୧୪ ବର୍ଷ ପୂର୍ବେ ହୋଇଥିଲା ବିବାହ, ଦୁଇ ସନ୍ତାନ ମଧ୍ୟ ଅଛନ୍ତି… ଏବେ କାହିଁକି ୱେଡିଂ କାର୍ଡ ବାଣ୍ଟୁଛନ୍ତି ଦମ୍ପତି ? କାରଣ ଆଶ୍ଚର୍ଯ୍ୟଜନକ

ନୂଆଦିଲ୍ଲୀ : ଉତ୍ତରାଖଣ୍ଡର ପିଥୌରାଗଡ଼ରେ ଏକ ଦମ୍ପତି ନିଜ ବିବାହ କାର୍ଡ ବାଣ୍ଟୁଥିବା ଖବର ସାମ୍ନାକୁ ଆସିଛି। ଆଶ୍ଚର୍ଯ୍ୟଜନକ କଥା ହେଉଛି, ଏହି ଦମ୍ପତିଙ୍କ ବିବାହ ୧୪ ବର୍ଷ ପୂର୍ବେ ୨୦୧୦ରେ ହୋଇଥିଲା ଏବଂ ସେମାନଙ୍କର ଦୁଇ ଝିଅ ମଧ୍ୟ ଅଛନ୍ତି। ଏହି ଦମ୍ପତିଙ୍କ ନାମ ହେଉଛି ପ୍ରଦୀପ ତିୱାରୀ ଓ ଦୀପିକା। ସେମାନଙ୍କର ବଡ଼ ଝିଅ କାମାକ୍ଷୀ ନବମ ଶ୍ରେଣୀରେ ଏବଂ ଛୋଟ ଝିଅ ହିତାକ୍ଷୀ ଅଷ୍ଟମ ଶ୍ରେଣୀରେ ପଢୁଛନ୍ତି। ତେବେ ୧୪ ବର୍ଷ ପରେ ଏହି ଦମ୍ପତି କାହିଁକି ନିଜ ବିବାହ କାର୍ଡ ବାଣ୍ଟୁଛନ୍ତି? ଏହାର କାରଣ ଜାଣିଲେ ଆପଣ ଆଶ୍ଚର୍ଯ୍ୟ ହେବେ।

ଏହାର ମୂଳ କାରଣ ହେଉଛି ଉତ୍ତରାଖଣ୍ଡରେ ଲାଗୁ ହୋଇଥିବା ସମାନ ନାଗରିକ ସଂହିତା (UCC)। ଏହି ନିୟମ ଅନୁସାରେ, ୨୦୧୦ ପରେ ବିବାହ କରିଥିବା ସମସ୍ତ ଦମ୍ପତିଙ୍କୁ ନିଜ ବିବାହର ପଞ୍ଜୀକରଣ କରାଇବା ବାଧ୍ୟତାମୂଳକ କରାଯାଇଛି। ପଞ୍ଜୀକରଣ ପାଇଁ ଦମ୍ପତିଙ୍କୁ ବିବାହର ପ୍ରମାଣ ଭାବେ ପୁରୁଣା ବିବାହ କାର୍ଡ କିମ୍ବା ଶପଥ ପତ୍ର ଦାଖଲ କରିବାକୁ ପଡ଼ିବ। ପ୍ରଦୀପ ଓ ଦୀପିକାଙ୍କ ପାଖରେ ସେମାନଙ୍କର ପୁରୁଣା ବିବାହ କାର୍ଡ ନ ଥିବାରୁ ସେମାନେ ପୁରୁଣା ତାରିଖ (ବ୍ୟାକ ଡେଟ) ସହିତ ନୂଆ କାର୍ଡ ଛପାଇ ପଞ୍ଜୀକରଣ ପ୍ରକ୍ରିୟା ପୂରଣ କରୁଛନ୍ତି।

ପିଥୌରାଗଡ଼ ସମେତ ଅନ୍ୟ ଅଞ୍ଚଳରେ ମଧ୍ୟ ଅନେକ ଦମ୍ପତି ଏହି ସମସ୍ୟାର ସମ୍ମୁଖୀନ ହେଉଛନ୍ତି। ଅନେକଙ୍କ ପାଖରେ ପୁରୁଣା କାର୍ଡ ନାହିଁ, ତେଣୁ ସେମାନେ ନୂଆ କାର୍ଡ ଛପାଉଛନ୍ତି। ସମାନ ନାଗରିକ ସଂହିତା ଲାଗୁ ହେବା ପରେ ଉତ୍ତରାଖଣ୍ଡରେ ବିବାହ ପଞ୍ଜୀକରଣର ସଂଖ୍ୟା ବୃଦ୍ଧି ପାଇଛି। ଏପର୍ଯ୍ୟନ୍ତ UCC ପୋର୍ଟାଲରେ ୧,୩୩,୧୦୫ ବିବାହ ପଞ୍ଜୀକରଣ ହୋଇସାରିଛି। ସରକାରୀ କର୍ମଚାରୀ ଓ ଅନ୍ୟ ସେବା ସହ ଜଡ଼ିତ ବ୍ୟକ୍ତିମାନେ ଏହି ପଞ୍ଜୀକରଣ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଚେଷ୍ଟା କରୁଛନ୍ତି, କାରଣ ନିୟମ ଅନୁସାରେ ପଞ୍ଜୀକରଣ ନ କରାଇଲେ ଜୋରିମାନା ଲାଗୁ ହେବ।

କମନ ସର୍ଭିସ ସେଣ୍ଟର (CSC) ଗୁଡ଼ିକରେ ବିବାହ ପଞ୍ଜୀକରଣ ପାଇଁ ଭିଡ଼ ଦେଖାଦେଇଛି। ଅନେକ CSC ବିବାହ କାର୍ଡ ସହିତ ପୁରୋହିତ ଆଦିର ବ୍ୟବସ୍ଥା ମଧ୍ୟ କରୁଛନ୍ତି, ଯେଉଁଥିପାଇଁ ଲୋକଙ୍କୁ ଅତିରିକ୍ତ ଶୁଳ୍କ ଦେବାକୁ ପଡ଼ୁଛି। ଶପଥ ପତ୍ର ନେବା ଏକ ବିକଳ୍ପ ହେଲେ ମଧ୍ୟ, ଲୋକେ କାର୍ଡକୁ ଅଧିକ ପସନ୍ଦ କରୁଛନ୍ତି, କାରଣ ଏହା ସହଜ ଓ ପାରମ୍ପରିକ ପ୍ରମାଣ ଭାବେ ଗ୍ରହଣୀୟ।