ରାଜ୍ୟ ସରକାରଙ୍କ ବଡ଼ ଘୋଷଣା, ଆଗାମୀ ପାଞ୍ଚ ବର୍ଷ ମଧ୍ୟରେ କୋଟିଏ ଯୁବପିଢିଙ୍କୁ ସରକାରୀ ଚାକିରି

ନୂଆଦିଲ୍ଲୀ: ବିହାରରୁ ଏକ ବଡ଼ ଖବର ସାମ୍ନାକୁ ଆସିଛି । ବିହାର ବିଧାନସଭା ନିର୍ବାଚନ ପୂର୍ବରୁ ନୀତିଶ ସରକାର ଏକ ବଡ଼ ଘୋଷଣା କରିଛନ୍ତି । ମୁଖ୍ୟମନ୍ତ୍ରୀ ନୀତିଶ କୁମାର କହିଛନ୍ତି ଯେ ବିହାର ସରକାର ଆଗାମୀ ପାଞ୍ଚ ବର୍ଷ (୨୦୨୫ ରୁ ୨୦୩୦ ପର୍ଯ୍ୟନ୍ତ) ମଧ୍ୟରେ ଏକ କୋଟି ଯୁବକଙ୍କୁ ସରକାରୀ ଚାକିରି ଏବଂ ନିଯୁକ୍ତି ଯୋଗାଇବେ । ଯାହା ୨୦୨୦-୨୫ ଲକ୍ଷ୍ୟକୁ ଦ୍ୱିଗୁଣିତ କରିବ ।

ଯୁବପିଢିଙ୍କୁ ମିଳିବ ଚାକିରି- ଏଥିପାଇଁ ଘରୋଇ କ୍ଷେତ୍ରରେ, ବିଶେଷକରି ଶିଳ୍ପ କ୍ଷେତ୍ରରେ ମଧ୍ୟ ନୂତନ ଚାକିରି ଏବଂ ନିଯୁକ୍ତି ସୁଯୋଗ ସୃଷ୍ଟି କରାଯିବ । ଏ ସମ୍ପର୍କରେ ଏକ ଉଚ୍ଚସ୍ତରୀୟ କମିଟି ଗଠନ କରାଯାଉଛି । ଏହି ସମ୍ପର୍କରେ, ରାଜ୍ୟ ମୁଖ୍ୟମନ୍ତ୍ରୀ ନୀତିଶ କୁମାର ସୋସିଆଲ ମିଡିଆ ପ୍ଲାଟଫର୍ମ X ରେ ତାଙ୍କ ହ୍ୟାଣ୍ଡେଲରୁ ଏକ ପୋଷ୍ଟ ମଧ୍ୟ ସେୟାର କରିଛନ୍ତି ।

ମୁଖ୍ୟମନ୍ତ୍ରୀ ପୋଷ୍ଟରେ ଲେଖିଛନ୍ତି, ପ୍ରାରମ୍ଭରୁ ଆମର ଚିନ୍ତାଧାରା ଥିଲା ଯେ ରାଜ୍ୟର ସର୍ବାଧିକ ସଂଖ୍ୟକ ଯୁବକ ଯୁବତୀ ସରକାରୀ ଚାକିରି ଏବଂ ନିଯୁକ୍ତି ପାଇବା ଉଚିତ । ୨୦୦୫ ରୁ ୨୦୨୦ ମଧ୍ୟରେ ରାଜ୍ୟରେ ୮ ଲକ୍ଷରୁ ଅଧିକ ଯୁବକ ଯୁବତୀଙ୍କୁ ସରକାରୀ ଚାକିରି ଦିଆଯାଇଥିଲା।

କୋଟିଏ ଯୁବପିଢିଙ୍କୁ ଚାକିରି- ରାଜ୍ୟର ଯୁବକ ଯୁବତୀମାନଙ୍କୁ ସରକାରୀ ଚାକିରି ଏବଂ ନିଯୁକ୍ତି ପ୍ରଦାନର ଗତିକୁ ଆହୁରି ବୃଦ୍ଧି କରିବା ପାଇଁ, ୨୦୨୦ ମସିହାରେ, ଆମେ ସୁଶାସନ କାର୍ଯ୍ୟକ୍ରମ, ସାତ ନିଶ୍ଚୟ-୨ ରେ ୧୦ ଲକ୍ଷ ଯୁବକ ଯୁବତୀଙ୍କୁ ସରକାରୀ ଚାକିରି ଏବଂ ୧୦ ଲକ୍ଷ ଲୋକଙ୍କୁ ନିଯୁକ୍ତି ଦେବାକୁ ପ୍ରତିଶ୍ରୁତି ଦେଇଥିଲୁ । ପରେ, ଏହାକୁ ଅଗଷ୍ଟ ୨୦୨୫ ସୁଦ୍ଧା ୧୨ ଲକ୍ଷ ଯୁବକ ଯୁବତୀଙ୍କୁ ସରକାରୀ ଚାକିରି ଏବଂ ୩୮ ଲକ୍ଷ ଲୋକଙ୍କୁ ନିଯୁକ୍ତି ଦେବାର ଲକ୍ଷ୍ୟକୁ ବୃଦ୍ଧି କରାଯାଇଛି । ମୋଟ ୫୦ ଲକ୍ଷ ଚାକିରି/ନିଯୁକ୍ତି ପ୍ରଦାନ କରିବାର ଲକ୍ଷ୍ୟ ରଖାଯାଇଥିବା ନେଇ ମୁଖ୍ୟମନ୍ତ୍ରୀ କହିଛନ୍ତି ।

ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ, “ମୁଁ ଖୁସିର ସହିତ ଜଣାଇବାକୁ ଚାହୁଁଛି ଯେ ଏପର୍ଯ୍ୟନ୍ତ ରାଜ୍ୟରେ ୧୦ ଲକ୍ଷ ଯୁବକ ଯୁବତୀଙ୍କୁ ସରକାରୀ ଚାକିରି ଦିଆଯାଇଛି ଏବଂ ପ୍ରାୟ ୩୯ ଲକ୍ଷ ଲୋକଙ୍କୁ ନିଯୁକ୍ତି ଦିଆଯାଇଛି । ୫୦ ଲକ୍ଷରୁ ଅଧିକ ଯୁବକ ଯୁବତୀଙ୍କୁ ସରକାରୀ ଚାକିରି/ନିଯୁକ୍ତି ଯୋଗାଇବାର ଲକ୍ଷ୍ୟ ନିଶ୍ଚିତ ଭାବରେ ହାସଲ କରାଯିବ ।