ଓଡ଼ିଆରେ ପଢ଼ା ହେବ MBA ପାଠ, ପ୍ରଫେସନାଲ କୋର୍ସ ପାଇଁ ଦୂର ହେବ ପ୍ରତିବନ୍ଧକ

ଭୁବନେଶ୍ୱର: ସମାନତାମୂଳକ ଶିକ୍ଷା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇ ଇନ୍ଦିରା ଗାନ୍ଧୀ ନ୍ୟାସନାଲ ଓପନ ବିଶ୍ୱବିଦ୍ୟାଳୟ (IGNOU) ମଙ୍ଗଳବାର ଓଡ଼ିଆ ମାଧ୍ୟମରେ ମାଷ୍ଟର ଅଫ ବିଜିନେସ ଆଡମିନିଷ୍ଟ୍ରେସନ (MBA) ପ୍ରୋଗ୍ରାମ ଆରମ୍ଭ କରିଛି ଏବଂ ଏହି କୋର୍ସ ପାଇଁ ନୂଆଦିଲ୍ଲୀ କ୍ୟାମ୍ପସରେ ଆଡମିସନ ଖୋଲିଛି।

ଏହି ଉଦ୍ୟମ ସହିତ, IGNOU ମୁକ୍ତ ଏବଂ ଦୂରବର୍ତ୍ତୀ ଶିକ୍ଷା (ODL) ମୋଡ଼ରେ ଓଡ଼ିଆ ଭାଷାରେ ଏକ ପ୍ରଫେସନାଲ MBA ଡିଗ୍ରୀ ପ୍ରଦାନ କରୁଥିବା ପ୍ରଥମ ଜାତୀୟ ବିଶ୍ୱବିଦ୍ୟାଳୟ ହୋଇଛି। ଏହି ପଦକ୍ଷେପ ଉଚ୍ଚ ଶିକ୍ଷାରେ ଭାଷାଗତ ପ୍ରତିବନ୍ଧକକୁ ଦୂର କରି ପ୍ରଫେସନାଲ କୋର୍ସରେ ଅଧିକ ପ୍ରବେଶାଧିକାର ସୁନିଶ୍ଚିତ କରିବାକୁ ଲକ୍ଷ୍ୟ ରଖିଛି।

IGNOU ଉପାଚାର୍ଯ ପ୍ରଫେସର ଉମା କାଞ୍ଜିଲାଲ କହିଛନ୍ତି ଯେ ଓଡ଼ିଆ ମାଧ୍ୟମରେ MBA ପ୍ରୋଗ୍ରାମ ଆରମ୍ଭ ହେବା ଓଡ଼ିଶାର ଛାତ୍ରମାନଙ୍କୁ ସଶକ୍ତ କରିବାରେ ଏକ ମାଇଲଷ୍ଟୋନ। ସେ କହିଛନ୍ତି, “ଏହି ପ୍ରୋଗ୍ରାମକୁ ଓଡ଼ିଆ ଭାଷାରେ ଆରମ୍ଭ କରି ଆମେ ନୂଆ ପିଢ଼ିର ଶିକ୍ଷାର୍ଥୀମାନଙ୍କୁ ଭାଷାଗତ ସୀମା ବିନା ମ୍ୟାନେଜମେଣ୍ଟ ଶିକ୍ଷାରେ ଉତ୍କର୍ଷ ଲାଭ କରିବାକୁ ସକ୍ଷମ କରୁଛୁ।”

ଏହି ଉଦ୍ୟମ ଜାତୀୟ ଶିକ୍ଷା ନୀତି (NEP) 2020 ସହିତ ସମାନ ରହିଛି, ଯାହା ଉଚ୍ଚ ଶିକ୍ଷାରେ ଭାରତୀୟ ଭାଷାଗୁଡ଼ିକୁ ପ୍ରୋତ୍ସାହନ ଦେଇ ସମାନତା ଓ ନ୍ୟାୟକୁ ବୃଦ୍ଧି କରିବାକୁ ଜୋର ଦେଇଛି।

ଏହି ପ୍ରୋଗ୍ରାମ ଅଧୀନରେ, ଛାତ୍ରମାନେ ଓଡ଼ିଆରେ ପାଠ୍ୟସାମଗ୍ରୀ ପାଇବେ, ଓଡ଼ିଆରେ ଏକାଡେମିକ କାଉନସେଲିଂ ସେସନରେ ଭାଗ ନେଇପାରିବେ ଏବଂ ଓଡ଼ିଆରେ ପରୀକ୍ଷା ଲେଖିପାରିବେ।