ମଦ୍ୟପଙ୍କ ବୁଲେଟ ଚାବି ଖୋଜାରେ ଫାଟିଲା ଚାଖଣା ବିକାଳିଙ୍କ ମୁଣ୍ଡ

ପାରାଦୀପ- ବାର ନିକଟରେ ଥିବା ଚାଖଣା ବିକାଳିଙ୍କୁ ପଡିଥିଲା ଶନି ଦଶା । ଚାଖଣା ନେବାକୁ ଆସିଥିବା ମଦ୍ୟପ ନିଶାରେ ଫଟାଇଦେଲା ଦୋକାନୀଙ୍କ ମୁଣ୍ଡ । ଏମିତି ଘଟଣା ଘଟିଛି ପାରାଦୀପ ବଡପଡିଆ ଅଞ୍ଚଳରେ । ଆହତ ଦୋକାନୀଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି ।
ତେବେ ଘଟଣାଟି ଥିଲା ଏମିତି, ବଡ ପଡିଆ ଅଞ୍ଚଳରେ ଥିବା ଏକ ବାରକୁ ଜଣେ ଯୁବକ ବୁଲେଟ ଚଢି ପହଞ୍ଚିଥିଲେ । ସେ ବାରରୁ ମଦ କିଣିବା ସହ ବାର କାଡରେ ଥିବା ଚାଖଣା ଦୋକାନରୁ କିଣିଥିଲେ ଚାଖଣା । ବସି ଆରାମରେ ମଜା ନେଇ ନେଇ ମଦ ପିଇଥିଲେ । ମଦରେ ପେଟ ପୂର ହେବା ପରେ ବାବୁ ଟଳି ଟଳି ଉଠିଲେ । ବୁଲେଟ ପାଖକୁ ଯାଇ ପକେଟରେ ପାଇଲେନି ଚାବି । ପୁଣି ବାରକୁ ଆସିଲେ । ବାରରେ ପାଟିତୁଣ୍ଡ କରି ତାଙ୍କ ଚାବି କୁଆଡେ ଗଲା ବୋଲି ଚିକ୍ରାର କରୁଥିଲେ ଟଳି ଟଳି । ରାଗରେ ବାର ଟେବୁଲରେ ଥିବା ମଦ ଦୋକାନ ମଧ୍ୟ ବାଡେଇ ଭାଙ୍ଗିଥିଲେ । ହେଲେ ସେଠାରେ ମିଳିନଥିଲା ଚାବି ।
କିଛି ସମୟ ପରେ ହୁଏତ ବାବୁଙ୍କ ମନେ ପଡିଲା ସେ ଚାଖଣା ଦୋକାନକୁ ବି ଯାଇଥିଲେ । ତା ପରେ ହାତରେ ଭଙ୍ଗା ଏକ ବୋତଲ ଥରି ଟଳମଳ ଅବସ୍ଥାରେ ପହଞ୍ଚିଥିଲେ ଚାଖଣା ଦୋକାନରେ । ତାକୁ ଚାବି ମାଗିବାରୁ ସେ ବିଚରା ଚାବି ଦେଖିନଥିବା ଅତି ଭଦ୍ରତାର ସହ କହିଲା । ହେଲେ ମଦ୍ୟପ ଯୁବକଙ୍କ ରାଗ ପଞ୍ଚମରେ ପହଞ୍ଚି ଯାଇଥିଲା । ରାଗରେ ହାତରେ ଧରିଥିବା ବୋତଲକୁ ଦୋକାନୀଙ୍କ ମୁଣ୍ଡରେ ଢୋ କରି ପିଟି ଦେଲେ ।
ତା ପରେ କଣ ହେବ । ଚାଖଣା ଦୋକାନୀଙ୍କ ମୁଣ୍ଡ ଫାଟି ରକ୍ତ ଧାର ଧାର ବହିଚାଲିଲା । ପାଖରେ ଥିବା ଲୋକେ ରୁଣ୍ଡ ହୋଇଗଲେ । ଦୋକାନୀଙ୍କୁ ହସ୍ପିଟାଲ ନେଇଗଲେ । ତେବେ ଖବର ଲେଖା ହେବା ବେଳକୁ ଏନେଇ ଥାନାରେ କୌଣସି ଅଭିଯୋଗ ହୋଇ ନ ଥିଲା ।