IPL 2025 CSK vs DC: ଧୋନି କରିପାରିଲେନି କମାଲ୍, CSKକୁ 25 ରନରେ ହରାଇ ପଏଣ୍ଟ ଟେବୁଲ ଶୀର୍ଷରେ DC
୨୫ ରନରେ ମ୍ୟାଚ୍ ଜିତିଲା ଦିଲ୍ଲୀ ।
ନୂଆଦିଲ୍ଲୀ: ଦିଲ୍ଲୀ କ୍ୟାପିଟାଲ୍ସ ଚେନ୍ନାଇ ସୁପର କିଙ୍ଗସକୁ 25 ରନରେ ପରାସ୍ତ କରିଛି । ଦିଲ୍ଲୀ IPL 2025 ରେ ବିଜୟର ହ୍ୟାଟ୍ରିକ୍ ରେକର୍ଡ କରିଛି, ଅନ୍ୟପକ୍ଷରେ CSK ଲଗାତାର ତୃତୀୟ ଥର ପାଇଁ ପରାସ୍ତ ହୋଇଛି ।
ଆଜିର ଏହି ମ୍ୟାଚ୍ରେ ଦିଲ୍ଲୀ ପ୍ରଥମେ ବ୍ୟାଟିଂ କରି ୧୮୩ ରନ୍ କରିଥିଲା । ଜବାବରେ ଚେନ୍ନାଇର ଟିମ୍ ମାତ୍ର ୧୫୮ ରନ୍ କରିପାରିଥିଲା। ବିଜୟ ଶଙ୍କର 69 ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ, କିନ୍ତୁ ତାଙ୍କର ଖରାପ ଷ୍ଟ୍ରାଇକ୍ ରେଟ୍ ଚେନ୍ନାଇ ଦଳକୁ ବହୁତ କ୍ଷତି ପହଞ୍ଚାଇଲା।
ଚେନ୍ନାଇ ସୁପର କିଙ୍ଗସକୁ ୧୮୪ ରନର ଟାର୍ଗେଟ ଦେଇଥିଲା ଦିଲ୍ଲୀ । ଜବାବରେ, ଆୟୋଜକ CSK ର ଆରମ୍ଭ ବହୁତ ଖରାପ ହୋଇଥିଲା କାରଣ ରଚିନ ରବିନ୍ଦ୍ର 3 ରନ, ଅଧିନାୟକ ଋତୁରାଜ ଗାୟକୱାଡ 5 ରନ ଏବଂ ଡେଭନ କନୱେ 13 ରନ କରି ଆଉଟ ହୋଇଥିଲେ ।
ଚେନ୍ନାଇ ୪୧ ରନ୍ ସୁଦ୍ଧା ୩ ୱିକେଟ୍ ହରାଇ ସାରିଥିଲା। ଏପରି ପରିସ୍ଥିତିରେ ଅଲରାଉଣ୍ଡର ବିଜୟ ଶଙ୍କର ଚତୁର୍ଥ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ସେ 69 ରନ କରିଥିଲେ କିନ୍ତୁ ଏହି ସମୟରେ ତାଙ୍କର ଷ୍ଟ୍ରାଇକ୍ ରେଟ୍ ଥିଲା ମାତ୍ର 127.78 ।
ଦିଲ୍ଲୀର ହ୍ୟାଟ୍ରିକ ଜିତ୍- ଦିଲ୍ଲୀ କ୍ୟାପିଟାଲ୍ସ ଆଇପିଏଲ 2025 ରେ ଚେନ୍ନାଇ ସୁପର କିଙ୍ଗସକୁ ପରାସ୍ତ କରି ହ୍ୟାଟ୍ରିକ୍ ବିଜୟ ହାସଲ କରିଛି । ଦିଲ୍ଲୀ ପୂର୍ବରୁ ଲକ୍ଷ୍ନୌ ସୁପରଜାଏଣ୍ଟସକୁ ୧ ୱିକେଟରେ, ତା’ପରେ ସନରାଇଜର୍ସ ହାଇଦ୍ରାବାଦକୁ ୭ ୱିକେଟରେ ପରାସ୍ତ କରିଥିଲା ଏବଂ ଏବେ ସିଏସକେକୁ ୨୫ ରନରେ ପରାସ୍ତ କରିଛି ।
ଅନ୍ୟପକ୍ଷରେ, ଚେନ୍ନାଇ ସୁପର କିଙ୍ଗସ୍ ମୁମ୍ବାଇ ଇଣ୍ଡିଆନ୍ସକୁ ୪ ୱିକେଟରେ ପରାସ୍ତ କରି IPL 2025 ଆରମ୍ଭ କରିଥିଲା। କିନ୍ତୁ ଏହା ପରେ, ଧୋନିଙ୍କ ଦଳ ଆରସିବି, ରାଜସ୍ଥାନ ରୟାଲ୍ସ ଏବଂ ଏବେ ଦିଲ୍ଲୀ କ୍ୟାପିଟାଲ୍ସ ଠାରୁ ପରାସ୍ତ ହୋଇଛି।