ପାକିସ୍ତାନ ଶୋଚନୀୟ ପରାସ୍ତ: ଟି-୨୦ ସିରିଜରେ ୩-୦ରେ ବିଜୟୀ ହେଲା ଅଷ୍ଟ୍ରେଲିଆ
ନୂଆଦିଲ୍ଲୀ: ଅଷ୍ଟ୍ରେଲିଆ ଗସ୍ତରେ ଯାଇଥିବା ପାକିସ୍ତାନ ଟିମ ଦିନିକିଆ ସିରିଜକୁ ୨-୧ରେ କବଜା କରିନେଇଥିବା ବେଳେ ଟି-୨୦ରେ କିନ୍ତୁ ଶୋଚନୀୟ ଭାବେ ପରାଜୟ ବରଣ କରିଛନ୍ତି । ପାକିସ୍ତାନ ବିପକ୍ଷରେ ୦-୩ରେ ବିଜୟ ସହ ଅଷ୍ଟ୍ରେଲିଆ ଟି-୨୦ ସିରିଜରେ ବାଜିମାତ କରିଛି । ଏହି ବିଜୟ ଫଳରେ ଦିନିକିଆ ସିରିଜ ପରାଜୟର ମଧୁର ପ୍ରତିଶୋଧ ଟି-୨୦ରେ ନେଇଛି ଅଷ୍ଟ୍ରେଲିଆ । ଏହା ପୂର୍ବରୁ ପ୍ରଥମ ଓ ଦ୍ୱିତୀୟ ଟି-୨୦ରେ ଅଷ୍ଟ୍ରେଲିଆ ଜିତି ସିରିଜକୁ ଆଗୁଆ କବଜା କରିନେଇଥିବା ବେଳେ ଅନ୍ତିମ ମ୍ୟାଚରେ ବିଜୟୀ ହୋଇ କ୍ୱିନ୍ ସୁଇପ୍ କରିଛି ।
ଆଜି ଖେଳାଯାଇଥିବା ତୃତୀୟ ଟି-୨୦ରେ ପାକିସ୍ତାନ ପ୍ରଥମେ ବ୍ୟାଟିଂ କରି ୧୮.୧ ଓଭରେ ମାତ୍ର ୧୧୭ ରନ୍ କରି ସମସ୍ତ ୱିକେଟ ହରାଇଥିଲା । ଦଳ ପକ୍ଷରୁ ବାବର ଆଜମ ସର୍ବାଧିକ ୪୧ ରନ୍ ସଂଗ୍ରହ କରିଥିଲେ । ଦଳର ୬ ଜଣ ବ୍ୟାଟ୍ସମ୍ୟାନ ଦୁଇଅଙ୍କ ସ୍ପର୍ଶ କରିପାରିନଥିଲେ । ଅଷ୍ଟ୍ରେଲିଆ ତରଫରୁ ଆରୋନ ହାର୍ଦାଇ ସର୍ବାଧିକ ୩ଟି ୱିକେଟ ନେଇଥିଲେ । ଜବାବରେ ଅଷ୍ଟ୍ରେଲିଆ ମାତ୍ର ୧୧.୨ ଓଭରରେ ଲକ୍ଷ୍ୟ ହାସଲ କରିନେଇଥିଲା । ଦଳ ପକ୍ଷରୁ ମାର୍କସ ଷ୍ଟୋଇନିସ ସର୍ବାଧିକ ୬୧ ରନ୍ ସଂଗ୍ରହ କରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ ।
