କନେଷ୍ଟବଳ ତାଲିମରେ ବଡ ଠକେଇ; ଅସଲି ବର୍ଦିରେ ଆସିଲେ ନକଲି ପୋଲିସ, ଏମିତି ଖୋଲିଲା ରାଜ୍

ଭୋପାଳ: ବିହାରରେ କନେଷ୍ଟବଳ ତାଲିମରେ ସାମ୍ନାକୁ ଆସିଲା ବଡ଼ ଠକେଇ । ଧରାପଡ଼ିଲା ନକଲି ପୋଲିସ । ପୋଲିସ ଲାଇନରେ ଚାଲିଥିବା କନେଷ୍ଟବଳ ତାଲିମ ସମୟରେ ବୁଧବାର ଏକ ବଡ଼ ଠକେଇ ସାମ୍ନାକୁ ଆସିଛି। ତାଲିମ ନେଉଥିବା କନେଷ୍ଟବଳଙ୍କ ଗଣନା ସମୟରେ ଜଣେ ଯୁବକ ପୋଲିସ ପୋଷାକ ପିନ୍ଧି ତାଲିମରେ ଯୋଗ ଦେଉଥିବା ଧରାପଡ଼ିଛି।

ଏହି ଘଟଣା ପୋଲିସ ବିଭାଗରେ ହଇଚଇ ସୃଷ୍ଟି କରିଦେଇଛି। ତାଲିମରେ ମୋଟ 256 ଜଣ ନବନିଯୁକ୍ତ କନେଷ୍ଟବଳ ସାମିଲ ଥିଲେ। ବୁଧବାର ଦିନ, ଯେତେବେଳେ ଉପସ୍ଥାନ ରେକର୍ଡ କରାଯାଉଥିଲା, ସେତେବେଳେ ଦୁଇଜଣ ଭିନ୍ନ ଯୁବକ କନେଷ୍ଟବଳ ନମ୍ବର 1916 ରେ ସେମାନଙ୍କର ଉପସ୍ଥିତି ପଞ୍ଜିକୃତ କରିଥିଲେ। ଏହା ସନ୍ଦେହକୁ ଆହୁରି ଘନିଭୂତ କରିଥିଲା ଏବଂ ପୋଲିସ ଅଧିକାରୀମାନେ ତୁରନ୍ତ ପଚରାଉଚରା ଆରମ୍ଭ କରିଥିଲେ।

ତଦନ୍ତ ବେଳେ ଉଭୟ ଯୁବକ ନିଜ ନାମ ନୀରଜ କୁମାର ସିଂହ ବୋଲି କହିଥିଲେ । କିନ୍ତୁ କାଗଜପତ୍ରର ପୁଙ୍ଖାନୁପୁଙ୍ଖ ତଦନ୍ତ ପରେ ସତ୍ୟ ସାମ୍ନାକୁ ଆସିଥିଲା ।

‘ନକଲି’ ଏବଂ ‘ପ୍ରକୃତ’ ନୀରଜ କୁମାରଙ୍କ ପରିଚୟ

ଫର୍ଜୀ କରି ତାଲିମରେ ଯୋଗ ଦେଇଥିବା ଯୁବକ ହେଲେ ଛପ୍ରା ଜିଲ୍ଲାର ଗଡଖା ଥାନା ଅଞ୍ଚଳର ଶିବରାହିଆ ଗ୍ରାମର ନିବାସୀ ଜଗତନାରାୟଣ ସିଂହଙ୍କ ପୁଅ ନୀରଜ କୁମାର ସିଂହ । କିନ୍ତୁ ପ୍ରକୃତ କନଷ୍ଟେବଳ ଏବଂ ତାଲିମ ପାଇଁ ଅଧିକୃତ ପ୍ରାର୍ଥୀ ହେଉଛନ୍ତି ଔରଙ୍ଗାବାଦ ଜିଲ୍ଲାର ହସପୁରା ଥାନା ଅଞ୍ଚଳର ତାଲି ଗ୍ରାମର ନିବାସୀ ଉମେଶ ପାସୱାନଙ୍କ ପୁଅ ନୀରଜ କୁମାର ।

ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠିଛି, ତଦନ୍ତ ପରିସରକୁ ବୃଦ୍ଧି କରାଯାଇଛି

ଏହି ଘଟଣା ପରେ ପୋଲିସ ବିଭାଗରେ ଆଲୋଡ଼ନ ସୃଷ୍ଟି ହୋଇଛି। ଏଠି ବଡ ପ୍ରଶ୍ନ ଉଠୁଛି ଯେ, କିପରି ଜଣେ ଯୁବକ କୌଣସି ବୈଧ ପରିଚୟ ଏବଂ ଚୟନ ପ୍ରକ୍ରିୟା ବିନା ପୋଲିସ ତାଲିମ କ୍ୟାମ୍ପସରେ ପ୍ରବେଶ କଲେ ଏବଂ କିଛି ଦିନ ଧରି ତାଲିମ ମଧ୍ୟ ନେଲେ?

ଘଟଣାର ଗମ୍ଭୀରତାକୁ ବିଚାର କରି ବିଭାଗୀୟ ସ୍ତରରେ ତଦନ୍ତର ପରିସରକୁ ଆହୁରି ବୃଦ୍ଧି କରାଯାଇଛି। ପୋଲିସ ପ୍ରଶାସନ ସ୍ପଷ୍ଟ କରିଛି ଯେ ଦୋଷୀମାନଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ ଏବଂ ଯଦି କୌଣସି ପୋଲିସ କିମ୍ବା ଅନ୍ୟ ବ୍ୟକ୍ତି ଏହି ସମଗ୍ର ମାମଲାରେ ସମ୍ପୃକ୍ତ ଥିବେ, ତେବେ ତାଙ୍କ ବିରୁଦ୍ଧରେ ମଧ୍ୟ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ଠକେଇ ନିଶ୍ଚିତ ଭାବରେ ସୁରକ୍ଷା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନ ଉଠାଇଛି।