ନିର୍ଦ୍ଦୋଷ ଲୋକଙ୍କ ଉପରେ ହୋଇଥିବା ଘୃଣ୍ୟ ଆକ୍ରମଣରେ ମୁଁ ଦୁଃଖିତ..

ନୂଆଦିଲ୍ଲୀ: ଭାରତ ସବୁଠାରୁ ଭୟଙ୍କର ଆତଙ୍କବାଦୀ ଆକ୍ରମଣର ସମ୍ମୁଖୀନ ହୋଇଛି। ଜମ୍ମୁ-କାଶ୍ମୀରର ପହଲଗାମରେ ୨୭ ରୁ ଅଧିକ ପର୍ଯ୍ୟଟକଙ୍କୁ ଗୁଳି କରି ହତ୍ୟା କରାଯାଇଥିଲା।

କେନ୍ଦ୍ରୀୟ ଏଜେନ୍ସିର ସୂତ୍ର ଅନୁସାରେ, ପାକିସ୍ତାନ-ଭିତ୍ତିକ ଲସ୍କର-ଏ-ତୈବାର ଏକ ସଂଗଠନ ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ଏଭଳି ଘଟଣାକୁ ବିରାଟ କୋହଲି ନିନ୍ଦା କରିଛନ୍ତି। ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ଏହି ଆକ୍ରମଣକୁ ନିନ୍ଦା କରିଛନ୍ତିି।

ବିରାଟ କୋହଲି ଏହି ଘଟଣାରେ ମର୍ମାହତ ହେବା ସହିତ ଦୋଷୀମାନଙ୍କ ପାଇଁ କଠୋର ଦଣ୍ଡ ପାଇଁ ଦାବି କରିଛନ୍ତି। କୋହଲି ଇନଷ୍ଟାଗ୍ରାମରେ ଲେଖିଛନ୍ତି, “ପହଲଗାମରେ ନିର୍ଦ୍ଦୋଷ ଲୋକଙ୍କ ଉପରେ ହୋଇଥିବା ଏହି ଜଘନ୍ୟ ଆକ୍ରମଣରେ ମୁଁ ଗଭୀର ଦୁଃଖିତ। ପୀଡିତଙ୍କ ପରିବାର ପ୍ରତି ମୋର ସମବେଦନା। ନିଜ ପ୍ରିୟଜନଙ୍କୁ ହରାଇଥିବା ସମସ୍ତ ପରିବାର ପାଇଁ ପ୍ରାର୍ଥନା କରୁଛି ଏବଂ ଏହି ନୃଶଂସ କାର୍ଯ୍ୟ ପାଇଁ ନ୍ୟାୟ ଦାବି କରୁଛି।”

ଏହି ସମୟରେ, ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ସନରାଇଜର୍ସ ହାଇଦ୍ରାବାଦ ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯିବାକୁ ଥିବା ଆଇପିଏଲ ମ୍ୟାଚ୍ ସମୟରେ ଖେଳାଳି ଏବଂ ଅଧିକାରୀମାନେ କଳା ବ୍ୟାଚ୍ ପିନ୍ଧିବେ।

ଆଜିର ମ୍ୟାଚ୍ ସମୟରେ କୌଣସି ଚିୟରଲିଡର୍ସ ପ୍ରଦର୍ଶନ କରିବେ ନାହିଁ ଏବଂ କୌଣସି ଆତସବାଜି ହେବ ନାହିଁ ବୋଲି ବିସିସିଆଇ ମଧ୍ୟ ନିଷ୍ପତ୍ତି ନେଇଛି। ଏହି ବର୍ବର ଆକ୍ରମଣରେ ପ୍ରାଣ ହରାଇଥିବା ଲୋକଙ୍କ ସମ୍ମାନାର୍ଥେ ଏହି ନିଷ୍ପତ୍ତି ନିଆଯାଇଛି।