ଅଜବ ବ୍ୟକ୍ତି, ଜାଣିଶୁଣି ଧରୁଛନ୍ତି ବିଷାକ୍ତ ସାପ, ଆଉ ସାପ ପାଖରୁ ଖାଉଛନ୍ତି କାମୁଡ଼ା

ନୂଆଦିଲ୍ଲୀ:  ସାମ୍ନାକୁ ଆସିଲା ଏକ ଅଜବ ଘଟଣା। ସାଧାରଣତଃ ସାପକୁ ଦେଖିଲେ ସମସ୍ତେ ଭୟ କରନ୍ତି। କାଳ ସାପଟି ତାଙ୍କୁ କାମୁଡ଼ି ଦେବ। ହେଲେ ଏଠି କିଛି ଭିନ୍ନ ଘଟଣା ଦେଖିବାକୁ ମିଳିଛି। ଜଣେ ବ୍ୟକ୍ତି ଜାଣିଶୁଣି ସାପକୁ ଧରୁଛନ୍ତି।

ଯେପରି ସାପ ତାଙ୍କୁ କାମୁଡ଼ିବ ଏବଂ ତାଙ୍କ ଦେହରେ ସାପର ବିଷ ପ୍ରବେଶ କରିବ। ହେଲେ ଏମିତି ସେମିତି ସାପ ନୁହେଁ। ଏହି ବ୍ୟକ୍ତି ଜଣକ ଖୋଜି ଖୋଜି ବିଷ ଧର ସାପକୁ ଧରନ୍ତି ଏବଂ ସାପର ବିଷ ତାଙ୍କ ଦେହରେ ପ୍ରବେଶ କରାନ୍ତି। ଏହିପରି ସେ ପାଖାପାଖି ୨୦୦ଟି ସାପ କାମୁଡ଼ା ଖାଇସାରିଲେଣି। ହେଲେ ସେ ଏବେ ବି ଜୀବିତ ଅଛନ୍ତି।

ବିଷାକ୍ତ ବ୍ୟକ୍ତି: ତେବେ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଟିମ୍ ଫ୍ରାଇଡ୍ ନାମକ ଜଣେ ବ୍ୟକ୍ତି ପ୍ରାୟ ୨୦ ବର୍ଷ ଧରି ଜାଣିଶୁଣି ୨୦୦ ରୁ ଅଧିକ ବିଷାକ୍ତ ସାପକୁ ଧରୁଛନ୍ତି। ଏବଂ ସେହିସବୁ ସାପର ବିଷ ତାଙ୍କ ଦେହରେ ପ୍ରବେଶ କରାଉଛନ୍ତି।

ଆହୁରି ଆକର୍ଷଣୀୟ କଥା ହେଉଛି ଯେ ବୈଜ୍ଞାନିକମାନେ ଏହି ବ୍ୟକ୍ତିଙ୍କ ରକ୍ତରୁ ଏକ ପ୍ରତିଷେଧକ ପ୍ରସ୍ତୁତ କରିଛନ୍ତି, ଯାହା ବିଶ୍ୱର ସବୁଠାରୁ ବିଷାକ୍ତ ସାପ କାମୁଡ଼ିବା ପରେ ମଧ୍ୟ ଲୋକଙ୍କୁ ରକ୍ଷା କରିପାରିବ।

ଅଜବ ଘଟଣା: ଏହି ଅଜବ ଘଟଣା  ମସିହାରେ ଆରମ୍ଭ ହୋଇଥିଲା। ଯେତେବେଳେ ଆମେରିକାର କାଲିଫର୍ନିଆର ଜଣେ ଆତ୍ମଘୋଷିତ ସାପ ଏବଂ ବିଷ ବିଶେଷଜ୍ଞ ଟିମ୍ ସାପ କାମୁଡ଼ାରୁ ନିଜକୁ ରକ୍ଷା କରିବା ପାଇଁ ଉପାୟ ଅନୁସନ୍ଧାନ କରିବାକୁ ନିଷ୍ପତ୍ତି ନେଇଥିଲେ।

ତେଣୁ, ସେ ପ୍ରତିବର୍ଷ ସବୁଠାରୁ ଭୟଙ୍କର ସାପ ଦ୍ୱାରା ନିଜକୁ କାମୁଡ଼ି ପକାଉଥିଲେ, ଏହି ଆଶାରେ ଯେ ଦିନେ ସେ ଆଣ୍ଟିଭେନମ୍ ଖୋଜିବାରେ ସଫଳ ହେବେ, ଏବଂ ଏହାର ଫଳାଫଳ ଆଜି ସମଗ୍ର ବିଶ୍ୱ ସମ୍ମୁଖରେ ଅଛି।

ସିଏନଏନର ରିପୋର୍ଟ ଅନୁଯାୟୀ, ୫୭ ବର୍ଷୀୟ ଟିମ୍‌ଙ୍କ ରକ୍ତରେ ମିଳୁଥିବା ଆଣ୍ଟିବଡି ତାଙ୍କୁ ୧୯ଟି ବିଭିନ୍ନ ବିଷାକ୍ତ ସାପ କାମୁଡ଼ାରୁ ରକ୍ଷା କରିପାରିବ। ୨୦୧୭ ମସିହାରେ, ଇମ୍ୟୁନୋଲୋଜିଷ୍ଟ ଜ୍ୟାକବ୍ ଗ୍ଲାନବିଲ୍ ଟିମ୍‌ଙ୍କ ଆବିଷ୍କାର ବିଷୟରେ ଶୁଣିଲେ ଏବଂ ଏହା ଉପରେ କାମ କରିବା ଉଚିତ ବୋଲି ନିଷ୍ପତ୍ତି ନେଲେ।

ପ୍ରତିଷେଧକ: ଜାକବ ଟିମ୍‌କୁ କହିଲେ, ଏହା ଟିକେ ଅଦ୍ଭୁତ, କିନ୍ତୁ ତୁମେ ମୋତେ ତୁମର ରକ୍ତ ନମୁନା ଦେଇପାରିବ କି? ଏହାର ଉତ୍ତରରେ ଟିମ୍ କହିଲା, ମୁଁ ଏହା ପାଇଁ ଅପେକ୍ଷା କରିଥିଲି। ୮ ବର୍ଷ ପରେ, ବୈଜ୍ଞାନିକମାନେ ଏବେ ଘୋଷଣା କରିଛନ୍ତି ଯେ ସେମାନେ ଟିମ୍‌ଙ୍କ ରକ୍ତରୁ ଏକ ଆଣ୍ଟିଭେନମ୍ ପ୍ରସ୍ତୁତ କରିଛନ୍ତି, ଯାହା ଆପଣଙ୍କୁ ୧୯ଟି ବିଷାକ୍ତ ସାପଙ୍କଠାରୁ ରକ୍ଷା କରିପାରିବ।

ଯଦିଓ ଏହା ଏପର୍ଯ୍ୟନ୍ତ ମଣିଷ ଉପରେ ପରୀକ୍ଷଣ କରାଯାଇ ନାହିଁ, ବୈଜ୍ଞାନିକମାନେ ବିଶ୍ୱାସ କରନ୍ତି ଯେ ଏହା ପାରମ୍ପରିକ ଉପାୟରେ ପ୍ରସ୍ତୁତ ଆଣ୍ଟିଭେନମ୍ ଅପେକ୍ଷା ବହୁତ ଭଲ ପ୍ରମାଣିତ ହୋଇପାରେ।

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଅନୁଯାୟୀ, ପ୍ରତିବର୍ଷ ବିଷାକ୍ତ ସାପ କାମୁଡ଼ା ଯୋଗୁଁ ସାରା ବିଶ୍ୱରେ ହଜାର ହଜାର ଲୋକ ମୃତ୍ୟୁବରଣ କରନ୍ତି ଏବଂ ଲକ୍ଷ ଲକ୍ଷ ଲୋକ ସ୍ଥାୟୀ ଭାବରେ ଅକ୍ଷମ ହୋଇଯାଆନ୍ତି।