ନଦୀରେ ବଡ ଧରଣର ଅଘଟଣ, ଡଙ୍ଗା ବୁଡି 25 ମୃତ 10ରୁ ଅଧିକ ନିଖୋଜ
ନୂଆଦିଲ୍ଲୀ: କଙ୍ଗୋର ମାଇ-ଏନଡୋମ୍ବ ପ୍ରଦେଶର ଫିମି ନଦୀରେ ବୁଡିଲା ଡଙ୍ଗା । କିନସାସାର ଉତ୍ତର-ପୂର୍ବରେ ଅବସ୍ଥିତ ଇନୋଙ୍ଗୋ ସହର ନିକଟରେ ଏହି ଦୁଃଖଦାୟକ ଘଟଣା ଘଟିଛି । ଏହି ଘଟଣାରେ 25ଜଣଙ୍କ ମୃତ୍ୟୁ ହୋଇଥିବା ବେଳେ 10ରୁ ଅଧିକ ନିଖୋଜ ରହିଛନ୍ତି । ତେବେ ଦୁର୍ଘଟଣା ଘଟିବା ସମୟରେ ଡଙ୍ଗାରେ 100 ଜଣ ଯାତ୍ରୀ ରହିଥିଲେ ।
ଫିମି ନଦୀନରେ 100 ଯାତ୍ରୀଙ୍କୁ ନେଇ ଯାଉଥିବା ଡଙ୍ଗା କିଛି ଦୂର ଗଲା ପରେ ଓଲଟି ପଡିଥିଲା । ଅନେକ ନିଖୋଜ ହୋଇଯାଇଥିବା ବେଳେ ସର୍ଚ୍ଚ ଅପରେସନ ଜାରି ରଖାଯାଇଥିଲା । ତେବେ 10ରୁ ଅଧିକ ଜଣ ନିଖୋଜ ରହିଥିବା ବେଳେ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ଆଶା କରାଯାଉଛି । ଖବର ଲେଖାଯିବା ପର୍ଯ୍ୟନ୍ତ 25ଜଣଙ୍କ ମୃତଦେହ ଉଦ୍ଧାର କରାଯାଇଥିବା ନେଇ ଇନୋଙ୍ଗୋର ନଦୀ କମିଶନର ଡେଭିଡ କାଲେମ୍ବା କହିଛନ୍ତି । ଓଲଟି ପଡିଥିବା ଡଙ୍ଗାରେ ଯାତ୍ରୀଙ୍କ ସମେତ ସାମଗ୍ରୀ ମଧ୍ୟ ଭର୍ତ୍ତି କରାଯାଇଥିଲା । କଙ୍ଗୋର ଏହି ନଦୀ ଉପରେ ସ୍ଥାନୀୟବାସୀ ନିର୍ଭର କରିଥାନ୍ତି ।
ତେବେ କଙ୍ଗୋରେ ଏହା ପ୍ରଥମ ଘଟଣା ନୁହେଁ । ଅକ୍ଟୋବରରେ, ପୂର୍ବ କଙ୍ଗୋରେ ଏକ ଡଙ୍ଗା ବୁଡ଼ିଯିବା ପରେ ୭୮ଜଣଙ୍କର ମୃତ୍ୟୁ ଘଟିଥିଲା ଏବଂ ଜୁନ୍ ମାସରେ କିନସାସା ନିକଟରେ ସମାନ ଘଟଣାରେ ୮୦ଜଣଙ୍କର ମୃତ୍ୟୁ ଘଟିଥିଲା। ତେବେ ଜଳରେ ପରିବହନ ରୋକିବା ପାଇଁ ସରକାର ଚେତାବନୀ ଦେଉଥିଲେ ମଧ୍ୟ କୌଣସି ପ୍ରକାରେ ଫରକ ଦେଖିବାକୁ ମିଳୁନାହିଁ ।
