ଦ୍ୱିତୀୟ ଦିନିକିଆରେ ବଦଳିପାରେ ଟିମ ଇଣ୍ଡିଆର ପ୍ଲାନ: ଏହି ଖେଳାଳି କରିପାରନ୍ତି ଏଣ୍ଟ୍ରି

ଅହମ୍ମଦାବାଦ: ୱେଷ୍ଟ-ଇଣ୍ଡିଜ ବିପକ୍ଷ ପ୍ରଥମ ଦିନିକିଆ ଜିତି ସିରିଜରେ ୧-୦ରେ ଆଗୁଆ ରହିଛି । ମ୍ୟାଚରେ ଚହଲ ଏବଂ ୱାଶିଂଟନ ସୁନ୍ଦରଙ୍କ ଚମତ୍କାର ବୋଲିଂ ସହିତ ଅଧିନାୟକ ରୋହିତ ଶର୍ମାଙ୍କ ଅର୍ଦ୍ଧଶତକ ବଳରେ ଏହି ମ୍ୟାଚକୁ ୬ ୱିକେଟରେ ବିଜୟ ହାସଲ କରିଛି । ତେବେ ଏହି ମ୍ୟାଚରେ ଅନୁବସ୍ତିତ ରହିଥିଲେ ଉପ-ଅଧିନାୟକ କେ.ଏଲ ରାହୁଲ । କିନ୍ତୁ ଦ୍ୱିତୀୟ ମ୍ୟାଚ ପୂର୍ବରୁ ସେ ଦଳ ସହିତ ଯୋଗ ଦେଇ ଅଭ୍ୟାସ ଆରମ୍ଭ କରିଛନ୍ତି । ତାଙ୍କ ପ୍ରତ୍ୟାବର୍ତ୍ତନରେ ଦଳରେ ହୋଇପାରେ ଏକ ବଡ ପରିବର୍ତ୍ତନ ।

ପ୍ରଥମ ମ୍ୟାଚରେ ଅଧିନାୟକ ରୋହିତ ଶର୍ମାଙ୍କ ସହିତ ଯୁବ ବାମହାତୀ ବ୍ୟାଟ୍ସମ୍ୟାନ ଇଶାନ କିଶାନ ପାଳି ଆରମ୍ଭ କରିଥିଲେ । ପ୍ରଥମ ୱିକେଟ ପାଇଁ ୮୪ ରନର ମହତ୍ତ୍ୱପୂର୍ଣ୍ଣ ପାର୍ଟନରସିପ କରିଥିଲେ ଉଭୟ ଖେଳାଳି । ତେବେ ରାହୁଲଙ୍କ ପ୍ରତ୍ୟାବର୍ତ୍ତନ ପରେ ତାଙ୍କୁ ଓପନିଙ୍ଗ କରିବା ପାଇଁ ପ୍ଲାନ କରିପାରେ ଟିମ ଇଣ୍ଡିଆ । ଫଳରେ ଇଶାନ କିଶାନ ଦଳରୁ ବାଦ ପଡିପାରନ୍ତି । ସେହିପରି ପ୍ରଥମ ମ୍ୟାଚରେ ଡେବ୍ୟୁ କରିଥିବା ଦୀପକ ହୁଡ୍ଡାଙ୍କୁ ମଧ୍ୟ ପ୍ଲେଇଙ୍ଗ ୧୧ରୁ ବାଦ ଦେଇ ଇଶାନ କିଶାନଙ୍କ ଆଉ ଥରେ ଓପନିଙ୍ଗ କରିବାର ସୁଯୋଗ ଦିଆଯାଇପାରେ । ଏମିତି ହେଲେ କେ.ଏଲ ରାହୁଲଙ୍କୁ ମଧ୍ୟକ୍ରମରେ ଖେଳିବା ପାଇଁ ସ୍ଥିର କରିପାରେ ମ୍ୟାନେଜମେଣ୍ଟ ।

ପ୍ରଥମ ମ୍ୟାଚରେ ଫେଲ ମାରିଥିବା ଟିମ ଇଣ୍ଡିଆର ପୂର୍ବତନ ଅଧିନାୟକ ବିରାଟ କୋହଲି ଏବଂ ୱିକେଟ କିପର ଋଷଭ ପନ୍ତ ଫର୍ମରେ ଫେରିବା ପାଇଁ ଚେଷ୍ଟା କରିବେ । ତେବେ ବୋଲିଂରେ କୌଣସି ପରିବର୍ତ୍ତନ କରି ନପାରେ ରୋହିତ ସେନା । ପ୍ରଥମ ମ୍ୟାଚରେ ଚହଲ ୪ଟି ଏବଂ ୱାଶିଂଟନ ସୁନ୍ଦର ୩ଟି ଲେଖାଏଁ ୱିକେଟ ନେଇଥିବା ବେଳେ ପ୍ରସିଦ୍ଧ କୃଷ୍ଣା ୨ଟି ଏବଂ ମହମ୍ମଦ ସିରାଜ ଗୋଟିଏ ୱିକେଟ ଅକ୍ତିଆର କରିଥିଲେ । ତେବେ ସାର୍ଦ୍ଦୁଳ ଠାକୁର କୌଣସି ୱିକେଟ ପାଇ ନଥିଲେ ସୁଦ୍ଧା ତାଙ୍କୁ ଆଉ ଏକ ସୁଯୋଗ ଦେବାକୁ ଚିନ୍ତା କରିପାରେ ଟିମ ।

ସମ୍ଭାବ୍ୟ ପ୍ଲେଇଙ୍ଗ ୧୧:
ରୋହିତ ଶର୍ମା(ଅଧିନାୟକ), କେ.ଏଲ ରାହୁଲ(ଉପ ଅଧିନାୟକ), ବିରାଟ କୋହଲି, ଋଷଭ ପନ୍ତ(ୱିକେଟ କିପର), ସୂର୍ଯ୍ୟକୁମାର ଯାଦବ, ଦୀପକ ହୁଡ୍ଡା, ୱଶିଂଟନ ସୁନ୍ଦର, ଶାର୍ଦ୍ଦୁଳ ଠାକୁର, ପ୍ରସିଦ୍ଧ କୃଷ୍ଣା, ୟୁଜବେନ୍ଦ୍ର ଚହଲ, ମହମ୍ମଦ ସିରାଜ