ଏହି ମେଡିସିନ୍ ଖାଉଥିଲେ ସାବଧାନ୍! ୧୩୫ ମେଡିସିନର ସାମ୍ପଲ୍ ଫେଲ୍, ହାଇ ବିପି-ଡାଇବେଟିସ୍ ଏବଂ ଭିଟାମିନ୍ ଡି୩ ର ଟାବଲେଟ୍ ମଧ୍ୟ ସାମିଲ

ନୂଆଦିଲ୍ଲୀ: କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (ସିଡିଏସସିଓ) ଡିସେମ୍ବରରେ ନିଆଯାଇଥିବା ଔଷଧ ନମୁନାର ଫଳାଫଳ ପ୍ରକାଶ କରିଛି । ଏହା ଅନୁସାରେ, ୧୩୫ ରୁ ଅଧିକ ମେଡିସିନ୍ ପାରାମିଟରରେ ଅବୈଧ ବୋଲି ଜଣାପଡିଥିଲା । ଯେଉଁ ଔଷଧଗୁଡ଼ିକର ନମୁନା ବିଫଳ ହୋଇଛି, ସେଗୁଡ଼ିକ ମଧ୍ୟରେ ହୃଦ୍ରୋଗ, ସୁଗାର, କିଡନୀ, ବିପି ଏବଂ ଆଣ୍ଟିବାୟୋଟିକ୍ ସମେତ ଅନେକ ଔଷଧ ଅନ୍ତର୍ଭୁକ୍ତ ।

ଗତ କିଛି ମାସ ଧରି ଔଷଧ ନମୁନାଗୁଡ଼ିକ କ୍ରମାଗତ ଭାବରେ ମାନଦଣ୍ଡ ପୂରଣ କରୁନାହିଁ । ଏହି ଔଷଧଗୁଡ଼ିକ ଦେଶର ଅନେକ ବଡ଼ ଔଷଧ କମ୍ପାନୀ ଦ୍ୱାରା ନିର୍ମିତ । ଏହି ଔଷଧଗୁଡ଼ିକ ଗୁଣବତ୍ତା ପରୀକ୍ଷାରେ ବିଫଳ ହୋଇଛି ଏବଂ ସ୍ୱାସ୍ଥ୍ୟ ପାଇଁ ବିପଜ୍ଜନକ ଘୋଷଣା କରାଯାଇଛି ।

ଏହି ଔଷଧଗୁଡ଼ିକର ନିର୍ମାତାମାନେ ମଧ୍ୟ ଏବେ ତଦନ୍ତାଧୀନ ଅଛନ୍ତି । ଏହି ଔଷଧଗୁଡ଼ିକ ମଧ୍ୟରୁ ଅଧିକାଂଶ ମଧୁମେହ ଏବଂ ମାଇଗ୍ରେନ୍ ପାଇଁ ଦିଆଯାଇଥିଲା । କେନ୍ଦ୍ରୀୟ ପରୀକ୍ଷାଗାରଗୁଡ଼ିକ ଦ୍ୱାରା ୫୧ଟି ଔଷଧ ନମୁନା ଏବଂ ରାଜ୍ୟ ଔଷଧ ପରୀକ୍ଷଣ ପ୍ରୟୋଗଶାଳାଗୁଡ଼ିକ ଦ୍ୱାରା ୮୪ଟି ଔଷଧ ନମୁନା ମାନକ ଗୁଣବତ୍ତା ଅନୁକୂଳ ନଥିବା ଜଣାପଡିଛି । ଏହି କାରଣରୁ ଔଷଧ ନିର୍ମାତାଙ୍କ ଲାଇସେନ୍ସ ବାତିଲ କରିବାର ପ୍ରକ୍ରିୟା ମଧ୍ୟ ଆରମ୍ଭ ହୋଇଛି ।

ନିମ୍ନମାନର ମୁଖ୍ୟ ଔଷଧ:
ଏହି ଔଷଧଗୁଡ଼ିକ ମଧ୍ୟରେ ଜନ ଔଷଧି କେନ୍ଦ୍ରଗୁଡ଼ିକୁ ଯୋଗାଇ ଦିଆଯାଇଥିବା ଆଣ୍ଟିବାୟୋଟିକ୍ ଔଷଧ – ସେଫପୋଡକ୍ସିମ ଟାବଲେଟ୍ ଆଇପି ୨୦୦-ଏମଜି, ଡିଭାଲପ୍ରୋଏକ୍ସ ଏକ୍ସଟେଣ୍ଡେଡ୍-ରିଲିଜ୍ ଟାବଲେଟ୍, ମେଟଫର୍ମିନ୍ ହାଇଡ୍ରୋକ୍ଲୋରାଇଡ୍ ଟାବଲେଟ୍, ଜିଙ୍କ ସଲଫେଟ୍ ଟାବଲେଟ୍, ମେଟଫର୍ମିନ୍ ଟାବଲେଟ୍ ୫୦୦ ଏମଜି, ଆମୋକ୍ସିମନ୍ ସିଭି-୬୨୫, ପାରାସିଟାମଲ୍ ୫୦୦ ଏମଜି ସାମିଲ ।

ଏହା ସହିତ ସିଏମଜି ବାୟୋଟେକର ବିଟା ହିଷ୍ଟିନ୍, ସିପ୍ଲାର ଓକାମାଟ୍, ଆଡମାଡ୍ ଫାର୍ମାର ପେଣ୍ଟାପ୍ରାଜୋଲ୍, ୱେଡ୍ସପ୍ ଫାର୍ମାର ଆମୋକ୍ସିସିଲିନ୍, ଶମଶ୍ରୀ ଲାଇଫ୍ ସାଇନ୍େସସର ମେରୋପେନେମ୍ ଇଞ୍ଜେକ୍ସନ୍-୫୦୦, ଓରିସନ୍ ଫାର୍ମାର ଟେଲମିସାର୍ଟନ୍, ମାର୍ଟିନ୍ ଆଣ୍ଡ୍ ବ୍ରାଉନ୍ କମ୍ପାନୀର ଆଲବେଣ୍ଡାଜୋଲ୍ ଅନ୍ତର୍ଭୁକ୍ତ ।

ଏପର୍ଯ୍ୟନ୍ତ ୩୦୦ ରୁ ଅଧିକ ଔଷଧ ଉପରେ ବ୍ୟାନ୍ ଲଗାଯାଇଛି:
କିଛି ସମୟ ପୂର୍ବରୁ, ସରକାର ବିଭିନ୍ନ ସମୟରେ ଅନେକ ଔଷଧ ଉପରେ ବ୍ୟାନ୍ ଲଗାଇଥିଲେ । ଏଥିମଧ୍ୟରେ ୨୦୬ଟି ଫିକ୍ସ ଡୋଜ୍ ଔଷଧକୁ ମଧ୍ୟ ବ୍ୟାନ୍ କରାଯାଇଥିଲା । ସେହି ଔଷଧଗୁଡ଼ିକ ସ୍ୱାସ୍ଥ୍ୟ ପାଇଁ କ୍ଷତିକାରକ ବୋଲି ମଧ୍ୟ କୁହାଯାଉଥିଲା । ତେବେ ଔଷଧ ପରାମର୍ଶଦାତା ବୋର୍ଡର ସୁପାରିଶ ପରେ ସରକାର ଏହି ନିଷ୍ପତ୍ତି ନେଇଥିଲେ ।