ସରକାର ଭରିବେ ପାଠପଢା ଖର୍ଚ୍ଚ! ଏଣିକି ଟଙ୍କା ପାଇଁ ଅଟକିବନି ପିଲାଙ୍କ Education
ହରିୟାଣା: ଝିଅମାନଙ୍କର ଉପଯୁକ୍ତ ଶିକ୍ଷା ପାଇଁ ସରକାର ବିଭିନ୍ନ ପ୍ରକାର ଯୋଜନା ଆରମ୍ଭ କରୁଛନ୍ତି । ତେବେ ଅନେକ ସ୍ଥାନରେ ଦେଖାଯାଇଥାଏ ଯେ ଅର୍ଥ ଅଭାବରୁ ପରିବାରରେ ଝିଅମାନଙ୍କର ଶିକ୍ଷା କଷ୍ଟକର ହୋଇପଡେ । ଉଚ୍ଚ ବିଦ୍ୟାଳୟ ପରେ ଅନେକ ଛାତ୍ରୀ ଅଧାରୁ ପାଠ ଛାଡ଼ିଥାନ୍ତି । କିନ୍ତୁ ବର୍ତ୍ତମାନ ଏଥିରେ ଏକ ପରିବର୍ତ୍ତନ ଦେଖିବାକୁ ମିଳିଛି ।
ହରିୟାଣା ସରକାର ପରିବାରର ଆୟ ୧,୮୦,୦୦୦ ରୁ କମ ଥିବା ମହିଳା ଛାତ୍ରମାନଙ୍କୁ କଲେଜରେ ମାଗଣା ଶିକ୍ଷାଦାନ ପାଇଁ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଏହାର ଘୋଷଣା କରିଛନ୍ତି । ସେ ଏହା ମଧ୍ୟ କହିଛନ୍ତି ଯେ ବାଳିକାମାନଙ୍କ ପାଇଁ ସରକାର କଲେଜ ଶିକ୍ଷା ପାଇଁ ଅଧା ଶୁଳ୍କ ପୈଠ କରିବେ ।
ତେବେ ଏହି ନିୟମ ସରକାରୀ ତଥା ବେସରକାରୀ କଲେଜରେ ପଢ଼ୁଥିବା ସମସ୍ତ ଛାତ୍ରୀଙ୍କ ପାଇଁ ପ୍ରଯୁଜ୍ୟ ହେବ ବୋଲି ସରକାର କହିଛନ୍ତି। ‘ଏକ୍ସ’ମୁଖ୍ୟମନ୍ତ୍ରୀ କହିଛନ୍ତି, “ଆଜି ମୁଁ ହରିୟାଣାର ସେହି ପରିବାରର ଝିଅମାନଙ୍କ ପାଇଁ ମାଗଣା ଶିକ୍ଷା ଘୋଷଣା କରୁଛି ଯାହାର ବାର୍ଷିକ ଆୟ ୧,୮୦,୦୦୦ ଟଙ୍କା ପର୍ୟ୍ୟନ୍ତ ରହିଛି। ଏହି ଘୋଷଣା ସମସ୍ତ ବେସରକାରୀ ଏବଂ ସରକାରୀ କଲେଜ ପାଇଁ ପ୍ରଯୁଜ୍ୟ ହେବ । ସେମାନଙ୍କର ଯାହା ଖର୍ଚ୍ଚ ହେବ ତାହା ସରକାର ବହନ କରିବେ ।
ସେ ଏହା ମଧ୍ୟ କହିଛନ୍ତି ଯେ, “ଏଥି ସହିତ ସରକାର ବାର୍ଷିକ ଆୟ ୧,୮୦,୦୦୦ ରୁ ୩,୦୦,୦୦୦ ମଧ୍ୟରେ ଥିବା ପରିବାରର ଝିଅମାନଙ୍କ କଲେଜ ଶିକ୍ଷା (ବେସରକାରୀ ଏବଂ ସରକାରୀ) ପାଇଁ ଅଧା ପଇସା ପୈଠ କରିବେ।” ଏହା ବ୍ୟତୀତ, ୨୦୨୧ ମସିହାରେ ମୁଖ୍ୟମନ୍ତ୍ରୀ ରାଜ୍ୟ ସରକାରଙ୍କ ‘ମହତ୍ତ୍ୱାକାଂକ୍ଷୀ ପରିବାର ପରିଚୟ ପତ୍ର’ ଯୋଜନା ଅଧୀନରେ ବାର୍ଷିକ ଆୟ ୧.୮୦ ଲକ୍ଷରୁ କମ୍ ଥିବା ପରିବାରର ପାଇଁ ମାଗଣା ଶିକ୍ଷା ଘୋଷଣା କରିଥିଲେ ।
