ପାକିସ୍ତାନରେ ପୁଣି ହିନ୍ଦୁ ମନ୍ଦିର ଉପରେ ଆକ୍ରମଣ, ମୂର୍ତ୍ତି ଭାଙ୍ଗିଲେ ଦୁର୍ବୁତ୍ତ
ନୂଆଦିଲ୍ଲୀ(ଓଡ଼ିଶା ଭାସ୍କର): ପ୍ରଫେଟ୍ ମହମ୍ମଦଙ୍କ ଉପରେ ନୂପୁର ଶର୍ମାଙ୍କ ବିବାଦୀୟ ବୟାନକୁ ନେଇ ଭାରତକୁ ଶିକ୍ଷା ଦେବାକୁ ଚେଷ୍ଟା କରୁଥିବା ପାକିସ୍ତାନରେ ପୁଣି ଅଳ୍ପ ସଂଖ୍ୟକଙ୍କ ଆସ୍ଥା ଉପରେ ଆକ୍ରମଣ ହୋଇଛି। ବୁଧବାର କରାଚୀ ସହରରେ ଶ୍ରୀ ମାରୀ ମାତା ମନ୍ଦିରରେ କିଛି ଦୁର୍ବତ୍ତ ଭଙ୍ଗାରୁଜା କରିଛନ୍ତି। ପୋଲିସ ଏହି ବିଷୟରେ ସୂଚନା ଦେଇଛି। ବୁଧବାର ଦିନ କରାଚି କୋରାଙ୍ଗି ଅଞ୍ଚଳର ଶ୍ରୀ ମାରି ମାତା ମନ୍ଦିରରେ ଦେବତାଙ୍କ ପ୍ରତିମା ଭଙ୍ଗାରୁଜା କରାଯାଇଛି ବୋଲି ପୋଲିସ କହିଛି।
ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ ଏହି ଘଟଣା ପରେ କରାଚୀରେ ହିନ୍ଦୁ ସମୁଦାୟ ଭୟଭିତ ଅବସ୍ଥାରେ ରହିଛନ୍ତି। ଏହି କାରଣରୁ ଏହି ଅଞ୍ଚଳରେ କୌଣସି ପ୍ରକାରର ଅପ୍ରିୟ ଘଟଣାକୁ ଏଡ଼ାଇବା ଲାଗି ପୋଲିସ ମୁତୟନ ହୋଇଛନ୍ତି। କୋରଙ୍ଗି ଥାନା ଅଧ୍ୟକ୍ଷ ଫାରୁଖ୍ ସଞ୍ଜରାନୀ କହିଛନ୍ତି ଯେ, ୫ରୁ ୬ ଜଣ ଦୁର୍ବତ୍ତ ଆସି ମନ୍ଦିରରେ ଭଙ୍ଗାରୁଜା କରିଥିଲେ। ପୋଲିସ ଅଜଣା ଦୁର୍ବୁତ୍ତଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଥିବା ସେ କହିଛନ୍ତି।
କହିବାକୁ ଗଲେ ଅତୀତରେ ମଧ୍ୟ ପାକିସ୍ତାନରେ ଦୁର୍ବୁତ୍ତମାନେ ହିନ୍ଦୁ ମନ୍ଦିରଗୁଡ଼ିକୁ ଟାର୍ଗେଟ କରିଥିଲେ। ଅକ୍ଟୋବରରେ, କୋଟରୀ ଠାରେ ଥିବା ସିନ୍ଦୂର ନଦୀ କୂଳରେ ଅବସ୍ଥିତ ଐତିହାସିକ ମନ୍ଦିରକୁ ଅଜ୍ଞାତ ଦୁର୍ବୁତ୍ତମାନେ ଟାର୍ଗେଟ କରିଥିବା ଅଭିଯୋଗ ହୋଇଥିଲା। କୋଟରୀ ପୋଲିସ ଷ୍ଟେସନରେ ଅଜ୍ଞାତ ଦୁର୍ବୁତ୍ତଙ୍କ ବିରୋଧରେ ଏ ସମ୍ପର୍କରେ ଏକ ମାମଲା ରୁଜୁ କରିଛି।
ପାକିସ୍ତାନର ସରକାରୀ ଆକଳନ ଅନୁଯାୟୀ ପାକିସ୍ତାନରେ ୭.୫ ନିୟୁତ ହିନ୍ଦୁ ବାସ କରୁଛନ୍ତି। ତେବେ ସମ୍ପ୍ରଦାୟରେ ବିଶ୍ୱାସ ରହିଛି ଯେ ଦେଶରେ ୯ ମିଲିୟନରୁ ଅଧିକ ହିନ୍ଦୁ ଅଛନ୍ତି। ପାକିସ୍ତାନର ଅଧିକାଂଶ ହିନ୍ଦୁ ଜନସଂଖ୍ୟା ସିନ୍ଧ ପ୍ରଦେଶରେ ବସବାସ କରନ୍ତି।
