ଦୀପାବଳି ପାଲଟିଲା କାଳରାତି; ବାପା-ପୁଅ ଓ ଭଣଜାଙ୍କ ଉପରେ ଗୁଳିମାଡ଼, ୨ ମୃତ ଜଣେ ଗୁରୁତର

ନୂଆଦିଲ୍ଲୀ: ଦେଶର ବିଭିନ୍ନ ସ୍ଥାନରେ ଲୋକମାନେ ଧୁମଧାମରେ ଦୀପାବଳି ପାଳନ କରିଥିଲେ । କିନ୍ତୁ ଦୀପାବଳି ରାତି ଫାୟରିଂରେ ଥରିଉଠିଥିଲା ଦିଲ୍ଲୀ ସହର । ଗୁରୁବାର ଦିଲ୍ଲୀ ଶାହଦରା ସ୍ଥିତ ଫର୍ଶ ବଜାର ଅଞ୍ଚଳରେ ଡବଲ ମର୍ଡ଼ର ଘଟଣା ଭୟର ବାତାବରଣ ସୃଷ୍ଟି କରିଥିଲା ।

ସୂଚନାରୁ ପ୍ରକାଶ ଗୁରୁବାର ଦୀପାବଳି ଦିନ ଫର୍ଶ ବଜାର ଅଞ୍ଚଳରେ କିଛି ଦୁର୍ବୃତ୍ତ ଫାୟାରିଂ କରିଥିଲେ । ଏକ ପରିବାରର ୩ ଜଣଙ୍କୁ ଟାର୍ଗେଟ କରି ଗୁଳି ଚଲାଇଥିଲେ । ସମ୍ପର୍କରେ ଏହି ୩ ଜଣ ବାପ, ପୁଅ ଏବଂ ଭଣଜା । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଥିଲା । ରାତି ପ୍ରାୟ ୮ଟା ୩୦ ପାଖାପାଖି ଏହି ଘଟଣା ଘଟିଥିବା ଦିଲ୍ଲୀ ପୋଲିସ ପକ୍ଷରୁ ସୂଚନା ଦିଆଯାଇଛି । ତେବେ ଏହି ଡବଲ ମର୍ଡର ପଛରେ ପୂର୍ବ ଶତ୍ରୁତା ଥିବା ନେଇ ଅନୁମାନ କରାଯାଉଛି । ଏହି ଘଟଣାରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ଅଛନ୍ତି । ମୃତକମାନେ ହେଲେ ଆକାଶ(୪୦), ଋଷଭ ଶର୍ମା(୧୬) । ଆହତ ଜଣଙ୍କ ହେଉଛନ୍ତି କୃଷ୍ଣ ଶର୍ମା(୧୦) ଅଞ୍ଚଳର ସିସିଟିଭି ଫୁଟେଜ୍ ଏବଂ ସାକ୍ଷୀଙ୍କ ମାଧ୍ୟମରେ ପୋଲିସ ଅଧିକ ତଦନ୍ତ ଜାରି ରଖିଛି ।