ପୂର୍ବତନ କ୍ରିକେଟର ସୁରେଶ ରାଇନାଙ୍କ ବଢ଼ିଲା ସମସ୍ୟା, ଏହି ମାମଲାରେ ସମନ ପଠାଇଲା ED
ସୁରେଶ ରାଇନାଙ୍କୁ ଇଡି ସମନ ।
ନୂଆଦିଲ୍ଲୀ: ଭାରତୀୟ ଦଳର ପୂର୍ବତନ ଅଭିଜ୍ଞ ବ୍ୟାଟସମ୍ୟାନ୍ ସୁରେଶ ରାଇନା ଏବେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ର ରାଡାରକୁ ଆସିଛନ୍ତି । ଅବୈଧ ବେଟିଂ ପ୍ଲାଟଫର୍ମ ଉପରେ ଚାଲିଥିବା ତଦନ୍ତ ସହିତ ଜଡିତ ତାଙ୍କୁ ଅଗଷ୍ଟ ୧୩ ଅର୍ଥାତ ଆଜି ଦିଲ୍ଲୀ କାର୍ଯ୍ୟାଳୟକୁ ସମନ କରାଯାଇଛି ।
ବେଟିଂ ଆପ୍ 1xBet ମାମଲାରେ ED ସୁରେଶ ରାଇନାଙ୍କ ବୟାନ ରେକର୍ଡ କରିବ । ପୂର୍ବରୁ ମୁମ୍ବାଇ ED ଟିମ୍ ‘Parimatch’ ନାମକ ବେଟିଂ ଆପ୍ ପଛରେ ଥିବା ରାକେଟ ବିଷୟରେ ଅଧିକ ସୂଚନା ପାଇବା ପାଇଁ ମୁମ୍ବାଇ, ଦିଲ୍ଲୀ-NCR, ହାଇଦ୍ରାବାଦ, ଜୟପୁର, ମାଦୁରାଇ ଏବଂ ସୁରଟରେ ୧୫ଟି ସ୍ଥାନରେ ତଲାସି କରିଥିଲା। ମୁମ୍ବାଇର ସାଇବର ପୋଲିସ ଷ୍ଟେସନ ଦ୍ୱାରା ୨୦୨୪ ମସିହାରେ ପଞ୍ଜିକୃତ ଏକ ମାମଲା ଆଧାରରେ ଏହି ତଦନ୍ତ ଆରମ୍ଭ ହୋଇଛି ।
କଣ ରହିଛି ମାମଲା- ପୂର୍ବତନ ଟିମ୍ ଇଣ୍ଡିଆ ଖେଳାଳି ସୁରେଶ ରାଇନା ବଡ଼ ଅସୁବିଧାରେ ପଡ଼ିଥିବା ଜଣାପଡ଼ିଛି । ଇଡି ତାଙ୍କୁ ସମନ ପଠାଇ ହାଜର ହେବାକୁ କହିଛି । ରିପୋର୍ଟ ଅନୁଯାୟୀ, ତାଙ୍କ ଉପରେ ଏକ ବେଟିଂ ଆପ୍ ପ୍ରୋତ୍ସାହନ ଦେବାର ଅଭିଯୋଗ ଅଛି ।
ଗତ ବର୍ଷ ଡିସେମ୍ବରରେ, ବେଟିଂ ଆପ୍ 1xBet ସୁରେଶ ରାଇନାଙ୍କୁ ଏହାର ବ୍ରାଣ୍ଡ ଆମ୍ବାସାଡର କରିଥିଲା। ଏହି ସମୟ ମଧ୍ୟରେ ଏହା କହିଥିଲା ଯେ ରାଇନାଙ୍କ ସହିତ ଆମର ସହଭାଗୀତା କ୍ରୀଡା ବେଟିଂ ପ୍ରଶଂସକମାନଙ୍କୁ ଦାୟିତ୍ୱର ସହ ବାଜି ଲଗାଇବାକୁ ଉତ୍ସାହିତ କରିବ ।
କେନ୍ଦ୍ର ସରକାର ଏହି ଆପକୁ ବ୍ୟାନ କରିଥିଲେ । କିନ୍ତୁ ଏହା ସତ୍ତ୍ୱେ, ଏମାନେ ସମସ୍ତେ ଭିନ୍ନ ଭିନ୍ନ ନାମରେ କାମ କରୁଛନ୍ତି । ରିପୋର୍ଟ ଅନୁଯାୟୀ, ଏହି ପ୍ଲାଟଫର୍ମଗୁଡ଼ିକ ଉପରେ ନିଷେଧ ସତ୍ତ୍ୱେ, ସେଲିବ୍ରିଟି ପ୍ରମୋସନ୍ ଯୋଗୁଁ ଏମାନେ ଲୋକପ୍ରିୟତା ହାସଲ କରିଥିଲେ । ଏହି ମାମଲାରେ ସୁରେଶ ରାଇନାଙ୍କ ନାମ ଆସିଛି । ସେ ଏଗୁଡ଼ିକୁ ପ୍ରମୋଟ୍ ମଧ୍ୟ କରିଥିଲେ ।
ବେଟିଂ ଆପ୍ ଏତେ କୋଟି ଟଙ୍କା ରୋଜଗାର କରିଥିଲା- ତଦନ୍ତରୁ ଜଣାପଡିଛି ଯେ ଏହି ପ୍ଲାଟଫର୍ମଗୁଡ଼ିକ ପ୍ରାୟ ୨୦୦୦ କୋଟି ଟଙ୍କା ରୋଜଗାର କରିଛନ୍ତି । ରିପୋର୍ଟ ଅନୁଯାୟୀ, ତାମିଲନାଡୁର ଏକ ଅଞ୍ଚଳରେ କ୍ରିପ୍ଟୋ ୱାଲେଟ୍, ଏଟିଏମ୍ ମାଧ୍ୟମରେ ଏହି ପରିମାଣ ଛୋଟ ପରିମାଣରେ ଉଠାଯାଇଛି ।
ସମ୍ପ୍ରତି, ଖବର ଆସିଥିଲା ଯେ ଇଡି ପୂର୍ବତନ ଟିମ୍ ଇଣ୍ଡିଆ କ୍ରିକେଟର ସୁରେଶ ରାଇନା, ହରଭଜନ ସିଂହ ଏବଂ ଯୁବରାଜ ସିଂହଙ୍କୁ ବେଟିଂ ଆପ୍ ପ୍ରମୋଟ୍ କରିବା ପାଇଁ ନୋଟିସ୍ ପଠାଇବାକୁ ନିଷ୍ପତ୍ତି ନେଇଛି, କାରଣ ଏହି ଖେଳାଳିମାନେ ସୋସିଆଲ ମିଡିଆରେ ବିଭିନ୍ନ ଆପ୍ ପ୍ରମୋଟ୍ କରୁଥିବା ଦେଖାଯାଉଛି ।