ବାଗଦାଦ୍ କୋଭିଡ୍ ହସ୍ପିଟାଲରେ ଅଗ୍ନିକାଣ୍ଡ: ୮୨ ଜଣ ମୃତ, ୧୧୦ ଆହତ

ନୂଆଦିଲ୍ଲୀ ୨୫ । ୪ (ଓଡିଶା ଭାସ୍କର) : ବାଗଦାଦ କୋଭିଡ୍ ହସ୍ପିଟାଲରେ ଅଗ୍ନିକାଣ୍ଡ ଯୋଗୁଁ ମୃତ୍ୟୁ ସଂଖ୍ୟା ବଢି ୮୨ ରେ ପହଞ୍ଚିଛି । ଏହାସହ ୧୧୦ ରୁ ଅଧିକ ଆହତ ହୋଇଥିବା ନେଇ ସୂଚନା ମିଳିଛି । ଗତକାଲି ବିଳମ୍ବିତ ରାତିରେ ଇରାକର ରାଜଧାନୀ ବାଗଦାଦରେ ଥିବା ଇବନ୍-ଅଲ୍-ଖାତିବ୍ ହସ୍ପିଟାଲରେ ଏହି ଅଗ୍ନିକାଣ୍ଡ ହୋଇଥିଲା । ସୂଚନା ଅନୁସାରେ ହସ୍ପିଟାଲରେ କରୋନା ଭାଇରସ୍ ଇଣ୍ଟେନସିଭ୍ କେୟାର ୟୁନିଟ୍ ରେ ଏହି ନିଆଁ ଲାଗିଯାଇଥିଲା । ମେଡିକାଲରୁ ମିଳିଥିବା ସୂଚନା ଅନୁସାରେ ଅକ୍ସିଜେନ୍ ସିଲିଣ୍ଡର ଠିକ୍ ଭାବେ ରଖା ଯାଇନଥିବା ଭୁଲ୍ ଯୋଗୁଁ ବିସ୍ଫୋରଣ ଘଟି ଏହି ନିଆଁ ଲାଗିଯାଇଥିଲା । ଏହି ଅଗ୍ନିକାଣ୍ଡରେ ୨୩ ଜଣଙ୍କର ମୃତ୍ୟୁ ହୋଇଥିବା ବେଳେ ୫୦ ଜଣରୁ ଅଧିକ ଆହତ ହୋଇଥବା ନେଇ ସୂଚନା ରହିଥିଲା । ଏହି ହସ୍ପିଟାଲର ଇଣ୍ଟେନ୍ସିଭ୍ କେୟାର୍ ୟୁନିଟ୍ ରେ ପ୍ରାୟ ୩୦ଜଣ ରୋଗୀଙ୍କ ପାଖରେ ତାଙ୍କ ପରିବାର ଲୋକମାନେ ମଧ୍ୟ ଉପସ୍ଥିତ ଥିଲେ। ୧୨୦ଜଣ ରୋଗୀ ଏବଂ ସେମାନଙ୍କ ପରିବାର ସମ୍ପର୍କୀୟଙ୍କ ମଧ୍ୟରୁ ୯୦ଜଣଙ୍କୁ ଉଦ୍ଧାର କରାଯାଇଥିବା ନେଇ ସୂଚନା ରହିଛି । ଘଟଣାର ତଦନ୍ତ ସହ କର୍ତ୍ତବ୍ୟରେ ଅବହେଳା କରିଥିବା କର୍ମଚାରୀଙ୍କ ପ୍ରତି ଦଣ୍ଡବିଧାନ କରିବା ଲାଗି ଏକ ତଦନ୍ତ କମିସନ୍ ବସାଇବାକୁ ବାଗ୍ଦାଦ୍ର ରାଜ୍ୟପାଳ ମହମଦ୍ ଜବର୍ ସ୍ୱାସ୍ଥ୍ୟ ମନ୍ତ୍ରାଳୟକୁ ନିର୍ଦ୍ଦେଶ ଦେଇଛନ୍ତି।