IND vs PAK: ହାତ ନମିଳାଇବା ବିବାଦ ପରେ ଆଜି ପ୍ରଥମ ଥର ପାଇଁ ମଇଦାନରେ ଆମ୍ନାସାମ୍ନା ହେବେ ଭାରତ-ପାକିସ୍ତାନ, ପ୍ରତିଶୋଧ ଲକ୍ଷ୍ୟରେ ପାକ୍ ବାହିନୀ
ସୁପର ସଣ୍ଡେରେ ହେବ ସୁପର ମୁକାବିଲା। ସମାନ ପିଚ୍ ଆଉ ସମାନ ଟାଇମ୍। ଲଢ଼େଇ ହେବ ଜୋରଦାର।
ଓଡିଶାଭାସ୍କର: ୨୦୨୫ ଏସିଆ କପରେ ସୁପର ଫୋର୍ ମ୍ୟାଚ୍ ଆରମ୍ଭ ହୋଇଛି। ଆଉ ଏହି ମ୍ୟାଚରେ ଆଜି ଭାରତ ଓ ପାକିସ୍ତାନ ମଧ୍ୟରେ ହେବ ମହାମୁକାବିଲା।
ଲିଗ୍ ପର୍ଯ୍ୟାୟରେ ମ୍ୟାଚ୍ ଶେଷ ହେବା ପରେ ଭାରତ ପାକିସ୍ତାନ ସହ ହାତ ନମିଳାଇବା ବିବାଦ ପରେ ଆଜି ପୁଣି ଥରେ ଏବଂ ପ୍ରଥମ ଥର ପାଇଁ ମୁହାଁମୁହିଁ ହେବେ ଦୁଇ ଚିର ପ୍ରତିଦ୍ୱନ୍ଦୀ ଦଳ।
ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ହେବ ସୁପର୍ ସଣ୍ଡେରେ ସୁପର୍ ମୁକାବିଲା। ଆଜି ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ଦୁବାଇରେ ରାତି ୮ଟାରେ ପୁଣି ହେବେ ମୁହାଁମୁହିଁ।
ଦ୍ୱିତୀୟ ଥର ପାଇଁ ମୁହାଁମୁହିଁ ହେବେ ଭାରତ ଓ ପାକିସ୍ତାନ। ଲିଗ୍ ପର୍ଯ୍ୟାୟରେ ୭ ଓ୍ୱିକେଟରେ ଜିତିଥିଲା ଭାରତ। ପୁଣି ଜିତିବା ଲକ୍ଷ୍ୟରେ ମଇଦାନକୁ ଓହ୍ଲାଇବ ଟିମ୍ ଇଣ୍ଡିଆ।
ପ୍ରତିଶୋଧ ନେବାକୁ ପଡିଆକୁ ଓହ୍ଲାଇବ ପାକିସ୍ତନ ଦଳ। ଉଭୟ ଦଳ ନିଜ ନିଜର କମାଲ୍ ଦେଖାଇବାକୁ ବେଶ୍ ବ୍ୟଗ୍ର ଅଛନ୍ତି। ଆଜିର ହାଇଭୋଲଟେଜ୍ ମ୍ୟାଚ୍ ଉପରେ ସାରା ବିଶ୍ୱର ନଜର ରହିଛି। ତଥାପି ଦୁବାଇରେ ହେବାକୁ ଥିବା ଏହି ମ୍ୟାଚ୍ ରେ ଟସ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରେ।
ଦୁବାଇର ରେକର୍ଡକୁ ନେଇ ଉଭୟ ଦଳ ଚିନ୍ତାରେ: ଭାରତ ଏବଂ ପାକିସ୍ତାନ ସେପ୍ଟେମ୍ବର ୨୧ ତାରିଖ ଅର୍ଥାତ୍ ଆଜି ଦୁବାଇରେ ପରସ୍ପରର ସାମ୍ନା କରିବେ। ଟସ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ, କାରଣ ଦ୍ୱିତୀୟରେ ବ୍ୟାଟିଂ କରୁଥିବା ଦଳ ପ୍ରାୟତଃ ଏହି ପିଚ୍ ରେ ମ୍ୟାଚ୍ ଜିତନ୍ତି। ଏହାକୁ ବିଚାର କରି ଉଭୟ ଦଳ ଟସ୍ ଜିତିବା ପରେ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇପାରନ୍ତି।
ଭାରତ ଏବଂ ପାକିସ୍ତାନ ଏହି ଗ୍ରାଉଣ୍ଡରେ ଏପର୍ଯ୍ୟନ୍ତ ଚାରୋଟି ଟି-୨୦ ମ୍ୟାଚ୍ ଖେଳିଛନ୍ତି। ପ୍ରତ୍ୟେକଟିରେ ପିଛା କରୁଥିବା ଦଳ ବିଜୟୀ ହୋଇଛି।
ଏହି ଟୁର୍ଣ୍ଣାମେଣ୍ଟର ଲିଗ୍ ମ୍ୟାଚ୍ରେ ଏହା ସ୍ପଷ୍ଟ ହୋଇଥିଲା, ଯେତେବେଳେ ପିଛା କରୁଥିବା ଟିମ୍ ଇଣ୍ଡିଆ ପାକିସ୍ତାନ ବିପକ୍ଷରେ ସାତ ୱିକେଟରେ ବିଜୟୀ ହୋଇଥିଲା। ଏହି ପିଚ୍ରେ କେବେବି ୧୮୫ ରନ୍ ର ଟାର୍ଗେଟ ପିଛା କରାଯାଇ ନାହିଁ।
ବିବାଦ ପରେ ଆମ୍ନାସାମ୍ନା: ହାତ ମିଳାଇବା ବିବାଦ ପରେ ଦୁଇ ଦଳ ପ୍ରଥମ ଥର ପାଇଁ ପରସ୍ପରର ସାମ୍ନା କରିବେ। ଟିମ୍ ଇଣ୍ଡିଆ ଏହି ଟୁର୍ଣ୍ଣାମେଣ୍ଟରେ ଏପର୍ଯ୍ୟନ୍ତ କୌଣସି ମ୍ୟାଚ୍ ହାରିନାହିଁ।
ସେମାନେ ସୁପର ଫୋର୍ରେ ଏହି ବିଜୟ ଧାରା ଜାରି ରଖିବାକୁ ଚେଷ୍ଟା କରିବେ। ଏସିଆ କପ୍ ୨୦୨୫ ଲିଗ୍ ମ୍ୟାଚ୍ରେ ଟିମ୍ ଇଣ୍ଡିଆ ବିପକ୍ଷରେ ପ୍ରଥମେ ବ୍ୟାଟିଂ କରି ପାକିସ୍ତାନ ୯ ୱିକେଟ୍ ହରାଇ ୧୨୭ ରନ୍ କରିଥିଲା।
ଭାରତ ଏହି ଟାର୍ଗେଟକୁ ୧୫.୫ ଓଭରରେ ୩ ୱିକେଟ ହରାଇ ହାସଲ କରିନେଇଥିଲା। ଏବେ ପାକିସ୍ତାନ ଏହି ପରାଜୟର ପ୍ରତିଶୋଧ ନେବାକୁ ବ୍ୟାକୁଳ ହେବ।
ତଥାପି ଭାରତୀୟ ଦଳ ବର୍ତ୍ତମାନ ଉତ୍କୃଷ୍ଟ ଫର୍ମରେ ଅଛି। ୨୦୨୪ରେ ଟି-୨୦ ବିଶ୍ୱକପ୍ ଜିତିବା ପରଠାରୁ ଟିମ୍ ଇଣ୍ଡିଆ କୌଣସି ଟି-୨୦ ସିରିଜ୍ ହାରିନାହିଁ।
ଏହି ସମୟ ମଧ୍ୟରେ ଭାରତ ମୋଟ ୨୩ଟି ମ୍ୟାଚ୍ ଖେଳିଛି ଏବଂ କେବଳ ୩ଟିରେ ହାରିଛି। ଏହାକୁ ଦୃଷ୍ଟିରେ ରଖି ପାକିସ୍ତାନକୁ ଜିତିବା ପାଇଁ ଭଲ ପ୍ରଦର୍ଶନ କରିବାକୁ ପଡିବ।