ସରକାରୀ ସ୍କୁଲରେ ଚାଲିଲା ଅଶ୍ଳୀଳ ଫିଲ୍ମ, ଭିଡ଼ିଓ ହେଲା ଭାଇରାଲ

ମଧ୍ୟପ୍ରଦେଶ: କ୍ଲାସରୁମରେ ଚାଲିଲା ଅଶ୍ଳୀଳ ଫିଲ୍ମ, ଭାଇରାଲ ହେଲା ଭିଡ଼ିଓ। ମଧ୍ୟପ୍ରଦେଶର ରାଜଗଡ଼ର ସୁଥାଲିଆରେ ଥିବା ପ୍ରଧାନମନ୍ତ୍ରୀ ଶ୍ରୀ ସରକାରୀ ବାଳକ ଉଚ୍ଚ ମାଧ୍ୟମିକ ବିଦ୍ୟାଳୟରୁ ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି।

ଏଠାରେ ଛାତ୍ରମାନେ ସ୍ମାର୍ଟ କ୍ଲାସରେ ଅଶ୍ଳୀଳ ଭିଡିଓ ଦେଖୁଥିବାର ଦେଖିବାକୁ ମିଳିଥିଲା। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଶିକ୍ଷା ବିଭାଗରେ ହଇଚଇ ସୃଷ୍ଟି ହୋଇଥିଲା।

ସ୍କୁଲର ପ୍ରଧାନଶିକ୍ଷକ ଏ ବିଷୟରେ ସ୍ପଷ୍ଟୀକରଣ ଦେଇ କହିଛନ୍ତି ଯେ, ଏହି ଭିଡିଓ ବର୍ତ୍ତମାନର ନୁହେଁ, ଏହା ପ୍ରାୟ 8-10 ମାସ ପୁରୁଣା। ଭିଡିଓ ଭାଇରାଲ ହେବା ପରେ, ଜିଲ୍ଲା ଶିକ୍ଷା ଅଧିକାରୀ ତିନି ଜଣ ପ୍ରଧାନଶିକ୍ଷକଙ୍କ ଏକ ଦଳ ଗଠନ କରି ତଦନ୍ତ ନିର୍ଦ୍ଦେଶ ଦେଇଛନ୍ତି।

ସ୍କୁଲର ପ୍ରଧାନଶିକ୍ଷକ କହିଛନ୍ତି- ଗତକାଲି ଜଣେ ସ୍ଥାନୀୟ ବ୍ୟକ୍ତି ମୋତେ ଏହି ଭିଡିଓ ଦେଖାଉଥିଲେ ଏବଂ ପଚାଶ ହଜାର ଟଙ୍କା ମାଗୁଥିଲେ। ଯେତେବେଳେ ମୁଁ ତାଙ୍କୁ ଟଙ୍କା ଦେଇ ନଥିଲି, ସେ ଏହି ଭିଡିଓ ଭାଇରାଲ କରିଥିଲେ।

ସତ କ’ଣ ତାହା ତଦନ୍ତ ପରେ ହିଁ ଜଣାପଡିବ। କିନ୍ତୁ ଏହା ନିଶ୍ଚିତ ଯେ ଏଠାରେ ଶିକ୍ଷା ବ୍ୟବସ୍ଥା ଖରାପ ଅବସ୍ଥାରେ ଅଛି। ଏହି ଘଟଣାରେ ସ୍ଥାନୀୟ ଲୋକମାନେ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରୁଛନ୍ତି।

ଏହି ଘଟଣା ପରେ, ଏବେ ପ୍ରତ୍ୟେକ ଶ୍ରେଣୀରେ ସିସି କ୍ୟାମେରା ଲଗାଇବା, ସ୍ମାର୍ଟ ସ୍କ୍ରିନ୍ ପାସୱାର୍ଡ ସୁରକ୍ଷିତ ରଖିବା ଏବଂ ୱାଇଫାଇ ବ୍ୟବହାରକୁ କଡ଼ାକଡ଼ି ନିୟନ୍ତ୍ରଣ କରିବା ପାଇଁ ନିର୍ଦ୍ଦେଶ ଦିଆଯାଇଛି।

ଅଭିଭାବକମାନେ କହିଛନ୍ତି ଯେ, ଏପରି ଘଟଣାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ, ଯାହା ଦ୍ୱାରା ଭବିଷ୍ୟତରେ ଏପରି ଘଟଣାର ପୁନରାବୃତ୍ତି ହେବନି।