ଜୋତା ଷ୍ଟାଣ୍ଡରେ ଚାବି ରଖି ଯାଇଥିଲେ ମର୍ଣ୍ଣିଂୱାକ୍, ଫେରିଲା ବେଳକୁ ଘରେ କଳାକନା ବୁଲାଇଦେଇଛି ଚୋର
ଭୁବନେଶ୍ବର(ଓଡ଼ିଶା ଭାସ୍କର): ମର୍ଣ୍ଣିଂୱାକ୍ ଯିବା ପାଇଁ ଘରର ମୁଖ୍ୟ କବାଟରେ ତାଲା ପକାଇ । ହେଲେ ଚାବିକୁ ସାଙ୍ଗରେ ନ ନେଇ ଜୋତା ଷ୍ଟାଣ୍ଡରେ ଲୁଚାଇ ରଖିଦେଲେ । କିନ୍ତୁ ଚୋର ଏହା ଉପରେ ନଜର ରଖିଥିବା ସେ ଜାଣିନଥିଲେ । ମର୍ଣ୍ଣିଙ୍ଗ ୱାକ ଯିବାର କିଛି ସମୟ ପରେ ଲୁଚିଥିବା ଚୋର ଜୋତା ଷ୍ଟାଣ୍ଡରୁ ଚାବି ନେଇ ଘରେ କଳାକନା ବୁଲାଇଦେଇଛି । ଚୋରଟି ଘର ଭିତରେ ପଶି ୬୫ ହଜାର ଟଙ୍କା ଧରି ଛୁ’ ମାରିଛି । ଏପରି ଏକ ଘଟଣା ଘଟିଛି ତମାଣ୍ଡୋ ଥାନା କଳିଙ୍ଗବିହାର ଅଞ୍ଚଳରେ । ଘର ଚାବି ସାଙ୍ଗରେ ନ ନେଇ ମର୍ଣ୍ଣିଂୱାକ୍କୁ ଯିବା ଏବେ ସମ୍ପୃକ୍ତ ବ୍ୟକ୍ତିଙ୍କୁ ମହଙ୍ଗା ପଡିଛି । ଏଠାରେ କହିରଖିବାକୁ ଚାହିଁବି ଯେ କେବଳ ଏହି ବ୍ୟକ୍ତି ନୁହନ୍ତି ବରଂ ଅନେକ ଲୋକ ଏପରି କରିଥାନ୍ତି ।
ସୂଚନା ଅନୁସାରେ, କଳିଙ୍ଗବିହାର କେ-୪ ସ୍ଥିତ ୧୦୪୯ନଂ ପ୍ଲଟରେ ରହୁଥିବା ସୌମ୍ୟରଞ୍ଜନ ଜେନା ଶୁକ୍ରବାର ଦିନ ସକାଳୁ ସକାଳୁ ମର୍ଣ୍ଣିଂ ୱାକ୍ରେ ବାହାରିଥିଲେ । କବାଟ ଚାବି ପକାଇ ଘର ଅଗଣାରେ ଥିବା ଜୋତା ଷ୍ଟାଣ୍ଡରେ ଚାବିକୁ ଲୁଚାଇ ଚାଲିଗଲେ। ପ୍ରାୟ ଘଣ୍ଟାଏ ପରେ ସେ ଫେରିବା ବେଳକୁ କବାଟ ଖୋଲା ଥିବା ଦେଖିବାକୁ ପାଇଥିଲେ । ତରବର ହୋଇ ସେ ଜୋତା ଷ୍ଟାଣ୍ଡ ଦରାଣ୍ଡିବା ବେଳକୁ ଚାବି ନଥିଲା । ପରେ ସେ ଜାଣିଲେ ଯେ କେହି ଦୁର୍ବୃତ୍ତ ୬୫ହଜାର ଟଙ୍କା ଲୁଟି ନେଇଛି ।
ଚୋରଟି ଖୁବ ଚାଲାକର ସହିତ ସୌମ୍ୟଙ୍କ ଘରେ ପଶିବା ପୂର୍ବରୁ ପଡ଼ୋଶୀଙ୍କ ଘରର କବାଟକୁ ବାହାର ପଟରୁ ବନ୍ଦ କରିଦେଇଥିଲା । ତେବେ ପଡ଼ୋଶୀ ଜଣକ ଅନ୍ୟ ଜଣକୁ ଡାକି କବାଟ ଖୋଲାଇଥିଲେ। କିନ୍ତୁ କିଏ ଏଭଳି କରିଛି ବୋଲି ସେ ବୁଝିପାରିନଥିଲେ। ଅଭିଯୋଗ ପାଇବା ପରେ ତମାଣ୍ଡୋ ଥାନା ପୁଲିସ ତଦନ୍ତ ଆରମ୍ଭ କରିଛି। ସ୍ଥାନୀୟ ଞ୍ଚଳର ସିସିଟିଭି ଫୁଟେଜ୍ ସଂଗ୍ରହ କରୁଛି।
