ବେଦୀ ଉପରେ କନିଆଁଙ୍କୁ ମାଡ଼ ମାରି, ବରକୁ ଅପହରଣ କରିନେଲେ ବାଜା ବାଲା

ବିହାର:  ବିବାହ କାର୍ଯ୍ୟକ୍ରମରେ ଆଶ୍ଚର୍ଯ୍ୟକର ଘଟଣା। ବାହା ବେଦୀ ଉପରେ କନିଆଁଙ୍କୁ ମାଡ଼ ମାରିବା ସହ ବରକୁ ଅପହରଣ କରିନେଲେ ବ୍ୟାଣ୍ଡ ବାଜା ବାଲା। ବର ପକ୍ଷରୁ ନାଚ ଗୀତ କରିବାକୁ ଅଣାଯାଇଥିବା ବ୍ୟାଣ୍ଡ ପାର୍ଟିର ନାରକୀୟ କାଣ୍ଡ।

ଝିଅ ଘରେ ପଶି ସୁନା ଗହଣା ଲୁଟିଲେ। ସ୍ଥାନୀୟ ଲୋକଙ୍କୁ ମାଡ ମାରି ଲହୁ ଲୁହାଣ କଲେ। କନିଆଙ୍କ ମାଆ ସମେତ କନିଆଙ୍କୁ ମାଡ଼ ମାରି ଆହତ କଲେ। ପରେ ବେଦୀ ଉପରୁ ବରକୁ ମାଡ଼ ମାରିବା ସହ ଅପହରଣ କରିନେଲେ।

ବାହା ମଣ୍ଡପରେ ଅଘଟଣ: ତେବେ ଏପରି ଏକ ଚାଞ୍ଚଲ୍ୟକର ଦୃଶ୍ୟ ଦେଖିବାକୁ ମିଳିଛି ବିହାରର ଗୋପାଳଗଞ୍ଜ ଜିଲ୍ଲାରେ। ନଗର ଥାନା ଅଞ୍ଚଳର ସାଧୁ ଚୌକ ଅଞ୍ଚଳରେ ଏକ ବିବାହ ଉତ୍ସବ ଚାଲିଥିଲା। ଘଟଣାଟି ଶୁକ୍ରବାର ରାତି ପ୍ରାୟ ୨ଟା ସମୟର।

ବୈକୁଣ୍ଠପୁର ଥାନା ଅଞ୍ଚଳର ଦିଘା ଦୁବାଉଲିରୁ ସୁରେନ୍ଦ୍ର ଶର୍ମାଙ୍କ ପୁଅର ବିବାହ ଶୋଭାଯାତ୍ରା ଆସିଥିଲା। ବିବାହ ଅତିଥିମାନଙ୍କ ମନୋରଞ୍ଜନ ପାଇଁ, ପୁଅ ପକ୍ଷ ଦ୍ୱାରା ଏକ ବ୍ୟାଣ୍ଡ ପାର୍ଟିର ଆୟୋଜନ କରାଯାଇଥିଲା।

ଗୀତ ଗାଇବା ଏବଂ ନାଚ କରିବା ସମୟରେ, କୌଣସି କଥାକୁ ନେଇ ବିବାଦ ସୃଷ୍ଟି ହୋଇଥିଲା। ଯାହା ସଙ୍ଗେ ସଙ୍ଗେ ଏକ ଆକ୍ରମଣାତ୍ମକ ରୂପ ନେଇଥିଲା। ସୂଚନାନୁସାରେ, ଝଗଡ଼ା ହେବା ସମୟର ବ୍ୟାଣ୍ଡ ପାର୍ଟିର କିଛି ସଦସ୍ୟ ଝିଅର ଘରେ ପଶି ସ୍ଥାନୀୟ ଲୋକଙ୍କୁ ମାଡ଼ ମାରିଥିଲେ।

ବରକୁ ଅପହରଣ:  ଏହି ଆକ୍ରମଣରେ ବଧୂ ଏବଂ ତାଙ୍କ ମାଆଙ୍କ ସମେତ ଅନେକ ମହିଳା ଆହତ ହୋଇଥିଲେ। ଆକ୍ରମଣକାରୀମାନେ ଘରେ ପଶି ଅଳଙ୍କାର ଏବଂ ମୂଲ୍ୟବାନ ଜିନିଷପତ୍ର ମଧ୍ୟ ଲୁଟି ନେଇଥିଲେ।

ବିବାଦ ଏତେ ବଢିଯାଇଥିଲା କି, ଅଭିଯୁକ୍ତମାନେ ମଣ୍ଡପରେ ବସିଥିବା ବରକୁ ମଧ୍ୟ ଛାଡି ନଥିଲେ ଏବଂ ତାଙ୍କୁ ମାଡ଼ ମାରିବା ପରେ, ଜୋରଜବରଦସ୍ତ ଗାଡ଼ିରେ ବସାଇ ଅପହରଣ କରି ନେଇଗଲେ।

ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ନଗର ପୋଲିସ ଘଟଣାସ୍ଥଳରେ ପହଞ୍ଚିଥିଲା, କିନ୍ତୁ ସେତେବେଳକୁ ଅଭିଯୁକ୍ତମାନେ ଖସି ପଳାଇ ଯାଇଥିଲେ। ବର ଜଣକ ଏଯାଏଁ ନିଖୋଜ ଅଛନ୍ତି।

ସବୁ ବଦଳିଗଲା: ଏହି ଘଟଣା ପରେ ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳିଗଲା ଏବଂ ବିବାହ ପରିବେଶ ସମ୍ପୂର୍ଣ୍ଣ ଶୋକରେ ପରିଣତ ହୋଇଗଲା। ଏହି ମାମଲା ସମ୍ପର୍କରେ ସଦର ଏସଡିପିଓ ପ୍ରାଞ୍ଜଲ ତ୍ରିପାଠୀ କହିଛନ୍ତି ଯେ ପୋଲିସ ଏହି ମାମଲାକୁ ଗମ୍ଭୀରତାର ସହ ତଦନ୍ତ କରୁଛି।

ବରକୁ ସୁରକ୍ଷିତ ଭାବରେ ଛାଡିବା ପାଇଁ ଗୋପାଳଗଞ୍ଜ ସହିତ ବରୌଲି ଏବଂ ସିୱାନ ପୋଲିସର ମଧ୍ୟ ସାହାଯ୍ୟ ନିଆଯାଉଛି। କିନ୍ତୁ, ଏଯାଏଁ ବର ପତ୍ତା ମିଳିପାରିନାହିଁ। ଯାହା ଫଳରେ କନ୍ୟା ପକ୍ଷରେ ବିଶୃଙ୍ଖଳା ଦେଖାଦେଇଛି। ପୋଲିସ ଅଭିଯୁକ୍ତଙ୍କୁ ଗିରଫ କରିବା ଏବଂ ବରକୁ ଶୀଘ୍ର ଉଦ୍ଧାର କରିବା ପାଇଁ ପ୍ରତିଶ୍ରୁତି ଦେଇଛି।