ମନି ଲଣ୍ଡ୍ରିଂ ମାମଲାରେ ଗିରଫ ହୋଇଥିବା ଅନିଲ ଦେଶମୁଖ କିଏ? ଜାଣନ୍ତୁ ଏହି ବିଶେଷ ରିପୋର୍ଟରେ…
ମୁମ୍ବାଇ: ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖଙ୍କୁ ଗିରଫ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) । ତାଙ୍କ ଗିରଫଦାରୀ ସମ୍ପର୍କରେ ଇଡି ପକ୍ଷରୁ ସୂଚନା ଦିଆଯାଇଛି । ଇଡି କାର୍ଯ୍ୟାଳୟରୁ ମିଳିଥିବା ସୂଚନା ଅନୁସାରେ, ଅନିଲ ଦେଶମୁଖଙ୍କୁ ବଟି ଆଦାୟ ଓ ଅର୍ଥ ହେରଫେର ମାମଲାରେ ଗିରଫ କରାଯାଇଥିବା କୁହାଯାଇଛି । ଗିରଫ ସମ୍ପର୍କରେ ଇଡି କହିଛି ଯେ, ପଚରାଉଚରା ବେଳେ ସେ ତଦନ୍ତକାରୀ ସଂସ୍ଥା ସହ ସହଯୋଗ କରୁନାହାଁନ୍ତି । ଏଭଳି ପରିସ୍ଥିତିରେ ଅନିଲ ଦେଶମୁଖ କିଏ ଓ କେଉଁ ମାମଲାରେ ତାଙ୍କୁ ଗିରଫ କରାଯାଇଛି ତାହା ସମସ୍ତଙ୍କ ମନରେ ପ୍ରଶ୍ନ ଉଠିଛି । ତେବେ ସର୍ବପ୍ରଥମେ ଜାଣିବା ଅନିଲ ଦେଶମୁଖ କିଏ? ବହୁତ କମ୍ ଲୋକ ଅଛନ୍ତି ଯେଉଁମାନେ ତାଙ୍କ ବିଷୟରେ ଜାଣନ୍ତି । ତେବେ ଚାଲନ୍ତୁ ଜାଣିବା ସେ କିଏ ।
ଜାତୀୟତାବାଦୀ କଂଗ୍ରେସ ପାର୍ଟି (NCP)ର ନେତା ହେଉଛନ୍ତି ଅନୀଲ ଦେଶମୁଖ (Anil Deshmukh) । ଦେଶମୁଖ ଉଦ୍ଧବ ଠାକରେ (Uddhav Thackeray)ଙ୍କ ନେତୃତ୍ୱରେ ମହା ବିକାଶ ଅଘାଡି (Maha Vikas Aghadi) ମିଳିତ ସରକାରରେ ଗୃହମନ୍ତ୍ରୀ ରହିସାରିଛନ୍ତି । ବିଦର୍ଭ ଅଞ୍ଚଳ ସହ ସମ୍ପର୍କ ରଖୁଥିବା ଅନିଲ ଦେଶମୁଖ ମହାରାଷ୍ଟ୍ରର ନାଗପୁର ଜିଲ୍ଲାର କଟୋଲ ଅଞ୍ଚଳର ବାସିନ୍ଦା । କଟୋଲ ଅଞ୍ଚଳର ଲୋକଙ୍କ ମଧ୍ୟରେ ସେ ଜନପ୍ରିୟ ବୋଲି ମନେ କରାଯାଏ ।
ରାଜନୈତିକ କ୍ୟାରିୟର ଓ ଉଜ୍ଜ୍ୱଳ ଭବିଷ୍ୟତ
କଟୋଲ ଅଞ୍ଚଳର ବାସିନ୍ଦା ଅନିଲ ଦେଶମୁଖ (Anil Deshmukh) ୧୯୯୫ ମସିହାରେ ଏଠାରୁ ବିଧାନସଭା ନିର୍ବାଚନରେ ଏଣ୍ଟ୍ରି ମାରିଥିଲେ । ଦେଶମୁଖ ପ୍ରଥମ ଥର ପାଇଁ ସ୍ୱାଧୀନ ପ୍ରାର୍ଥୀ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ଜିତିବା ପରେ ବିଧାନସଭାରେ ପହଞ୍ଚିଥିଲେ । ଜନସାଧାରଣଙ୍କ ମଧ୍ୟରେ ଦେଶମୁଖ ଏତେ ଜନପ୍ରିୟ ଥିଲେ ଯେ ୧୯୯୯, ୨୦୦୪, ୨୦୦୯ ଏବଂ ୨୦୧୯ରେ ଅନୁଷ୍ଠିତ ନିର୍ବାଚନରେ ବିଜୟ ହାସଲ କରିଥିଲେ ଓ ପରେ ସେ ବିଧାନସଭାରେ ପହଞ୍ଚିଥିଲେ ।
PWD ରୁ ଗୃହମନ୍ତ୍ରୀ ହେବା ପର୍ଯ୍ୟନ୍ତ ଯାତ୍ରା
ଉଦ୍ଧବ ସରକାର ପୂର୍ବରୁ ଦେଶମୁଖ (Anil Deshmukh) ୨୦୦୪ରେ PWD ମନ୍ତ୍ରୀ ମଧ୍ୟ ଥିଲେ । ଏଥି ସହିତ ୨୦୦୯ରୁ ୨୦୧୪ ପର୍ଯ୍ୟନ୍ତ ସେ ତତ୍କାଳୀନ ମହାରାଷ୍ଟ୍ର ସରକାରରେ ମନ୍ତ୍ରୀ ଥିଲେ । ତେବେ ୨୦୧୪ ନିର୍ବାଚନରେ ସେ ୫୫୫୭ ଭୋଟରେ ହାରି ଯାଇଥିଲେ । ଏହା ପରେ ସେ ପୁଣିଥରେ ୨୦୧୯ରେ ଅନୁଷ୍ଠିତ ବିଧାନସଭା ନିର୍ବାଚନରେ ଜିତି ମହାରାଷ୍ଟ୍ର ସରକାରରେ ଗୃହମନ୍ତ୍ରୀ ହୋଇଥିଲେ ।
