୫ ଲକ୍ଷରେ କିଣି ୨୫ ଲକ୍ଷ ଟଙ୍କାରେ କରୁଥିଲେ ବିକ୍ରି, କେଉଁଠୁ ଆସୁଛନ୍ତି ଡୋନର୍ସ, କିପରି ଚାଲିଛି ‘ଖେଳ’ : ଦିଲ୍ଲୀ କିଡନୀ ରାକେଟର ଖୁଲାସା
ନୂଆଦିଲ୍ଲୀ: କାହାର ଅସହାୟତାର ଫାଇଦା ଏପରି ବି ନିଆଯାଏ, କେହି କଳ୍ପନା ମଧ୍ୟ କରିପାରିବେ ନାହିଁ । ଦିଲ୍ଲୀର କିଡନୀ ରାକେଟ୍ ମାମଲାରେ ଏକ ବଡ଼ ଖୁଲାସା ହୋଇଛି । ଦିଲ୍ଲୀ ପୋଲିସ କ୍ରାଇମ ବ୍ରାଞ୍ଚ ଦ୍ୱାରା ପ୍ରକାଶିତ କିଡନୀ ଟ୍ରାନ୍ସପ୍ଲାଣ୍ଟ ରାକେଟରେ ଆପୋଲୋ ହସ୍ପିଟାଲର ଜଣେ ବରିଷ୍ଠ ମହିଳା ଡାକ୍ତରଙ୍କ ସମେତ ୭ ଜଣଙ୍କୁ ଗିରଫ କରାଯାଇଛି ।
ଏହି ରାକେଟରେ ଜଡିତ ଥିବା ଲୋକଙ୍କର ବାଂଲାଦେଶ ସହିତ ଲିଙ୍କ ଥିଲା, ଯେଉଁମାନେ ବାଂଲାଦେଶରୁ ଡୋନର ଆଣିଥିଲେ ଏବଂ ରିସିଭର ମଧ୍ୟ ବାଂଲାଦେଶର ଥିଲେ । ଅଭିଯୁକ୍ତମାନେ ୨୦୧୯ ଠାରୁ ଏହି ରାକେଟ୍ ଚଳାଉଥିଲେ ଏବଂ ୨୦୨୧ ରୁ ୨୦୨୩ ମଧ୍ୟରେ ପ୍ରାୟ ୧୫ ଟି ଟ୍ରାନ୍ସପ୍ଲାଣ୍ଟ କରିଥିଲେ, କିନ୍ତୁ କ୍ରାଇମ ବ୍ରାଞ୍ଚ ଏହି ରାକେଟର ସୂଚନା ପାଇଥିଲା ଏବଂ ତଦନ୍ତ ଆରମ୍ଭ କରିଥିଲା, ଯାହା ବର୍ତ୍ତମାନ ସଫଳ ହୋଇଛି ।
ନକଲି ଡକ୍ୟୁମେଣ୍ଟରେ ଭାରତକୁ ଆସୁଥିଲା :-
ସୂତ୍ରରୁ ମିଳିଥିବା ସୂଚନା ଅନୁଯାୟୀ ନିଲମ୍ବିତ କରାଯାଇଥିବା ଅଭିଯୁକ୍ତ ମହିଳା ଡାକ୍ତର ହେଉଛନ୍ତି ୫୦ ବର୍ଷିୟ ଡାକ୍ତର ବିଜୟା କୁମାରୀ । ସେ ଏହି ଗ୍ୟାଙ୍ଗର ଏକମାତ୍ର ଡାକ୍ତର ଯିଏ ନୋଏଡାର ଏକ ଘରୋଇ ଡାକ୍ତରଖାନାରେ ଟ୍ରାନ୍ସପ୍ଲାଣ୍ଟ କରୁଥିଲେ । ଦିଲ୍ଲୀରେ କିଡନୀ ରାକେଟର ସୂଚନା ପାଇବା ପରେ ଯେତେବେଳେ ପୋଲିସ ବାଂଲାଦେଶୀ ନାଗରିକଙ୍କୁ ପଚରାଉଚରା କରିଥିଲା ସେତେବେଳେ କ୍ରାଇମବ୍ରାଞ୍ଚ ଡାକ୍ତର ଏବଂ ତାଙ୍କ ସହଯୋଗୀଙ୍କ ବିଷୟରେ ଜାଣିଥିଲା ।
ଗିରଫ ବାଂଲାଦେଶୀ ନାଗରିକମାନେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯାତ୍ରା କରିବା ପାଇଁ ବ୍ୟବହାର କରୁଥିବା ନକଲି ଦଲିଲ ଜବତ କରାଯାଇଛି । ବିଜୟା କୁମାରୀ ଗତ ୧୫ ବର୍ଷ ଧରି ଜୁନିଅର ଡାକ୍ତର ଭାବରେ ଇନ୍ଦ୍ରପ୍ରଥା ଆପୋଲୋ ହସ୍ପିଟାଲ ସହିତ ସଂଯୁକ୍ତ ହୋଇଥିଲେ । ସେ ରୋଗୀମାନଙ୍କୁ ଆଣି ନିଜେ ଟ୍ରାନ୍ସପ୍ଲାଣ୍ଟ କରୁଥିଲେ, କିନ୍ତୁ କିଡନୀ ରାକେଟ୍ ପ୍ରକାଶ ପାଇବା ପରେ ଡାକ୍ତରଖାନା ତାଙ୍କୁ ନିଲମ୍ବନ କରିଥିଲା । କ୍ରାଇମ ବ୍ରାଞ୍ଚ ସହିତ ସହଯୋଗ କରିବାକୁ ମଧ୍ୟ ନିଶ୍ଚିତ କରାଯାଇଛି ।
ଏହିପରି ହୁଏ କିଣା ବିକା :-
ପୋଲିସ ସୂତ୍ର ଅନୁଯାୟୀ, ଏହି ଗ୍ୟାଙ୍ଗରେ ସମ୍ପୃକ୍ତ ଲୋକମାନେ ବାଂଲାଦେଶର ଅସହାୟ ଲୋକଙ୍କ ଅସହାୟତାର ସୁଯୋଗ ନେଇ ସେମାନଙ୍କୁ କିଡନୀ ବିକ୍ରି କରିବାକୁ ମନାନ୍ତି । ତା’ପରେ ସେମାନେ ଅଲ ଶିଫା ନାମକ ଏକ ମେଡିକାଲ ଟୁରିଜିମ୍ କମ୍ପାନୀ ଜରିଆରେ ତାଙ୍କୁ ନକଲି ଦଲିଲରେ ଦିଲ୍ଲୀ ଡାକନ୍ତି । ଏଠାରେ ସେମାନଙ୍କୁ ୪ ରୁ ୫ ଲକ୍ଷ ଟଙ୍କା ଦେଇ କିଡନୀ ନିଅନ୍ତି, ଯାହା ୨୫ ରୁ ୩୦ ଲକ୍ଷରେ ବିକ୍ରି ହୁଏ ।
ଯେଉଁମାନଙ୍କୁ କିଡନୀ ବିକ୍ରି କରାଯାଇଥିଲା ସେମାନେ ମଧ୍ୟ ବାଂଲାଦେଶର ନାଗରିକ ଥିଲେ । ଜଣେ ପୀଡିତା ତାଙ୍କ ବୟାନ ରେକର୍ଡ କରି କ୍ରାଇମ ବ୍ରାଞ୍ଚକୁ ଏହି ସୂଚନା ଦେଇଛନ୍ତି । ଏହି ଗ୍ୟାଙ୍ଗରେ ରସେଲ, ମହମ୍ମଦ ସୁମନ ମିଆନ, ଇଫ୍ଟି, ରତିଶ ପାଲ ନାମକ ବ୍ୟକ୍ତି ଥିଲେ, ସେମାନଙ୍କ ମଧ୍ୟରୁ ଇଫ୍ଟି ବ୍ୟତୀତ ବାକି ସମସ୍ତଙ୍କୁ ଗିରଫ କରାଯାଇଛି ।