ପୁରୀ ନାବାଳିକା ଦୁଷ୍କର୍ମ ମାମଲା: ମୁଖ୍ୟ ଅଭିଯୁକ୍ତକୁ ଗିରଫ କଲା ପୋଲିସ
ଭୁବନେଶ୍ୱର(ଓଡ଼ିଶା ଭାସ୍କର): ୫ ବର୍ଷର ନାବାଳିକାକୁ ଦୁଷ୍କର୍ମ କରିଥିବା ଅପରାଧୀକୁ ଗିରଫ କରିଛି ପୋଲିସ । ନିଶାସକ୍ତ ଅବସ୍ଥାରେ ମହେଶ ମହାନ୍ତି ନାମକ ଅଭିଯୁକ୍ତ ଏପରି କାଣ୍ଡ ଭିଆଇଥିଲା । ଟାଉନ ଥାନା ଅଞ୍ଚଳରେ ରବିବାର ଦୁଷ୍କର୍ମ ଘଟିଥିବା ବେଳେ ପୋଲିସ ଅଭିଯୁକ୍ତକୁ ଗିରଫ କରିବାରେ ସକ୍ଷମ ହୋଇଛି । ଅଭିଯୁକ୍ତ ମହେଶ ମହାନ୍ତି ଗିରଫ ହୋଇଥିବା ନେଇ ପୁରୀ ଏସପି ସୂଚନା ଦେଇଛନ୍ତି । ପୁରୀ-ଭୁବନେଶ୍ୱର ସୀମାରେ ମହେଶକୁ ଗିରଫ କରାଯାଇଥିବା ଜଣାପଡିଛି ।
୫ ବର୍ଷର କୁନିଝିଅ ଦୁଷ୍କର୍ମର ଶିକାର ହୋଇଥିବା ଘଟଣା ସାମ୍ନାକୁ ଆସିଥିଲା । ଅଭିଯୁକ୍ତ ମହେଶ ମହାନ୍ତି ନିଶାସକ୍ତ ଅବସ୍ଥାରେ ଭୁଲିଥିଲା ହିତାହିତ ଜ୍ଞାନ । ଜଣେ ୫ ବର୍ଷୀୟା ନାବାଳିକାକୁ କରିଥିଲା ଦୁଷ୍କର୍ମ । ପୀଡ଼ିତା ନାବାଳିକାର ବାପା ଜଣେ ରାଜମିସ୍ତ୍ରୀ । ଯେଉଁ ଅଞ୍ଚଳରେ ନାବାଳିକାର ପରିବାର ଘର ଭଡ଼ା ନେଇ ରହୁଛନ୍ତି, ସେହି ଅଞ୍ଚଳରେ ପୂର୍ବରୁ ରହୁଥିଲା ଅଭିଯୁକ୍ତ । ଦୁଷ୍କର୍ମର ଶିକାର ହେବା ପରେ ଗୁରୁତର ହୋଇପଡ଼ିଥିଲା ନାବାଳିକା । ପ୍ରଥମେ ପୁରୀ ହସ୍ପିଟାଲ ଏବଂ ପରେ ଅବସ୍ଥା ସଂକଟାପନ୍ନ ହେବାରୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର ହୋଇଥିଲା ପୀଡ଼ିତା ।
