ଅନିଲ ଅମ୍ବାନୀଙ୍କ କମାଲ, 13 ଦିନରେ ନିବେଶକଙ୍କୁ କରିଦେଲେ ଏତେ ଧନୀ
ଋଣଗ୍ରସ୍ତ ବ୍ୟବସାୟୀରୁ ହୋଇଗଲେ କୋଟି କୋଟି ଟଙ୍କାର ମାଲିକ
ମୁମ୍ବାଇ: ଦିନେ ଥିଲେ ଋଣଗ୍ରସ୍ତ ବ୍ୟବସାୟୀ, ଆଜି କିନ୍ତୁ ହଜାର ହଜାର କୋଟି ଟଙ୍କାର ମାଲିକ। ଆଜ୍ଞା ହଁ, ଆମେ କହୁଛୁ ଅନିଲ ଅମ୍ବାନୀଙ୍କ କଥା। ଅନିଲ ଅମ୍ବାନୀଙ୍କ କମ୍ପାନୀ ରିଲାଏନ୍ସ ପାୱାର ଷ୍ଟକ୍ ବଜାରରେ ଏତେ ଭଲ ପ୍ରଦର୍ଶନ କରିଛି ଯେ, ନିବେଶକମାନେ ଆଶ୍ଚର୍ଯ୍ୟ ହେବା ସହ ବହୁତ ଖୁସି ମଧ୍ୟ ହୋଇଯାଇଛନ୍ତି। ଗତ 13ଟି ବାଣିଜ୍ୟ ଅଧିବେଶନରେ ରିଲାଏନ୍ସ ପାୱାରର ଷ୍ଟକ୍ 50 ପ୍ରତିଶତରୁ ଅଧିକ ବୃଦ୍ଧି ହୋଇଛି।
10 ଜୁନ୍ 2025ରେ, ଷ୍ଟକ୍ ପୁଣି ଥରେ 10% ବୃଦ୍ଧି ପାଇ ₹ 34.84 ସ୍ତରକୁ ପହଞ୍ଚିଲା, ଯାହା ଏହାର 52 ସପ୍ତାହର ସର୍ବୋଚ୍ଚ ସ୍ତର ଅଟେ। ଦିନେ ଏକ ସମୟ ଥିଲା ସେ ଋଣରେ ବୁଡିରହିଥିବା ବ୍ୟବସାୟୀ ଭାବରେ ଜଣାଶୁଣା ଥିଲେ କିନ୍ତୁ ଏବେ ସେ ହଜାର ହଜାର କୋଟି ଟଙ୍କାର ମାଲିକ ଭାବେ ଜଣାଶୁଣା।
କାରଣ କ’ଣ? ବଜାର ବିଶେଷଜ୍ଞଙ୍କ ମତରେ କମ୍ପାନୀର ବାଲାନ୍ସ ସିଟରେ ଉନ୍ନତି ଏବଂ ଋଣ ହ୍ରାସ ପାଇଁ ଚେଷ୍ଟା ଯୋଗୁଁ ନିବେଶକଙ୍କ ବିଶ୍ୱାସ ବୃଦ୍ଧି ପାଇଛି। ଏହା ସହିତ, ଅନିଲ ଅମ୍ବାନୀଙ୍କ ନେତୃତ୍ୱରେ କମ୍ପାନୀର ବ୍ୟବସାୟ ପୁନର୍ଗଠନ ଏବଂ ରଣନୈତିକ ନିଷ୍ପତ୍ତି ମଧ୍ୟ ଷ୍ଟକରେ ବୃଦ୍ଧି ପାଇଛି।
ନିବେଶକମାନଙ୍କୁ ଏତେ ଲାଭ ମିଳିଛି: ଯଦି ଜଣେ ନିବେଶକ ମାତ୍ର ଦୁଇ ସପ୍ତାହ ପୂର୍ବରୁ ଏହି ଷ୍ଟକରେ ₹1 ଲକ୍ଷ ନିବେଶ କରିଥାନ୍ତେ, ତେବେ ଏହାର ମୂଲ୍ୟ ଏବେ ₹2.3 ଲକ୍ଷରୁ ଅଧିକ ହୋଇଥାନ୍ତା। ଅର୍ଥାତ୍, ମାତ୍ର 13 ଦିନରେ 130% ରୁ ଅଧିକ ରିଟର୍ଣ୍ଣ, ଯାହା ଯେକୌଣସି ସ୍ମଲକ୍ୟାପ୍ ଷ୍ଟକ ପାଇଁ ଏକ ବିରାଟ ଲାଭ ବୋଲି କୁହାଯାଏ।
ଅନ୍ୟ କମ୍ପାନୀଗୁଡ଼ିକରେ ମଧ୍ୟ ବୃଦ୍ଧି: କେବଳ ରିଲାଏନ୍ସ ପାୱାର ନୁହେଁ, ଅନିଲ ଅମ୍ବାନୀଙ୍କ ଅନ୍ୟ କମ୍ପାନୀ ରିଲାଏନ୍ସ ଇନଫ୍ରାଷ୍ଟ୍ରକ୍ଚରରେ ମଧ୍ୟ ଭଲ ବୃଦ୍ଧି ଦେଖାଯାଇଛି। ଯାହା ସୂଚିତ କରୁଛି, ଅନିଲ ଅମ୍ବାନୀଙ୍କ କମ୍ପାନୀ ଗୁଡିକ ପ୍ରତି ନିବେଶକଙ୍କ ଆଗ୍ରହ ବୃଦ୍ଧି ପାଉଛି।