ଟ୍ୱିନସିଟିରେ ଘନ କୁହୁଡ଼ି: ଯାତାୟାତରେ ସମସ୍ୟା, ଉତ୍ତର ଭାରତରେ ପ୍ରବଳ ଥଣ୍ଡା

ଭୁବନେଶ୍ୱର: ରାଜ୍ୟର ବିଭିନ୍ନ ସ୍ଥାନରେ କୁହୁଡ଼ି ଅନୁଭୂତ ହୋଇଛି । ଏହାରି ମଧ୍ୟରେ ଟ୍ୱିନସିଟି କଟକ ଏବଂ ଭୁବନେଶ୍ୱରରେ ଘନ କୁହୁଡ଼ି ଆସ୍ତରଣ ଦେଖାଦେଇଛି । ଘନ କୁହୁଡ଼ି ଯୋଗୁଁ ଯାତାୟାତରେ ସମସ୍ୟା ସୃଷ୍ଟି ହୋଇଛି । ଅନେକ ଦୂର ପର୍ଯ୍ୟନ୍ତ ଦୃଶ୍ୟମାନ ହେଉନି । ତେବେ କିଛି ଦିନ ଯାଏଁ ଘନ କୁହୁଡ଼ି ପାଇଁ ରାଜ୍ୟରେ ଏତେ ପରିମାଣରେ ଶୀତ ଅନୁଭୂତ ହେଉନାହିଁ । ଗଲା ମକର ସଂକ୍ରାନ୍ତି ପରେ ରାଜ୍ୟରେ ଘନ କୁହୁଡ଼ି ଦୃଶ୍ୟମାନ ହେଉଛି । କୁହୁଡ଼ି ପ୍ରଭାବ ଯୋଗୁଁ ଅନେକ ବିମାନ ଏବଂ ଟ୍ରେନ ଯାତାୟାତରେ ବିଳମ୍ବ ଘଟୁଛି । ଏଥିପାଇଁ ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି ।

ଦିଲ୍ଲୀ-ଏନସିଆର ସମେତ ଉତ୍ତର ଭାରତରେ ପ୍ରବଳ ଥଣ୍ଡା ପଡିଛି। ଦିଲ୍ଲୀର ତାପମାତ୍ରା ୪ ଡିଗ୍ରୀ ସେଲସିୟସ ତଳେ ରହିଛି। ରାଜଧାନୀରେ ଘନ କୁହୁଡି ଏବଂ କମ ଦୃଶ୍ୟମାନ ହେତୁ ଅନେକ ବିମାନ ଏବଂ ଟ୍ରେନ୍ ବିଳମ୍ବରେ ଚାଲୁଛି। ଆଜି ଜାମ୍ମୁ-କାଶ୍ମୀର, ଲଦାଖ ଏବଂ ଉତ୍ତରାଖଣ୍ଡରେ ତୁଷାରପାତ ହେବାର ସମ୍ଭାବନା ରହିଛି। ରାଜସ୍ଥାନ, ଉତ୍ତରପ୍ରଦେଶ, ହିମାଚଳ ପ୍ରଦେଶ, ପଞ୍ଜାବ ଏବଂ ହରିୟାଣାରେ ଥଣ୍ଡା ଲହରୀ ସତର୍କ ସୂଚନା ଜାରି କରାଯାଇଛି। ମଧ୍ୟପ୍ରଦେଶରେ ପ୍ରବଳ ଥଣ୍ଡା ଏବଂ ବିହାରରେ ଅତ୍ୟଧିକ ଶୀତର ସତର୍କ ସୂଚନା ରହିଛି। ପାଣିପାଗ ବିଭାଗ କହିଛି ଯେ, ଥଣ୍ଡା ଏବଂ କୁହୁଡିରୁ ମୁକ୍ତି ପାଇଁ ଆମକୁ ଅପେକ୍ଷା କରିବାକୁ ପଡ଼ିବ।

ଘନ କୁହୁଡ଼ି ହେତୁ ଗୁରୁବାର ସକାଳେ ଦିଲ୍ଲୀ-ଏନସିଆରରେ ଦୃଶ୍ୟମାନତା ବହୁତ କମ୍ ରହିଥିଲା। ଏହି କାରଣରୁ ଇନ୍ଦିରା ଗାନ୍ଧୀ ବିମାନବନ୍ଦରରେ ଅନେକ ବିମାନ ବିଳମ୍ବ ହୋଇଛି। ଏହାପୂର୍ବରୁ ବୁଧବାର ଦିନ ଦିଲ୍ଲୀ ବିମାନବନ୍ଦରରେ ୧୭୦ ବିମାନ ପ୍ରଭାବିତ ହୋଇଥିଲା। ଏହି କାରଣରୁ ଯାତ୍ରୀମାନେ ଘଣ୍ଟା ଘଣ୍ଟା ଧରି ଅସୁବିଧାରେ ପଡ଼ିଥିଲେ। ନ୍ୟୁଜ୍ ଏଜେନ୍ସି ANI ସହିତ କଥାବାର୍ତ୍ତା କରୁଥିବା ସମୟରେ ଜଣେ ଯାତ୍ରୀ କହିଛନ୍ତି ଯେ, ତାଙ୍କର ବିମାନ ଦୁଇ ଘଣ୍ଟାରୁ ଅଧିକ ବିଳମ୍ବ ହୋଇଛି। ତଥାପି, ଆମେ କାହାକୁ ଦାୟୀ କରିପାରିବୁ ନାହିଁ।