ମୁକୁଳା ଡ୍ରେନରେ ପଡି ଯୁବକଙ୍କ ମୃତ୍ୟୁ
ପୁରୀ- ଜଗନ୍ନାଥ କ୍ଷେତ୍ରରେ ମୁକୁଳା ସାଜିଛି ମରଣ ଯନ୍ତା । ମୁକୁଳା ଡ୍ରେନରେ ପଡି ଜଣେ ଯୁବକଙ୍କ ମୃତ୍ୟୁ । କୁମ୍ଭାରପଡା ଥାନା ଅଞ୍ଚଳରେ ଘଟିଲା ଅଘଟଣ । ଡ୍ରେନ ଘୋଡା ଯାଇ ନ ଥିବାରୁ ଡ୍ରେନରେ ପଡି ଯୁବକଙ୍କ ମୃତ୍ୟୁ ହୋଇଛି ।
ମୁକୁଳା ଡ୍ରେନରେ ପଡି ପୁରୀ କୁମ୍ଭାରପଡା ଥାନା ଅଧୀନ ଗଜପତି ନଗରରେ ଜଣେ ଯୁବକଙ୍କ ମୃତ୍ୟୁ ହୋଇଛି । ଅଞ୍ଚଳଦେଇ ଯାଇଥିବା ମୁକୁଳା ଡ୍ରେନରେ ଜଣେ ଯୁବକଙ୍କ ମୃତଦେହ ଭାସୁଥିବା ସକାଳୁ ଲୋକେ ଦେଖିବାକୁ ପାଇଥିଲେ । ଡ୍ରେନ ପାଣିରେ ମୃତ ଦେହଟି ଭାସୁଥିଲା । ତେବେ କେମିତି ବ୍ୟକ୍ତିଙ୍କ ମୃତ୍ୟୁ ହେଲା ତାହା ଜଣାପଡି ନାହିଁ । ପୋଲିସ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି ।
ତେବେ ଏହି ଘଟଣା ପରେ ପୌର ସଂସ୍ଥା ଆଡକୁ ଲୋକେ ଅଙ୍ଗୁଳି ନିର୍ଦ୍ଦେଶ କରୁଛନ୍ତି । ଡ୍ରେନ ଉପରେ ସ୍ଲାବ ପଡି ନ ଥିବାରୁ ଏପରି ଅଘଟଣ ଘଟିଥିବା ଅଭିଯୋଗ ହେଉଛି । ପୌର ସଂସ୍ଥା ଡ୍ରେନକୁ ମୁକୁଳା ରଖି ନିଘୋଡ ନିଦରେ ଶୋଇଥିବା ଅଭିଯୋଗ ହେଉଛି । କାହିଁକି ପୌର ସଂସ୍ଥା ଡ୍ରେନ ଉପରେ ସ୍ଲାବ ପକାଉ ନାହିଁ ବୋଲି ଲୋକେ ପ୍ରଶ୍ନ କରୁଛନ୍ତି ।
ବିଶ୍ୱ ଦରବାରରେ ଜଗନ୍ନାଥ ଧାମର ମାନ୍ୟତା ରହିଛି । ଦେଶ ବିଦେଶରୁ ଲୋକେ ପ୍ରତି ଦିନ ପୁରୀକୁ ଆସୁଛନ୍ତି । ଏମିତି ମୁକୁଳା ପଡିଥିବା ଡ୍ରେନ ପାଇଁ କୌଣସି ବିଦେଶାଗତଙ୍କ ପ୍ରାଣ ହାନୀ ଘଟିଲେ ଏହା କଣ ପୁରୀ ଧାମର ଟେକ ବିଶ୍ୱ ଦରବାରରେ ରଖିବ ବୋଲି ଲୋକେ ପୌର ପାଳିକାକୁ ପ୍ରଶ୍ନ କଲେଣି ।
