ପିଇବା ପାଣିରେ ମିଶାନ୍ତୁ ଏହି ସବୁ ଜିନିଷ: ଖରାଦିନେ ମିଳିବ ଚମତ୍କାରୀ ଫାଇଦା
ଓଡ଼ିଶା ଭାସ୍କର: ଜଳ ହିଁ ଜୀବନ, ଏ କଥା ବେଶ୍ ଅଧିକ ଅନୁଭବ କରି ହୁଏ ଖରାଦିନରେ । କିଛି ସମୟ ବ୍ୟବଧାନରେ ଶରୀରରେ ଜଳୀୟ ଅଂଶ କମିଯିବା ଫଳରେ ଆମେ କଷ୍ଟ ଅନୁଭବ କରିଥାଉ । ଖରାଦିନରେ ଲୋକମାନେ ଥଣ୍ଡା ପାନୀୟ ପିଇବାକୁ ପସନ୍ଦ କରିଥାନ୍ତି । ସୁସ୍ଥ ରହିବାକୁ ଫଳ ରସକୁ ଗୁରୁତ୍ୱ ଦେଇଥାନ୍ତି । ଏପରିକି ଖରା ଦିନରେ ଦେହର ଜଳୀୟ ଅଂଶକୁ ସନ୍ତୁଳିତ କରିବା ପାଇଁ ଆମେ ବିଭିନ୍ନ ପ୍ରକାରର ପାନୀୟ ପଦାର୍ଥ ମଧ୍ୟ ପିଇଥାଉ ।
ପ୍ରଥମେ ଏକ ବୋତଲରେ ପାଣି ଭର୍ତ୍ତି କରନ୍ତୁ । ଏଥିରେ କିଛି ତାଜା ପୁଦିନା ପତ୍ର, କିଛି ଡାଲଚିନି ଖଣ୍ଡ ପକାନ୍ତୁ । ଏହାପରେ ଏହାକୁ ଆଉ ଟିକେ ସ୍ୱାଦିଷ୍ଟ କରିବା ନିମନ୍ତେ ଏଥିରେ ଲେମ୍ବୁ ପକାନ୍ତୁ । ତା ପରେ ପ୍ରସ୍ତୁତ ହେଇଗଲା ଆପଣଙ୍କ ଫ୍ଲେବର୍ ପାଣି । ଶୋଷ ଲାଗିଲେ ଦିନ ସାରା ଅଳ୍ପ ଅଳ୍ପ କରି ଏହି ଫ୍ଲେବର୍ ପାଣି ପିଅନ୍ତୁ ,ଏହା କେବଳ ସ୍ୱାଦିଷ୍ଟ ନୁହେଁ ବରଂ ଦେହ ପାଇଁ ହିତକାରୀ ମଧ୍ୟ । ଏଥିରେ ବ୍ୟବହାର ହୋଇ ଥିବା ପୁଦିନା, ଡାଲଚିନି, ଲେମ୍ବୁର ଅନେକ ଭଲ ଗୁଣ ରହିଛି । ପୁଦିନାରେ ଥିବା ଆଣ୍ଟିଅକ୍ସିଡାଣ୍ଟ ଗୁଣ ଶରୀରର ପାଚନ ପ୍ରକ୍ରିୟାରେ ସହଯୋଗ କରେ, ଡାଇବେଟିସକୁ ସନ୍ତୁଳିତ କରେ । ଡାଲଚିନି ଆମ ଶରୀରର ରୋଗପ୍ରତିରୋଧ ଶକ୍ତି ବଢ଼ାଇ ଥାଏ । ସେହିପରି ଲେମ୍ବୁରେ ରହିଛି ଭିଟାମିନ ସି ଓ ଫାଇବର ଏବଂ ଆଣ୍ଟିଅକ୍ସିଡାଣ୍ଟ ଗୁଣ ଯାହା ଦେହର ପାଣିର ଅଭାବ କମ କରିଥାଏ । ତେଣୁ ଏହି ଫ୍ଲେବର୍ ପାଣି ବ୍ୟବହାର ଅତ୍ୟନ୍ତ ଲାଭଦାୟକ ଅଟେ ।
