ପୌର ନିର୍ବାଚନ: ଅନ୍ତିମ ଦିନରେ ନାମାଙ୍କନ ଦାଖଲ କଲେ ବହୁ ହେଭିୱେଟ୍ ନେତା, ଏଥର ଜମିବ ପ୍ରଚାର
ଭୁବନେଶ୍ୱର,(ଭାସ୍କର ନ୍ୟୁଜ୍) : ପୌର ନିର୍ବାଚନ ପାଇଁ ନାମାଙ୍କନ ଦାଖଲ ଶେଷ ହେଲା । ସୋମବାର ଶେଷ ଦିବସରେ ବହୁ ହେଭିୱେଟ୍ ପ୍ରାର୍ଥିତ୍ର ଦାଖଲ କରିଛନ୍ତି । ବିଜେଡିର ମେୟର ପ୍ରାର୍ଥୀ ଭୁବନେଶ୍ୱର ପାଇଁ ସୁଲୋଚନା ଦାସ, କଟକ ପାଇଁ ସୁବାସ ସିଂ ଓ ବ୍ରହ୍ମପୁର ମେୟର ପ୍ରାର୍ଥୀ ସଂଘମିତ୍ରା ଦଳାଇ ପ୍ରାର୍ଥିତ୍ର ଦାଖଲ କରିଥିବା ସୂଚନା ମିଳିଛି । ଏକ ବିରାଟ ଶୋଭାଯାତ୍ରାରେ ଏହି ୩ ହେଭିୱେଟ୍ ମେୟର ପ୍ରାର୍ଥୀ ନାମାଙ୍କନ ଦାଖଲ କରିବାକୁ ଯାଇଥିଲେ । ଅନ୍ୟପକ୍ଷରେ ବ୍ରହ୍ମପୁର ପାଇଁ କଂଗ୍ରେସର ମେୟର ପ୍ରାର୍ଥୀ ମଞ୍ଜୁ ରଥ ମଧ୍ୟ ନାମାଙ୍କନ ଦାଖଲ କରିଥିବା ସୂଚନା ମିଳିଛି । ସେହିପରି ବିଜେପି ଓ କଂଗ୍ରେସର ମେୟର ପ୍ରାର୍ଥୀମାନେ ମଧ୍ୟ ନାମାଙ୍କନ କରିଛନ୍ତି ।
ଅନ୍ୟପକ୍ଷରେ ଭୁବନେଶ୍ୱର ମହାନଗର ନିଗମର ୫୦ ନମ୍ବର ୱାର୍ଡ ପାଇଁ ପୂର୍ବତନ କର୍ପୋରେଟର ସୁଜିତ ସ୍ୱାଇଁ ନାମାଙ୍କନ ଦାଖଲ କରିଥିବାବେଳେ ଯାଜପୁର ଜିଲ୍ଲା ବ୍ୟାସନଗର ପୌରପାଳିକାର ବିଜେଡି ଚେୟାରମ୍ୟାନ ପ୍ରାର୍ଥୀ ସଂଗୀତା ପିଙ୍ଗୁଆ ନାମାଙ୍କନ ଦାଖଲ କରିଥିବା ସୂଚନା ମିଳିଛି । ତେବେ ଶେଷ ଦିନରେ ବହୁ ଆଶାୟୀ ନାମାଙ୍କନ ଦାଖଲ କରିଥିବାରୁ ଦିନତମାମ ବିଭିନ୍ନ କାର୍ଯ୍ୟାଳୟରେ ଭିଡ଼ ଲାଗି ରହିଥିବା ଦେଖିବାକୁ ମିଳିଥିଲା । ନାମାଙ୍କନ ପରେ ଏବେ ପ୍ରାର୍ଥୀମାନେ ସେମାନଙ୍କ ପ୍ରଚାର କାର୍ଯ୍ୟକୁ ଜୋରଦାର କରିବେ ବୋଲି ଆଶା କରାଯାଉଛି । ରାଜ୍ୟ ନିର୍ବାଚନ କମିଶନ କରୋନା କଟକଣା ହଟାଇ ଦେଇଥିବାରୁ ପ୍ରାର୍ଥୀମାନଙ୍କ ପାଇଁ ପ୍ରଚାର କାର୍ଯ୍ୟ ସୁଗମ ହେବ ବୋଲି ଆଶା କରାଯାଉଛି ।
