ଏଣିକି ସରକାରୀ ଡକ୍ୟୁମେଣ୍ଟରେ ମା’ଙ୍କ ନାମ ରହିବା ବାଧ୍ୟତାମୂଳକ :ଏହି ୨ଟି ସ୍ଥାନରେ ନୂଆ ନିୟମ
ମୁମ୍ବାଇ : ପୁରୁଷ ଏବଂ ମହିଳାଙ୍କୁ ସମାନ ସ୍ଥାନ ଏବଂ ସମାନତାକୁ ନେଇ ଅନେକ ପଦକ୍ଷେପ ନିଆଯାଉଛି । ସମସ୍ତଙ୍କ ଜୀବନରେ ଉଭୟ ପିତାମାତାଙ୍କର ବିଶେଷ ଗୁରୁତ୍ୱ ରହିଛି, ଏଭଳି ପରିସ୍ଥିତିରେ ଦିଲ୍ଲୀ ହାଇକୋର୍ଟ ଛାତ୍ରଛାତ୍ରୀଙ୍କ ସମସ୍ତ ଦଲିଲରେ ମା’ଙ୍କ ନାମକୁ ବାଧ୍ୟତାମୂଳକ ଭାବେ ଉଲ୍ଲେଖ କରିବାକୁ ନିଷ୍ପତ୍ତି ନେଇଛନ୍ତି । ଅନ୍ୟପଟେ ମହାରାଷ୍ଟ୍ର ସରକାର ସମସ୍ତ ସରକାରୀ ଦଲିଲରେ ପିତାଙ୍କ ନାମ ସହିତ ମା’ଙ୍କ ନାମକୁ ବାଧ୍ୟତାମୂଳକ କରିଛନ୍ତି ।
ମହାରାଷ୍ଟ୍ର ସରକାର କ୍ୟାବିନେଟ ବୈଠକରେ ଏହି ନିଷ୍ପତ୍ତି ନେଇଛନ୍ତି
ବୁଧବାର କ୍ୟାବିନେଟ ବୈଠକରେ ଏକ ବଡ ନିଷ୍ପତ୍ତି ନେଇ ମହାରାଷ୍ଟ୍ରର ଏକନାଥ ସିନ୍ଦେ ସରକାର ସମସ୍ତ ସରକାରୀ ପ୍ରମାଣପତ୍ରରେ ମାତାର ନାମ ସାମିଲ କରିବା ବାଧ୍ୟତାମୂଳକ କରିଛନ୍ତି । ଜନ୍ମ ପ୍ରମାଣପତ୍ର, ସ୍କୁଲ ମାର୍କସିଟ୍, ପ୍ରମାଣପତ୍ର, ସମ୍ପତ୍ତି ଦଲିଲ, ଆଧାର କାର୍ଡ, ପାନ୍ କାର୍ଡ ଭଳି ସମସ୍ତ ସରକାରୀ ଦଲିଲରେ ବାଧ୍ୟତାମୂଳକ ଭାବେ ମା’ଙ୍କ ନାମ ସାମିଲ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି । ଛାତ୍ରଛାତ୍ରୀମାନେ ଗ୍ରହଣ କରିଥିବା ଡିଗ୍ରୀ ପ୍ରମାଣପତ୍ରରେ ପିତାଙ୍କ ସହିତ ମା’ଙ୍କ ନାମକୁ ମଧ୍ୟ ଦିଲ୍ଲୀ ହାଇକୋର୍ଟ ବାଧ୍ୟତାମୂଳକ କରିଛନ୍ତି ।
ସିଏମ୍ ସିନ୍ଦେ ସୂଚନା ଦେଇଛନ୍ତି :-
ସିଏମ୍ ଏକନାଥ ସିନ୍ଦେ ଟ୍ୱିଟ୍ ମାଧ୍ୟମରେ ଏହି ସୂଚନା ସେୟାର କରିଛନ୍ତି । ସରକାର ଶିଶୁକୁ ତାଙ୍କର ପ୍ରଥମ ନାମ, ତା’ପରେ ମା’ର ନାମ, ତା’ପରେ ପିତାଙ୍କ ପ୍ରଥମ ନାମ ଏବଂ ତା’ପରେ ସରକାରୀ ଦଲିଲରେ ତାଙ୍କ ସରନେମ୍ ଉଲ୍ଲେଖ କରିବାକୁ କହିଛନ୍ତି । ବିବାହିତା ମହିଳାଙ୍କ ନାମ ପରେ ସ୍ୱାମୀଙ୍କ ନାମ ଏବଂ ତା’ପରେ ସରନେମ୍ ଲେଖାଯିବ ।
ଏହି ନିୟମ ୧ ମେ ୨୦୨୪ ରୁ ଲାଗୁ ହେବ :-
ମହାରାଷ୍ଟ୍ରର ଏକନାଥ ସିନ୍ଦେ ସରକାର ଏହି ନଆ ନିୟମକୁ ୨୦ ମେ ୨୦୨୪ ରୁ କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛନ୍ତି । ୧ ମେ ୨୦୨୪ ପରେ ଜନ୍ମ ହୋଇଥିବା ପିଲାମାନଙ୍କର ବିଦ୍ୟାଳୟ, ପରୀକ୍ଷା ପ୍ରମାଣପତ୍ର, ପେ ସ୍ଲିପ୍ସ, ରେଭେନ୍ୟୁ ଡକ୍ୟୁମେଣ୍ଟ ଏହି ଫର୍ମାଟରେ ପ୍ରସ୍ତୁତ ହେବ । ଏହାର ଅର୍ଥ ହେଉଛି, ମେ ୨୦୨୪ ରୁ ସମସ୍ତ ନୂଆ ସରକାରୀ ଦଲିଲ, ପ୍ରମାଣପତ୍ର, ଆଧାର, ପାନ୍ କାର୍ଡ ଇତ୍ୟାଦିରେ ମା’ଙ୍କ ନାମ ମଧ୍ୟ ସାମିଲ ରହିବ ।
