ତେଜସ୍ୱୀ ଯାଦବଙ୍କ କାରକେଡ୍ ଯାଉଥିବା ବେଳେ ବଡ଼ ଦୁର୍ଘଟଣା: ଜଣେ ମୃତ, ୮ରୁ ଅଧିକ ଆହତ

ନୂଆଦିଲ୍ଲୀ: ଆଗକୁ ଲୋକସଭା ନିର୍ବାଚନ ଆସୁଥିବାରୁ ସେନେଇ ରାଜନେତ÷କ ଦଳମାନେ ପ୍ରସ୍ତୁତିରେ ବ୍ୟସ୍ତ ରହିଛନ୍ତି । ନିର୍ବାଚନ ପୂର୍ବରୁ ବିହାରର ରାଜେଡି ନେତା ତେଜସ୍ୱୀ ଯାଦବ ରାଜ୍ୟରେ ଜନ ବିଶ୍ୱାସ ଯାତ୍ରା ଆରମ୍ଭ କରିଛନ୍ତି । ତେବେ ଜନ ବିଶ୍ୱାସ ଯାତ୍ରା ଅବସରରେ ଗତକାଲି ବିଳମ୍ବିତ ରାତିରେ ତେଜସ୍ୱୀଙ୍କର କାରକେଡର ଏକ ଗାଡ଼ି ଦୁର୍ଘଟଣାଗ୍ରସ୍ତ ହୋଇଥିଲା । ଫଳରେ ଘଟଣାସ୍ଥଳରେ ଡ୍ରାଇଭରଙ୍କର ମୃତ୍ୟୁ ହେବା ସହିତ ୮ରୁ ଅଧିକ ପୋଲିସ କର୍ମୀ ଆହତ ହୋଇଛନ୍ତି ।

ସୂଚନା ମୁତାବକ, ପୂର୍ଣ୍ଣିୟାର ବିଲୌରୀ ପୈନୋରମା ହାଇଟ ନିକଟରେ ଉକ୍ତ ଦୁର୍ଘଟଣା ହୋଇଥିଲା । ଜନ ବିଶ୍ୱାସ ଯାତ୍ରା ସମୟରେ କାରକେଡର ଏକ ଗାଡ଼ି ନିୟନ୍ତ୍ରଣ ହରାଇ ଡିଭାଇଡରକୁ ଧକ୍କା ଦେଇ ଅନ୍ୟ ଏକ ଲେନରେ ଯାଉଥିବା ଏକ କାରକୁ ଧକ୍କା ଦେଇଥିଲା । ଫଳରେ କାରରେ ବସିଥିବା ୩ ଜଣ ଲୋକ ଗମ୍ଭୀର ଭାବେ ଆହତ ହୋଇଥିଲେ । ସମସ୍ତ ଆହତଙ୍କୁ ଚିକିତ୍ସା ନିମନ୍ତେ ଜିଏମସିଏଚରେ ଭର୍ତ୍ତି କରାଯାଥଥିଲା । ଆହତଙ୍କ ମଧ୍ୟରେ କିଛି ଲୋକଙ୍କ ଅବସ୍ଥା ଗମ୍ଭୀର ରହିଥିବା କୁହାଯାଉଛି ।