ଭାରତୀୟ ପ୍ରେମିକା ବିନି ରମଣଙ୍କୁ ବିବାହ କରିବେ ମ୍ୟାକ୍ସୱେଲ୍: ଭାଇରାଲ ହେଉଛି ବାହାଘର କାର୍ଡ
ନୂଆଦିଲ୍ଳୀ: ଅଷ୍ଟ୍ରେଲୀୟ ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ ବିବାହ କରିବାକୁ ଯାଉଛନ୍ତି । ଦୀର୍ଘ ୪ ବର୍ଷ ଧରି ପରସ୍ପରକୁ ଡେଟ୍ କରିବା ପରେ ଉଭୟ ବିବାହ କରିବାକୁ ଯାଉଛନ୍ତି । ୨୦୧୭ରୁ ବିନି ଓ ମ୍ୟାକ୍ସାୱେଲ ପରସ୍ପରକୁ ଡେଟ୍ କରୁଥିଲେ । ମ୍ୟାକ୍ସୱେଲ୍ ଓ ବିନିଙ୍କ ବାହାଘରର ନିମନ୍ତ୍ରଣ କାର୍ଡ ସାମାଜିକ ଗଣମାଧ୍ୟମରେ ଭାଇରାଲ୍ ହେଉଛି। ମ୍ୟାକ୍ସୱେଲ୍ ଓ ବିନି ୨୦୧୭ରୁ ଡେଟିଂ କରିଆସୁଛନ୍ତି । ଦୁଇଜଣଙ୍କ ନିର୍ବନ୍ଧ ୨୦୨୦ରେ ହୋଇଥିଲା।
ଖବର ଅନୁସାରେ ଦୁଇଜଣ ୨୭ ମାର୍ଚ୍ଚରେ ମେଲବୋର୍ଣ୍ଣରେ ପାରମ୍ପାରିକ ତାମିଲ ରୀତିନୀତି ଅନୁସାରେ ବିବାହ କରିବେ। ମିଡିଆ ରିପୋର୍ଟ ଅନୁସାରେ ଏଥିରେ ଅଷ୍ଟ୍ରେଲିଆର କ୍ରିକେଟର୍ ଓ ଆନ୍ତର୍ଜାତୀୟ ଅତିଥି ଯୋଗ ଦେବାର ସମ୍ଭାବନା ଅଛି। ଭାରତୀୟ ବଂଶୋଦ୍ଭବ ବିନି ରମଣ ଅଷ୍ଟ୍ରେଲିଆରେ ରହନ୍ତି। ସେ ପେଶାରେ ଜଣେ ଫାର୍ମାସିଷ୍ଟ। ବିନି ରମଣଙ୍କ ପରିବାର ଚେନ୍ନାଇର। ତେବେ ବିନିଙ୍କ ଜନ୍ମ ଓ ଲାଳନପାଳନ ଅଷ୍ଟ୍ରେଲିଆରେ ହୋଇଛି। ବିନି ରମଣଙ୍କ ପିତା ଭେଙ୍କଟ ରମଣ ଓ ମାତା ବିଜୟଲକ୍ଷ୍ମୀ ରମଣ ତାଙ୍କ ଜନ୍ମ ପୂର୍ବରୁ ଅଷ୍ଟ୍ରେଲିଆ ଚାଲି ଯାଇଥିଲେ।
