ରେଳବାଇ ବୋର୍ଡର ବଡ଼ ନିଷ୍ପତ୍ତି, ଦଶମ ପାସ୍ ପ୍ରାର୍ଥୀଙ୍କୁ ମଧ୍ୟ ମିଳିବ ଲେବଲ-୧ ପଦବୀ ପାଇଁ ସୁଯୋଗ

ନୂଆଦିଲ୍ଲୀ: ଭାରତୀୟ ରେଳବାଇ ଲେବଲ-୧ (ପୂର୍ବ ଗ୍ରୁପ୍ ଡି) ପଦବୀ ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା ମାନଦଣ୍ଡକୁ କୋହଳ କରିବାକୁ ନିଷ୍ପତ୍ତି ନେଇଛି ରେଳବାଇ ବୋର୍ଡ।

ଏବେ ଦଶମ ଶ୍ରେଣୀ ପାସ୍ କରିଥିବା ପ୍ରାର୍ଥୀ କିମ୍ବା ଆଇଟିଆଇ ଡିପ୍ଲୋମାଧାରୀ କିମ୍ବା ଜାତୀୟ ଧନ୍ଦାମୂଳକ ପ୍ରଶିକ୍ଷଣ ପରିଷଦ (ଏନସିଭିଟି) ଦ୍ୱାରା ପ୍ରଦାନ କରାଯାଇଥିବା ନ୍ୟାସନାଲ ଆପ୍ରେଣ୍ଟିସିପ୍ ସାର୍ଟିଫିକେଟ୍ (ଏନଏସି) ଧାରଣ କରିଥିବା ପ୍ରାର୍ଥୀ ମାନେ ମଧ୍ୟ ଏହି ପଦବୀ ପାଇଁ ଆବେଦନ କରିପାରିବେ।

ପୂର୍ବରୁ ଏହି ପଦବୀ ପାଇଁ ଆବେଦନ କରିବା ପାଇଁ ପ୍ରାର୍ଥୀଙ୍କୁ ଦଶମ ଶ୍ରେଣୀ ପରୀକ୍ଷା ସହ ଏନସିଏ କିମ୍ବା ଆଇଟିଆଇ ଡିପ୍ଲୋମା ପାସ୍ କରିବାକୁ ପଡୁଥିଲା।

ଜାନୁଆରି ୨ ରେ ସମସ୍ତ ଜୋନକୁ ପଠାଯାଇଥିବା ଏକ ଲିଖିତ ବାର୍ତ୍ତାରେ ରେଳବାଇ ବୋର୍ଡ ଏହି ପରିବର୍ତ୍ତନ ବିଷୟରେ ସୂଚନା ଦେଇଛି। ଏହି ପ୍ରସଙ୍ଗର ସମୀକ୍ଷା କରାଯାଇ ପୂର୍ବ ନିର୍ଦ୍ଦେଶକୁ ଉଲ୍ଲଂଘନ କରି ନୂତନ ନିଷ୍ପତ୍ତି ନିଆଯାଇଛି।

ବୋର୍ଡ ପକ୍ଷରୁ ଜାରି ନିର୍ଦ୍ଦେଶନାମା ଅନୁଯାୟୀ, ଏଣିକି ଏନ୍ ସିଭିଟି ଦ୍ୱାରା ପ୍ରଦାନ କରାଯାଇଥିବା ସମସ୍ତ ସ୍ତର-୧ ପଦବୀ (ଆଗାମୀ ସିଇଏନ୍ କୁ ମିଶାଇ) ରେ ନିଯୁକ୍ତି ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା ଦଶମ ପାସ୍ କିମ୍ବା ଆଇଟିଆଇ ଡିପ୍ଲୋମା ବା ସମକକ୍ଷ କିମ୍ବା ଏନଏସି ହେବ।

ଭାରତୀୟ ରେଳବାଇରେ ଲେଭେଲ-୧ ଅଧୀନରେ ବିଭିନ୍ନ ବିଭାଗରେ ଆସିଷ୍ଟାଣ୍ଟ, ପଏଣ୍ଟମ୍ୟାନ ଓ ଟ୍ରାକ୍ ମେନଟେନର ଭଳି ଗୁରୁତ୍ୱପୂର୍ଣ୍ଣ ପଦବୀ ରହିଛି। ନିକଟରେ ରେଳବାଇ ନିଯୁକ୍ତି ବୋର୍ଡ ଏହି ନିଯୁକ୍ତି ପାଇଁ ବିଜ୍ଞପ୍ତି ଜାରି କରିଛି।

ଯେଉଁଥିରେ ପାଖାପାଖି ୩୨ ହଜାର ପ୍ରାର୍ଥୀଙ୍କୁ ନିଯୁକ୍ତି ଦିଆଯିବ। ଆବେଦନ ପ୍ରକ୍ରିୟା ଜାନୁଆରି ୨୩ରୁ ଫେବ୍ରୁଆରି ୨୨ ପର୍ଯ୍ୟନ୍ତ ଚାଲିବ।