ହାର୍ଦ୍ଦିକଙ୍କ ଦଳରେ ଅଧିନାୟକ ରହିବେ କୃଣାଳ ପାଣ୍ଡ୍ୟା: ଗୋଟିଏ ଦଳରେ ସ୍ଥାନ ପାଇଲେ ଦୁଇ ଭାଇ

ନୂଆଦିଲ୍ଲୀ: ଟି-୨୦ କ୍ରିକେଟରେ ଦମଦାର ପ୍ରଦର୍ଶନ ଜାରି ରଖିଛନ୍ତି ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା । ବ୍ୟାଟିଂ ଏବଂ ବୋଲିଂ ସହ ଫିଲ୍ଡିଂରେ ସେ ନିଜକୁ ପ୍ରମାଣ କରିସାରିଛନ୍ତି । କିନ୍ତୁ ଭାଇ କୃଣାଳ ପାଣ୍ଡ୍ୟାଙ୍କୁ ବର୍ତ୍ତମାନ ସୁଦ୍ଧା ବିଶେଷ ସଫଳତା ମିଳି ପାରିନାହିଁ । ତେବେ ହାର୍ଦ୍ଦିକ ଆଇପିଏଲରେ ମୁମ୍ବାଇ ଇଣ୍ଡିଆନ୍ସର ଅଧିନାୟକ ରହିଥିବା ବେଳେ ଟିମ ଇଣ୍ଡିଆର ଅଧିନାୟକ ଦାୟିତ୍ୱ ମଧ୍ୟ ତୁଲାଇ ସାରିଛନ୍ତି । ଏହାପରେ ମଧ୍ୟ ହାର୍ଦ୍ଦିକଙ୍କୁ ବର୍ତ୍ତମାନ ଭାଇ କୃଣାଳ ପାଣ୍ଡ୍ୟାଙ୍କ ନେତୃତ୍ୱରେ ଖେଳିବାକୁ ପଡ଼ିବ । କୃଣାଳଙ୍କ ନେତୃତ୍ୱାଧୀନ ଦଳରେ ବର୍ତ୍ତମାନ ହାର୍ଦ୍ଦିକଙ୍କୁ ସାମିଲ କରାଯାଇଛି ।

ସୂଚନା ଅନୁସାରେ, ଟିମ ଇଣ୍ଡିଆର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ମଧ୍ୟ ଏବେ ଘରୋଇ କ୍ରିକେଟ ଖେଳିବାକୁ ପହଞ୍ଚିଛନ୍ତି । ତେଣୁ ସୟଦ ମୁସ୍ତାକ ଅଲୀ ଟ୍ରଫିରେ ହାର୍ଦ୍ଦିକଙ୍କୁ ସାମିଲ କରାଯାଇଛି । ଭାରତର ଡୋମେଷ୍ଟିକ ଟି-୨୦ ଟୁର୍ଣ୍ଣାମେଣ୍ଟରେ ହାର୍ଦ୍ଦିକଙ୍କୁ ବରୋଦା ଦଳରେ ସ୍ଥାନ ମିଳିଥିବା ବେଳେ ଏହି ଦଳର ଅଧିନାୟକ ପଦ ଭାଇ କୃଣାଳ ପାଣ୍ଡ୍ୟାଙ୍କ ହାତରେ ରହିଛି । ତେଣୁ ହାର୍ଦ୍ଦିକଙ୍କୁ ଏହି ଟୁର୍ଣ୍ଣାମେଣ୍ଟରେ କୃଣାଳଙ୍କ ନେତୃତ୍ୱରେ ଖେଳିବାକୁ ପଡ଼ିବ । ଗତ ସିଜନରେ କୃଣାଳଙ୍କ ନେତୃତ୍ୱରେ ବରୋଦା ଉପବିଜେତା ରହିଥିଲା । କିନ୍ତୁ ଚଳିତବର୍ଷ ଦୁଇ ଭାଇ ମିଶି ଦଳକୁ ଟାଇଟଲ ଜିତାଇବାରେ ପ୍ରମୁଖ ଦାୟିତ୍ୱ ତୁଲାଇପାରିବେ ।

ତେବେ କେବଳ ହାର୍ଦ୍ଦିକ ପାଣ୍ଡ୍ୟା ନୁହଁନ୍ତି, ଅନ୍ୟ ଅନେକ ଭାରତୀୟ ଖେଳାଳି ମଧ୍ୟ ଏହି ଟୁର୍ନାମେଣ୍ଟରେ ଖେଳିବାକୁ ଯାଉଛନ୍ତି, ଯେଉଁଥିରେ ଟି -୨୦ ଦଳର ଅଧିନାୟକ ସୂର୍ୟ୍ୟକୁମାର ଯାଦବଙ୍କ ନାମ ରହିଛି। ଏଥର ସୟଦ ମୁସ୍ତାକ ଅଲି ଟ୍ରଫି ଅଧିକ ତାରକାଙ୍କ ସହ ଦେଖିବାକୁ ମିଳିବ। ଶେଷ ଥର ପାଇଁ ହାର୍ଦ୍ଦିକ ପାଣ୍ଡ୍ୟା ଏହି ଟୁର୍ନାମେଣ୍ଟ ୨୦୧୬ ରେ ଖେଳିଥିଲେ । ଏହା ପରେ ସେ ଅଧିକାଂଶ ଘରୋଇ କ୍ରିକେଟ୍ ଖେଳିନଥିଲେ କାରଣ ସେ ଅଧିକାଂଶ ସମୟରେ ଜାତୀୟ ଡ୍ୟୁଟିରେ ଥିଲେ । ଏଥି ସହିତ କ୍ରୁନାଲ ପାଣ୍ଡ୍ୟା ଘରୋଇ କ୍ରିକେଟରେ ବରୋଦା ପାଇଁ ଶ୍ରେଷ୍ଠ ପ୍ରଦର୍ଶନ କରିଛନ୍ତି ଏବଂ ତାଙ୍କ ଅଧିନାୟକତ୍ୱ ମଧ୍ୟ ଭଲ ରହିଛି।