାରେ, ବହୁ ପ୍ରତିକ୍ଷୀତ ମୋଭି ‘ପୁଷ୍ପା-୨’ର ଟ୍ରେଲର ରିଲିଜ ହୋଇଯାଇଛି । ପୁଷ୍ପାର ବମ୍ପର ଇନକମ୍ ପରେ ବ୍ଲକବଷ୍ଟର ଫିଲ୍ମର ସିକ୍ୱେଲକୁ ଫ୍ୟାନ୍ସ ଅପେକ୍ଷା କରି ରହିଥିଲେ । ଏବେ ଏହାର ଟ୍ରେଲର ରିଲିଜ ହୋଇଯାଇଛି । ପୁଷ୍ପା-୨(ପୁଷ୍ପା- ଦ ରୁଲ୍) ୬ଟି ଭାଷାରେ ସାରା ବିଶ୍ୱରେ ରିଲିଜ ହେବାକୁ ଯାଉଛି । ଏହାସହିତ ୧୧ ହଜାରରୁ ଅଧିକ ଥିଏଟ୍ରିକାଲ ସ୍କ୍ରିନରେ ଏହା ରିଲିଜ ହେବ । ତେବେ ଏହାର ଆଡଭାନ୍ସ ବୁକିଙ୍ଗ ମଧ୍ୟ ରେକର୍ଡ ସୃଷ୍ଟି କରୁଛି । ତେବେ ଅଲ୍ଲୁ ଅର୍ଜୁନ, ରଶ୍ମିକା ମନ୍ଦାନା ଏବଂ ଫହାଦ ଫାସିଲଙ୍କ ଅଭିନୀତ ଏହି ସିନେମା ଆସନ୍ତା ଡିସେମ୍ବର ୫ ତାରିଖରେ ବଡ଼ ପରଦାକୁ ଆସିବ ।