ମାତୃ ଗର୍ଭରେ ହେଲା ଶିଶୁର ହାର୍ଟ ଅପରେସନ୍ , ୯୦ ସେକେଣ୍ଡରେ ସରିଲା ଏହି ଅପରେସନ୍
ନୂଆଦିଲ୍ଲୀ : ଡାକ୍ତରଙ୍କୁ ଦ୍ୱିତୀୟ ଭଗବାନ ବୋଲି କୁହାଯାଏ । ବେଳେବେଳେ, ଏହି ଉକ୍ତିର ସତ୍ୟତା ପରିପ୍ରକାଶ ହୋଇଥାଏ ତ ଅନ୍ୟ କେତେବେଳେ ଏହା ଅର୍ଥହୀନ ହୋଇଯାଏ । ଦିଲ୍ଲୀ ଏମ୍ସରେ ଏଭଳି ଏକ ଅସ୍ତ୍ରୋପଚାର ହୋଇଛି ଯାହା ଡାକ୍ତରଙ୍କୁ ପୁଣି ଥରେ ଭଗବାନଙ୍କ ରୂପ ଦେଇଛି । ମାତୃଗର୍ଭରେ ଜଣେ ଶିଶୁର ହାର୍ଟ ଅପରେସନ୍ ହୋଇଛି ଏବଂ ଏହି ଅପରେସନ୍ ପରେ ଉଭୟ ମା’ ଓ ଶିଶୁ ସୁସ୍ଥ ଥିବା ଜଣାପଡିଛି ।
ଜଣେ ୨୮ ବର୍ଷ ବୟସ୍କା ଗର୍ଭବତୀ ଏମ୍ସ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତାଙ୍କର ପୂର୍ବରୁ ୩ ଥର ଗର୍ଭ ନଷ୍ଟ ହୋଇସାରିଥିଲା । ଏବଂ ଏହି ଗର୍ଭସ୍ଥ ଶିଶୁର ହାର୍ଟ ସ୍ଥିତି ଭଲ ନଥିଲା । ତେଣୁ ଏନେଇ ଡାକ୍ତରମାନେ ପିତାମାତାଙ୍କୁ ଜଣାଇବା ପରେ ଗର୍ଭସ୍ଥ ଶିଶୁର ଅପରେସନ୍ ପାଇଁ ପ୍ରସ୍ତାବ ଦେଇଥିଲେ । ସେମାନେ ଏହି ପ୍ରସ୍ତାବରେ ରାଜି ହେବା ପରେ ଏହି ଅପରେସନ୍ ହୋଇଥିଲା । ଏହି ପଦ୍ଧତିକୁ ଶିଶୁର ହୃଦୟରେ ଏକ ଅବରୋଧିତ ଭଲଭ୍ର ବେଲୁନ୍ ଡିଲେସନ୍ କୁହାଯାଏ। ଏହି ପ୍ରକ୍ରିୟା ଅଲଟ୍ରାସାଉଣ୍ଡ ନିର୍ଦ୍ଦେଶନାମା ଅନୁଯାୟୀ କରାଯାଇଥାଏ।
ଡାକ୍ତର କହିଛନ୍ତି ଯେ ଏହି ଅସ୍ତ୍ରୋପଚାର ୯୦ ସେକେଣ୍ଡର ଥିଲା । ଏହି ପ୍ରକ୍ରିୟା ଗର୍ଭସ୍ଥ ଶିଶୁର ଜୀବନକୁ ବିପଦରେ ପକାଇପାରେ ଏବଂ ଅତି ଯତ୍ନରେ କରାଯିବା ଉଚିତ ।
ହୃଦ୍ରୋଗ ଆନାସ୍ଥେସିଆ ବିଭାଗର ଡାକ୍ତରଙ୍କ ଅନୁଯାୟୀ, ପ୍ରସୂତି ଓ ଗର୍ଭସ୍ଥ ଶିଶୁ ଉଭୟ ସୁସ୍ଥ ଅଛନ୍ତି । ଡାକ୍ତରଙ୍କ ଦଳ ସେମାନଙ୍କ ଉପରେ ନଜର ରଖିଛନ୍ତି। ଶିଶୁଟି ମାତୃ ଗର୍ଭରେ ଥିବାବେଳେ କେତେକ ପ୍ରକାରର ଗମ୍ଭୀର ରୋଗ ନିର୍ଣ୍ଣୟ କରାଯାଇପାରେ ଏବଂ ତାହାର ଚିକିତ୍ସା ମଧ୍ୟ କରାଯାଇପାରେ ।
