ଆଜି ପ୍ରଧାନମନ୍ତ୍ରୀଙ୍କ ବାସଭବନକୁ ଘେରିବ ଆପ୍, ଦିଲ୍ଲୀ ପୋଲିସ ଜାରି କଲା ଟ୍ରାଫିକ୍ ଆଡ୍ଭାଇଜରି
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଆରବିନ୍ଦ କେଜରିୱାଲଙ୍କ ଗିରଫକୁ ବିରୋଧ କରି ଆଜି ଦଳ ପ୍ରଧାନମନ୍ତ୍ରୀଙ୍କ ବାସଭବନ ଘେରାଉ କରିବେ । ଆପ୍ ନେତା ଓ କର୍ମୀମାନେ ସକାଳ ୧୦ଟାରେ ଦିଲ୍ଲୀ ରାସ୍ତାରେ ବିଜେପି ବିରୋଧରେ ପ୍ରଦର୍ଶନ କରିବେ । ଏଥିପାଇଁ ଦିଲ୍ଲୀରେ ଟ୍ରାଫିକ ସମସ୍ୟ ଦେଖାଯିବାର ସମ୍ଭାବନା ରହିଛି । ଜନସାଧାରଣଙ୍କ ସୁବିଧାକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ପକ୍ଷରୁ ଟ୍ରାଫିକ୍ ଆଡଭାଇଜରି ଜାରି କରାଯାଇଛି ।
ଦିଲ୍ଲୀ ପୋଲିସ ପକ୍ଷରୁ ଜାରି କରାଯାଇଥିବା ଏହି ଟ୍ରାଫିକ୍ ଆଡଭାଇଜରି ମାଧ୍ୟମରେ ଜନସାଧାରଣଙ୍କୁ ଅତାତୁର୍କ ମାର୍ଗ, ସଫଦରଗଞ୍ଜ ରୋଡ୍ ଏବଂ ଅକବର ରୋଡରେ ଯାତାୟାତ ନକରିବା ପାଇଁ ନିବେଦନ କରିଛନ୍ତି । ଆବଶ୍ୟକ ପଡ଼ିଲେ କିଛି ମେଟ୍ରୋ ଷ୍ଟେସନକୁ ମଧ୍ୟ ବନ୍ଦ କରିଦିଆଯିବ । ତେଣୁ ରୁଟ୍ ଡାଇଭର୍ଜନ ସହ ପଟେଲ ଚୌକ୍, ଉଦ୍ୟୋଗ ଭବନ, କେନ୍ଦ୍ରୀୟ ସଚିବାଳୟ, ଲୋକ କଲ୍ୟାଣ ମାର୍ଗର ମେଟ୍ରୋ ଷ୍ଟେସନ ବନ୍ଦ କରାଇପାରେ । ସୂଚନାରୁ ପ୍ରକାଶ ମଦ ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଵାଲଙ୍କୁ ଗିରଫ କରାଯିବାକୁ ବିରୋଧ କରି ଆମ୍ ଆଦମୀ ପାର୍ଟି ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାସଭବନ ଘେରାଉ କରିବାକୁ ଆହ୍ୱାନ ଦେଇଛି । ଦିଲ୍ଲୀ ମନ୍ତ୍ରୀ ତଥା ଆପ୍ ନେତା ଆତିଶୀ କହିଛନ୍ତି ଯେ ସେମାନେ ଚଳିତ ବର୍ଷ ରଙ୍ଗ ସହ ନ ଖେଳିବା ଏବଂ ହୋଲି ପାଳନ ନ କରିବାକୁ ସଂକଳ୍ପ ନେଇଛନ୍ତି ଏବଂ ନିଷ୍ଠୁରତା ଓ ଖରାପ ବିରୋଧରେ ଲଢ଼େଇରେ ସାମିଲ ହେବା ପାଇଁ ଦେଶବାସୀଙ୍କୁ ନିବେଦନ କରିଛନ୍ତି। ହୋଲି କେବଳ ଏକ ପର୍ବ ନୁହେଁ, ବରଂ ମନ୍ଦ ଉପରେ ଭଲର ବିଜୟର ପ୍ରତୀକ, ନିଷ୍ଠୁରତା ଉପରେ ନ୍ୟାୟର ପ୍ରତୀକ।
