ଦିନକୁ ଦିନ ବଢୁଛି ବ୍ଲ୍ୟୁ-ଲାଇଟ୍ ପ୍ରୋଟେକ୍ସନ୍ ଚଷମାର ଚାହିଦା, ପ୍ରାମାଣିକତା ନେଇ ପ୍ରଶ୍ନ ଉଠାଇଲେ ବିଶେଷଜ୍ଞ
ନୂଆଦିଲ୍ଲୀ: ବ୍ଲୁ-ଲାଇଟ୍ ପ୍ରୋଟେକ୍ସନ୍ ଚଷମା, ଯାହା ସ୍ମାର୍ଟଫୋନ, କମ୍ପ୍ୟୁଟର ଏବଂ ଅନ୍ୟାନ୍ୟ ଡିଜିଟାଲ୍ ସ୍କ୍ରିନ୍ରୁ ନିର୍ଗତ ନୀଳ ଆଲୋକର କ୍ଷତିକାରକ ପ୍ରଭାବରୁ ଚକ୍ଷୁକୁ ସୁରକ୍ଷା ଦେବାର ଦାବି କରେ, ଏହାର ବୈଜ୍ଞାନିକ ପ୍ରାମାଣିକତା ନେଇ ସାମ୍ପ୍ରତିକ ଗବେଷଣାରେ ପ୍ରଶ୍ନ ଉଠିଛି। ଏହି ଚଷମାଗୁଡ଼ିକ ଚକ୍ଷୁ କ୍ଲାନ୍ତି, ନିଦ୍ରା ସମସ୍ୟା ଏବଂ ଦୀର୍ଘମିଆଦି ଚକ୍ଷୁ କ୍ଷତି ରୋକିବାରେ ସହାୟକ ବୋଲି ବିପଣନ କରାଯାଏ, କିନ୍ତୁ ବିଶେଷଜ୍ଞମାନେ କହୁଛନ୍ତି ଯେ ଏହାର କାର୍ଯ୍ୟକାରିତାର ସପକ୍ଷେ ନିର୍ଭରଯୋଗ୍ୟ ବୈଜ୍ଞାନିକ ପ୍ରମାଣର ଅଭାବ ରହିଛି।
୨୦୨୩ରେ ପ୍ରକାଶିତ ‘କୋକ୍ରେନ ଡାଟାବେସ୍ ଅଫ୍ ସିସ୍ଟେମାଟିକ୍ ରିଭ୍ୟୁ’ରେ ୧୭ଟି କ୍ଲିନିକାଲ ଟ୍ରାଏଲ୍ ପର୍ଯ୍ୟାଲୋଚନା କରାଯାଇଥିଲା। ଏହାରୁ ଜଣାପଡ଼ିଛି ଯେ ବ୍ଲୁ-ଲାଇଟ୍ ଫିଲ୍ଟରିଂ ଚଷମା ଚକ୍ଷୁ କ୍ଲାନ୍ତି ହ୍ରାସ କରେ ବା ନିଦ୍ରା ଗୁଣବତ୍ତା ଉନ୍ନତ କରେ ଏମିତି କୌଣସି ଉଲ୍ଲେଖନୀୟ ପ୍ରମାଣ ମିଳିନାହିଁ। ଅମେରିକାନ ଏକାଡେମୀ ଅଫ୍ ଅଫଥାଲମୋଲୋଜି ମଧ୍ୟ କହିଛି ଯେ ଡିଜିଟାଲ୍ ସ୍କ୍ରିନ୍ରୁ ନିର୍ଗତ ନୀଳ ଆଲୋକ ଚକ୍ଷୁ ପାଇଁ ଗୁରୁତର କ୍ଷତିକାରକ ବୋଲି କୌଣସି ନିଶ୍ଚିତ ପ୍ରମାଣ ନାହିଁ।
ବିଶେଷଜ୍ଞମାନେ ପରାମର୍ଶ ଦେଉଛନ୍ତି ଯେ ଚକ୍ଷୁ ସୁରକ୍ଷା ଏବଂ ନିଦ୍ରା ଉନ୍ନତି ପାଇଁ ୨୦-୨୦-୨୦ ନିୟମ (ପ୍ରତି ୨୦ ମିନିଟ୍ରେ ୨୦ ସେକେଣ୍ଡ ପାଇଁ ୨୦ ଫୁଟ ଦୂରକୁ ଦେଖିବା), ସ୍କ୍ରିନ୍ରୁ ଉତ୍ତମ ଦୂରତା ରକ୍ଷା ଏବଂ ରାତିରେ ସ୍କ୍ରିନ୍ ବ୍ୟବହାର ହ୍ରାସ କରିବା ଅଧିକ ଫଳପ୍ରଦ ହୋଇପାରେ। ଏହାସହ, ଅନେକ ଡିଭାଇସ୍ରେ ଥିବା ‘ନାଇଟ୍ ଶିଫ୍ଟ’ ମୋଡ୍ ମଧ୍ୟ ନୀଳ ଆଲୋକର ପ୍ରଭାବ କମାଇବାରେ ସହାୟକ।
ଏହି ଗବେଷଣା ସତ୍ତ୍ୱେ, ବ୍ଲୁ-ଲାଇଟ୍ ଚଷମାର ବଜାର ବୃଦ୍ଧି ପାଉଛି, ଯାହା ଗ୍ରାହକଙ୍କ ମଧ୍ୟରେ ସଚେତନତା ଆବଶ୍ୟକତାକୁ ଦର୍ଶାଉଛି। ଗ୍ରାହକମାନଙ୍କୁ ପରାମର୍ଶ ଦିଆଯାଉଛି ଯେ ଏହି ଚଷମା କିଣିବା ପୂର୍ବରୁ ଚକ୍ଷୁ ବିଶେଷଜ୍ଞଙ୍କ ସହ ପରାମର୍ଶ କରନ୍ତୁ।