ରେଳବାଇର ବଡ଼ କାର୍ଯ୍ୟାନୁଷ୍ଠାନ, ୨.୫ କୋଟିର IRCTC ଆକାଉଣ୍ଟ ବନ୍ଦ

ନୂଆଦିଲ୍ଲୀ: ରେଳବାଇର ବଡ଼ କାର୍ଯ୍ୟାନୁଷ୍ଠାନ। ଭାରତୀୟ ରେଳବାଇ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ୨.୫ କୋଟି IRCTC ଆକାଉଣ୍ଟ ବନ୍ଦ କରିଛି। ଏହି ସୂଚନା ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ସଂସଦକୁ ଦେଇଛନ୍ତି।

ମୌସୁମୀ ଅଧିବେଶନ ସମୟରେ ରାଜ୍ୟସଭାରେ ଭାଷଣ ଦେଇ ରେଳମନ୍ତ୍ରୀ ତତକାଳର ନୂଆ ନିୟମ ବିଷୟରେ ମଧ୍ୟ ଗୃହକୁ ସୂଚନା ଦେଇଥିଲେ। ସାଧାରଣ ଯାତ୍ରୀମାନେ ଯେପରି ଭଲ ଯାତ୍ରାର ଅଭିଜ୍ଞତା ପାଇପାରିବେ, ସେଥିପାଇଁ ଦଲାଲମାନଙ୍କ ଦ୍ୱାରା ନକଲି ଟିକେଟ ବୁକିଂ ବନ୍ଦ କରିବା ପାଇଁ ସରକାର ଏହି ପଦକ୍ଷେପ ନେଇଛନ୍ତି।

୨.୫ କୋଟି ଆକାଉଣ୍ଟ ବନ୍ଦ:  କେନ୍ଦ୍ରୀୟ ରେଳମନ୍ତ୍ରୀ କହିଛନ୍ତି ଯେ ଟିକେଟ ବୁକିଂ ସିଷ୍ଟମରେ ଅନିୟମିତତା ଏବଂ ଅପବ୍ୟବହାରକୁ ରୋକିବା ପାଇଁ IRCTC ପ୍ରାୟ ୨.୫ କୋଟି ୟୁଜର୍ ଆଇଡିକୁ ବ୍ଲକ୍ କରିଛି।

ଗୃହକୁ ଦିଆଯାଇଥିବା ସୂଚନାରେ କେନ୍ଦ୍ରମନ୍ତ୍ରୀ କହିଛନ୍ତି ଯେ ତଥ୍ୟ ଯାଞ୍ଚ ସମୟରେ ଜଣାପଡିଥିଲା ଯେ ନକଲି ସୂଚନା ବ୍ୟବହାର କରି କୋଟି କୋଟି ୟୁଜର୍ ଆଇଡି ତିଆରି କରାଯାଇଛି।

ଯାହା ପରେ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ତତକାଳ ଟିକେଟ ବୁକିଂରେ ସ୍ୱଚ୍ଛତା ଆଣିବା ପାଇଁ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ଯାହା ଦ୍ଵାରା ସାଧାରଣ ଯାତ୍ରୀମାନେ ଅସୁବିଧାର ସମ୍ମୁଖୀନ ନ ହୁଅନ୍ତି।

 ନୂଆ ନିୟମ: ତତକାଳ ଟିକେଟ ବୁକିଂ ପାଇଁ ନିୟମ ପରିବର୍ତ୍ତନ କରି ରେଳବାଇ OTP ଆଧାରରେ ଯାଞ୍ଚ ଆରମ୍ଭ କରିଛି। ଏହା ସହିତ କେବଳ ଆଧାର ଲିଙ୍କ୍ ହୋଇଥିବା IRCTC ଆକାଉଣ୍ଟ ମାଧ୍ୟମରେ ଟିକେଟ ବୁକିଂ କରାଯାଇପାରିବ।

ଏହା ନକଲି ତତ୍କାଳ ଟିକେଟ ଉପରେ ପ୍ରତିବନ୍ଧକ ଲଗାଇବ। ତତ୍କାଳ ଟିକେଟ ବୁକିଂର ଏହି ନୂଆ ନିୟମ ୨୦୨୫ ମସିହା ଜୁଲାଇ ୧ ତାରିଖରୁ ଲାଗୁ କରାଯାଇଛି।

ଗୃହରେ ସୂଚନା ଦେଇ ରେଳମନ୍ତ୍ରୀ କହିଛନ୍ତି ଯେ ଭାରତୀୟ ରେଳବାଇରେ ୮୯% ଟିକେଟ ଏବେ ଅନଲାଇନରେ ବୁକ୍ କରାଯାଉଛି। ନୂଆ ନିୟମ ଲାଗୁ ହେବା ସହିତ କେବଳ ଆଧାର ଯାଞ୍ଚ ହୋଇଥିବା ୟୁଜର୍ ହିଁ IRCTC ୱେବସାଇଟ୍ ଏବଂ ଆପ୍ ରେ ଟିକେଟ ବୁକ୍ କରିପାରିବେ।

ରେଳମନ୍ତ୍ରୀ କହିଛନ୍ତି ଯେ ଯାତ୍ରୀଙ୍କ ସୁବିଧାକୁ ଦୃଷ୍ଟିରେ ରଖି ବର୍ତ୍ତମାନ ଅଫଲାଇନ୍ ଟିକେଟ୍ ବୁକିଂ କାଉଣ୍ଟର (PRS) ରେ ଅନଲାଇନ୍ କିମ୍ବା ଡିଜିଟାଲ୍ ପେମେଣ୍ଟର ସୁବିଧା ଉପଲବ୍ଧ କରାଯାଇଛି। ରେଳ ଯାତ୍ରୀମାନେ ଏବେ UPI ମାଧ୍ୟମରେ ଅଫଲାଇନ ମାଧ୍ୟମରେ ଟିକେଟ୍ ବୁକ୍ କରିପାରିବେ।