ବିଜେପିର ବହୁ ସାଂସଦ ମାନେ ମୋତେ ଲୁଚି ଲୁଚି ଭେଟିଛନ୍ତି, ପ୍ରତିଷ୍ଠା ଦିବସରେ ରାହୁଲଙ୍କ ବୟାନ

ନୂଆଦିଲ୍ଲୀ: କଂଗ୍ରେସର ୧୩୯ତମ ପ୍ରତିଷ୍ଠା ଦିବସରେ ମହାରାଷ୍ଟ୍ରର ନାଗପୁରରେ ପ୍ରସ୍ତୁତ ହମ ରାଲିରେ ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଯୋଗ ଦେଇଛନ୍ତି। ଏହି ସମୟରେ ରାହୁଲ ବିଜେପିକୁ ଟାର୍ଗେଟ କରିବା ସହ ଏକ ବଡ ବୟାନ ରଖିଛନ୍ତି। ରାହୁଲ କହିଛନ୍ତି ଯେ, ବିଜେପିର ବହୁ ସାଂସଦ ମାନେ ମୋତେ ଭେଟିଛନ୍ତି। ଜଣେ ବିଜେପି ସାଂସଦ ଗୁପ୍ତରେ ମୋତେ ଲୋକ ସଭାରେ ଭେଟି କହିଥିଲେ ଯେ ସେ ବିଜେପିରେ ରହିବାକୁ ସହ୍ୟ କରିପାରିବେ ନାହିଁ। କାରଣ ଉପରରୁ ଆଦେଶ ଆସେ, ଆମକୁ ତାହା ଅନୁସରଣ କରିବାକୁ ପଡିବ। ଆପଣ ଏହାକୁ ପସନ୍ଦ କରନ୍ତୁ କିମ୍ବା ନ କରନ୍ତୁ, ହେଲେ ବିଜେପିରେ ଦାସତ୍ୱ ଜାରି ରହିଛି। ଉପରୁ ଯାହା କୁହାଯାଏ, ତାହା ଚିନ୍ତା ନକରି ଆପଣଙ୍କୁ କରିବାକୁ ହେବ।

ଅନ୍ୟପଟେ ସେ ବିଜେପିକୁ ଟାର୍ଗେଟ କରି କହିଛନ୍ତି ଯେ, ଆମକୁ ପଚରାଯାଉଛି କଂଗ୍ରେସ ତା’ର ଶାସନ କାଳ ମଧ୍ୟରେ କ’ଣ କରିଛି। ଯଦି ସେ(ବିଜେପି) ସ୍ୱାଧୀନତା ପୂର୍ବରୁ ଦେଶକୁ ଆସିଥାନ୍ତେ, ତେବେ ସେ ୫୦୦ରୁ ୬୦୦ରାଜା ଏବଂ ବ୍ରିଟିଶଙ୍କୁ ଭେଟିଥାନ୍ତେ। ଏହି ଦେଶରେ ଭାରତର ଲୋକଙ୍କର କୌଣସି ଅଧିକାର ନଥିଲା। ଯଦି ରାଜା ଜଣେ ଗରିବ ଲୋକର ଜମି ପସନ୍ଦ କରନ୍ତି, ତେବେ ସେ ଏହାକୁ ଏକ ସେକେଣ୍ଡରେ ନେଇଯିବେ। ହେଲେ ଆଜି ସମ୍ବିଧାନ ସମସ୍ତଙ୍କର ଅଧିକାରକୁ ସୁରକ୍ଷା ଦେଇଛି। ଏହାକୁ ବାବାସାହେବ ଆମ୍ବେଦକର, ମହାତ୍ମା ଗାନ୍ଧୀ ଏବଂ ଜବାହରଲାଲ ନେହେରୁ ସୃଷ୍ଟି କରିଥିଲେ। ଆରଏସଏସ ଏବଂ ଭାଜପାର ଲୋକମାନେ ସମ୍ବିଧାନର ବିରୋଧୀ ଥିଲେ, ଆଜି ସେମାନେ ପତାକା ଉତ୍ତୋଳନ କରିଛନ୍ତି କିନ୍ତୁ ବହୁ ବର୍ଷ ଧରି ତ୍ରିରଙ୍ଗାକୁ ଅଭିବାଦନ ଜଣାଇ ନାହାଁନ୍ତି।

ଏହା ସହ ରାହୁଲ କହିଛନ୍ତି, ଏବେ ବିଚାରଧାରାର ଲଢେଇ ଚାଲିଛି। ଏହି ସଂଗ୍ରାମର ମୂଳଦୁଆ ହେଉଛି ଆଦର୍ଶ । ଦେଶରେ ଦୁଇଟି ଚିନ୍ତାଧାରା ମଧ୍ୟରେ ଝଗଡା ହେଉଛି। ଆମର ବିଚାରଧାରା କହୁଛି ଯେ ଦେଶର ଲଗାମ ଭାରତର ଲୋକଙ୍କ ସହ ରହିବା ଉଚିତ। ଏହା ପୂର୍ବରୁ ରାଜାମାନେ ଯେପରି ଚଳାଉଥିଲେ ସେହିଭଳି ଦେଶ ଚଳାଇବା ଉଚିତ ନୁହେଁ।