ବଦଳିଲା ୮ମ ଶ୍ରେଣୀ NCERT ସାମାଜିକ ବିଜ୍ଞାନ ପାଠ୍ୟପୁସ୍ତକ: ମୋଗଲମାନଙ୍କର ‘ନିଷ୍ଠୁରତା’ ଉପରେ ଆଲୋକପାତ
ନୂଆଦିଲ୍ଲୀ: ନ୍ୟାସନାଲ କାଉନସିଲ ଅଫ ଏଜୁକେସନାଲ ରିସର୍ଚ ଆଣ୍ଡ ଟ୍ରେନିଂ (NCERT) ଦ୍ୱାରା ପ୍ରକାଶିତ ନୂତନ ୮ମ ଶ୍ରେଣୀ ସାମାଜିକ ବଜ୍ଞାନ ପାଠ୍ୟପୁସ୍ତକ ‘ଏକ୍ସପ୍ଲୋରିଂ ସୋସାଇଟି: ଇଣ୍ଡିଆ ଆଣ୍ଡ ବିୟୋଣ୍ଡ’ରେ ଦିଲ୍ଲୀ ସୁଲତାନୀ ଓ ମୋଗଲ ଶାସନ ସମୟରେ ‘ଧାର୍ମିକ ଅସହିଷ୍ଣୁତା’ ଏବଂ ‘ନିଷ୍ଠୁରତା’ର ଅନେକ ଉଦାହରଣ ଉଲ୍ଲେଖ କରାଯାଇଛି। ଏହି ପାଠ୍ୟପୁସ୍ତକଟି ଚଳିତ ଶିକ୍ଷା ବର୍ଷରେ ବ୍ୟବହାର ପାଇଁ ପ୍ରକାଶିତ ହୋଇଛି।
ପୁସ୍ତକରେ ବାବରଙ୍କୁ “ନିଷ୍ଠୁର ଓ ନିର୍ଦ୍ଦୟ ବିଜେତା” ଭାବେ ବର୍ଣ୍ଣନା କରାଯାଇଛି, ଯିଏ ସମଗ୍ର ସହରର ଜନସଂଖ୍ୟାକୁ ହତ୍ୟା କରିଥିଲେ। ଅକବରଙ୍କ ଶାସନକୁ “ନିଷ୍ଠୁରତା ଓ ସହିଷ୍ଣୁତାର ମିଶ୍ରଣ” ଏବଂ ଔରଙ୍ଗଜେବଙ୍କୁ ମନ୍ଦିର ଓ ଗୁରୁଦ୍ୱାର ଧ୍ୱଂସକାରୀ ଭାବେ ଉଲ୍ଲେଖ କରାଯାଇଛି। ୧୩ଶ ରୁ ୧୭ଶ ଶତାବ୍ଦୀ ମଧ୍ୟରେ ଭାରତୀୟ ଇତିହାସକୁ ନେଇ ଲିଖିତ ଅଧ୍ୟାୟ ‘ରିସେପିଂ ଇଣ୍ଡିଆସ ପଲିଟିକାଲ ମ୍ୟାପ’ରେ ଦିଲ୍ଲୀ ସୁଲତାନୀ, ମୋଗଲ, ବିଜୟନଗର ସାମ୍ରାଜ୍ୟ ଏବଂ ଶିଖମାନଙ୍କ ଉତ୍ଥାନ ବିଷୟରେ ଆଲୋଚନା କରାଯାଇଛି। ଏଥିରେ ସୁଲତାନୀ ଶାସନ ସମୟକୁ ରାଜନୈତିକ ଅସ୍ଥିରତା ଏବଂ ସାମରିକ ଅଭିଯାନର ସମୟ ଭାବେ ବର୍ଣ୍ଣନା କରାଯାଇଛି, ଯେଉଁଥିରେ ଗାଁ ଓ ସହର ଲୁଟପାଟ ହୋଇଥିଲା ଏବଂ ମନ୍ଦିମାନଙ୍କୁ ଧ୍ୱଂସ କରାଯାଇଥିଲା।
NCERT କହିଛି ଯେ ଏହି ଘଟଣାଗୁଡ଼ିକୁ ‘ନୋଟ ଅନ ସମ ଡାର୍କର ପିରିୟଡସ ଇନ ହିଷ୍ଟ୍ରୀ’ ମାଧ୍ୟମରେ ବ୍ୟାଖ୍ୟା କରାଯାଇଛି। ଏକ ସତର୍କତା ନୋଟ ମଧ୍ୟ ସାମିଲ କରାଯାଇଛି, ଯେଉଁଥିରେ କୁହାଯାଇଛି ଯେ “ଅତୀତର ଘଟଣା ପାଇଁ ଆଜି କାହାକୁ ଦାୟୀ କରାଯିବା ଉଚିତ ନୁହେଁ।” ଏହି ନୋଟରେ ଏକ ସନ୍ତୁଳିତ ଓ ପ୍ରମାଣ-ଆଧାରିତ ଐତିହାସିକ ବିବରଣୀ ଉପସ୍ଥାପନ କରାଯାଇଛି, ଯାହା ଇତିହାସକୁ ସଂଶୋଧନ ନକରି ଏକ ସୁନ୍ଦର ଭବିଷ୍ୟତ ପାଇଁ ଶିକ୍ଷା ଗ୍ରହଣ କରିବାକୁ ଉଦ୍ଦେଶ୍ୟ ରଖିଛି।
ପୂର୍ବ ବର୍ଷମାନଙ୍କରେ ଦିଲ୍ଲୀ ସୁଲତାନୀ ଓ ମୋଗଲ ଇତିହାସ ୭ମ ଶ୍ରେଣୀରେ ପଢ଼ାଯାଉଥିଲା, କିନ୍ତୁ ନୂତନ ପାଠ୍ୟକ୍ରମ ଅନୁସାରେ ଏହା ଏବେ ୮ମ ଶ୍ରେଣୀରେ ସ୍ଥାନାନ୍ତରିତ ହୋଇଛି। ପୁସ୍ତକରେ ମନ୍ଦିର ଉପରେ ଆକ୍ରମଣ ଏବଂ କେତେକ ମୋଗଲ ଶାସକମାନଙ୍କର ନିଷ୍ଠୁରତା ବିଷୟରେ ଏକାଧିକ ଉଲ୍ଲେଖ ରହିଛି, ଯାହା ପୂର୍ବତନ ୭ମ ଶ୍ରେଣୀ ପାଠ୍ୟପୁସ୍ତକରେ ଉଲ୍ଲେଖ ନଥିଲା। NCERT କହିଛି ଯେ ଏହି ବିବରଣୀ ଜାତୀୟ ଶିକ୍ଷା ନୀତି (NEP) ୨୦୨୦ ଏବଂ ନ୍ୟାସନାଲ କରିକୁଲମ ଫ୍ରେମୱାର୍କ ଫର ସ୍କୁଲ ଏଜୁକେସନ (NCF-SE) ୨୦୨୩ ଅନୁସାରେ ନୂତନ ପାଠ୍ୟକ୍ରମ, ଡିଜାଇନ ଏବଂ ଶିକ୍ଷଣ ପଦ୍ଧତି ଉପରେ ଆଧାରିତ।
ଏହି ପରିବର୍ତ୍ତନ ସୋସିଆଲ ମିଡିଆରେ ମଧ୍ୟ ଚର୍ଚ୍ଚାର ବିଷୟ ହୋଇଛି। ଜଣେ ଏକ୍ସ ବ୍ୟବହାରକାରୀ ଏହାକୁ ଉଲ୍ଲେଖ କରି କହିଛନ୍ତି ଯେ NCERTର ଏହି ନୂତନ ପଦକ୍ଷେପ ଇତିହାସର ଏକ ସନ୍ତୁଳିତ ଦୃଷ୍ଟିକୋଣ ପ୍ରଦାନ କରୁଛି। ତେବେ, NCERT ସ୍ପଷ୍ଟ କରିଛି ଯେ ଏହି ବିବରଣୀ ଐତିହାସିକ ତଥ୍ୟ ଉପରେ ଆଧାରିତ ଏବଂ ଏହାର ଉଦ୍ଦେଶ୍ୟ କେବଳ ଶିକ୍ଷାର୍ଥୀମାନଙ୍କୁ ଇତିହାସର ଗୁରୁତ୍ୱପୂର୍ଣ୍ଣ ଶିକ୍ଷା ପ୍ରଦାନ କରିବା।
ଏହି ପାଠ୍ୟପୁସ୍ତକର ଦ୍ୱିତୀୟ ଭାଗ ମଧ୍ୟ ଏହି ବର୍ଷ ମଧ୍ୟରେ ପ୍ରକାଶିତ ହେବାକୁ ଥିବାବେଳେ, ଏହା ସମସ୍ତ ବିଷୟକୁ ଆଲୋଚନା କରୁଛି ଯେପରି ଇତିହାସ, ଭୂଗୋଳ ଏବଂ ନାଗରିକ ଶାସ୍ତ୍ର। ଏହି ନୂତନ ପାଠ୍ୟକ୍ରମ ଶିକ୍ଷାର୍ଥୀମାନଙ୍କୁ ଭାରତୀୟ ଇତିହାସର ଏକ ଗଭୀର ଓ ସନ୍ତୁଳିତ ଦୃଷ୍ଟିକୋଣ ପ୍ରଦାନ କରିବାକୁ ଲକ୍ଷ୍ୟ ରଖିଛି।