ଆର୍ଥିକ ମାନ୍ଦାବସ୍ଥା ଏବଂ ଛଟେଇ ମଧ୍ୟରେ ବଢ଼ିଲା ଗୁଗୁଲ୍ ସିଇଓଙ୍କ ସୁନ୍ଦର ପିଚାଇଙ୍କ ଦରମା, ମିଳିଲା ଏତିକି କୋଟି
ନୂଆଦିଲ୍ଲୀ: ସର୍ଚ୍ଚ ଇଞ୍ଜିନ୍ ଗୁଗୁଲର ପ୍ୟାରେଣ୍ଟ୍ କମ୍ପାନୀ ଆଲଫାବେଟ୍ ସିଇଓ ସୁନ୍ଦର ପିଚାଇଙ୍କ ବେତନରେ ବୃଦ୍ଧି ପାଇଛି। ଏହି ଦରମା ବୃଦ୍ଧି ଏପରି ସମୟରେ ହୋଇଛି, ଯେଉଁ ସମୟରେ ହଜାର ହଜାର କର୍ମଚାରୀଙ୍କ ଛଟେଇ କରାଯାଉଛି। ସୁନ୍ଦରଙ୍କ ଦରମା ବଢିବା ସହିତ ୨୦୨୨ ମସିହାରେ ସୁନ୍ଦର ପିଚାଇଙ୍କ ସମ୍ପତ୍ତି ୨୨୬ ମିଲିୟନ ଡ଼ଲାରରୁ ଅଧିକ ବା ୧୮୫୫ କୋଟି ଟଙ୍କାକୁ ବୃଦ୍ଧି ପାଇଛି।
ଏହା ସହ ସେ ଦୁନିଆର ସର୍ବାଧିକ ପାରିଶ୍ରମିକ ପ୍ରାପ୍ତ କର୍ପୋରେଟ୍ କର୍ମଚାରୀଙ୍କ ମଧ୍ୟରୁ ଜଣେ ହୋଇପାରିଛନ୍ତି। ଗତ ଆର୍ଥିକ ବର୍ଷରେ କମ୍ପାନୀ ବହୁ ବଡ ଅଧିକାରୀ ଏବଂ କର୍ମଚାରୀଙ୍କ ଦରମା ହ୍ରାସ କରିଥିବାବେଳେ ଅନେକଙ୍କୁ ଛଟେଇ କରିଥିଲା।
ଆଲଫାବେଟ୍ ଇଙ୍କ ରିପୋର୍ଟ ଅନୁଯାୟୀ ଷ୍ଟକ୍ ପୁରସ୍କାର ସୁନ୍ଦର ପିଚାଇଙ୍କ ୨୧୮ ନିୟୁତ ଡଲାରର ବେତନର ଏକ ଅଂଶ ଅଟେ। ୨୦୨୧ ମସିହାରେ ପିଚାଇଙ୍କୁ ମୋଟ ୬.୩ ମିଲିୟନ ଡଲାର ଅତିରିକ୍ତ ପାଣ୍ଠି କିମ୍ବା କ୍ଷତିପୂରଣ ମିଳିଥିଲା ଏବଂ ଗତ ତିନିବର୍ଷ ମଧ୍ୟରେ ଦରମା ୨ ମିଲିୟନ ଡ଼ଲାରରେ ସ୍ଥିର ରହିଛି। ୨୦୨୨ ରେ ଆଲଫାବେଟ୍ କର୍ମଚାରୀଙ୍କ ପାଇଁ ମଧ୍ୟମ କ୍ଷତିପୂରଣ ୨୭୯,୮୦୨ ଥିଲା। ସେହି ସମୟରେ ପିଚାଇଙ୍କର କ୍ଷତିପୂରଣ ସେହି ପରିମାଣର ୮୦୮ ଗୁଣ ଥିଲା।
ପୂର୍ବରୁ ୨୦୨୨ ରେ ସୁନ୍ଦର ପିଚାଇଙ୍କ ପ୍ୟାକେଜ୍ ଅନ୍ୟ ଆଲଫାବେଟ୍ କାର୍ଯ୍ୟନିର୍ବାହୀମାନଙ୍କ ଅପେକ୍ଷା ଅଧିକ ଥିଲା। ଗୁଗୁଲର ପୂର୍ବତନ କାର୍ଯ୍ୟନିର୍ବାହୀ ଅଧିକାରୀ ପ୍ରଭାକର ରାଘବନ୍ ଏବଂ ଫିଲିପ୍ ସ୍କିଣ୍ଡଲର୍ ଦୁହେଁ ପ୍ରାୟ ୩୭ ମିଲିୟନ୍ ଡଲାର୍ ନେଇଥିଲେ। ଯେତେବେଳେ କି, ରୁଥ ପୋରାଟଙ୍କର ୨୪.୫ ମିଲିୟନ ଡ଼ଲାର ଥିଲା।
ବର୍ତ୍ତମାନ ସୁନ୍ଦର ପିଚାଇ ତାଙ୍କ ନେତୃତ୍ୱରେ ଗୁଗୁଲକୁ ଆଗେଇ ନେଉଥିବା ବେଳେ ତାଙ୍କ ସାମ୍ନାରେ ଅନେକ ନୂଆ ଚ୍ୟାଲେଞ୍ଜ ଅଛି। ChatGPT ପରି ଆର୍ଟିଫିସିଆଲ ଇଣ୍ଟେଲିଜେନ୍ସ ଗୁଗୁଲର ପ୍ରାଧାନ୍ୟକୁ ଦୁର୍ବଳ କରିଦେଇଛି। ଆର୍ଥକ ମାନ୍ଦାବସ୍ଥା କାରଣରୁ ମଧ୍ୟ କମ୍ପାନୀ ପ୍ରଭାବିତ ହୋଇଛି ଏବଂ ୨୦୨୨ ରେ ଏହାର ଅଂଶଧନ 39% ହ୍ରାସ ପାଇଛି। ଅବଶ୍ୟ, ୨୦୨୩ ରେ ୧୯% ବୃଦ୍ଧି ପାଇଛି।
