ମୋଷ୍ଟ ୱାଣ୍ଟେଡ୍ ମାଓବାଦୀ ଭାସ୍କର ମୃତ, ମୁଣ୍ଡ ଉପରେ ଥିଲା 25 ଲକ୍ଷର ପୁରସ୍କାର ରାଶି

ରାୟପୁର: ମୋଷ୍ଟ ୱାଣ୍ଟୋଡ୍ ହାର୍ଡକୋର ମାଓବାଦୀ ନିହତ । ସୁରକ୍ଷାକର୍ମୀଙ୍କ ଗୁଳିରେ ଟଳିଲା ମାଓନେତା ଭାସ୍କର । ଛତିଶଗଡ଼ ବିଜାପୁର ଜିଲ୍ଲାରେ ମାଓ ଏନକାଉଣ୍ଟର୍ ଚାଲିଥିବା ବେଳେ ସୁରକ୍ଷା କର୍ମୀଙ୍କ ଗୁଳିରେ ମାଓନେତା ଭାସ୍କରର ମୃତ୍ୟୁ ହୋଇଥିବା ସୂଚନା ମିଳିଛି । ଘଟଣା ସ୍ଥଳରୁ ଗୋଟିଏ ବନ୍ଧୁକ ସହ ବିପୁଳ ପରିମାଣର ମାଓ ସାମଗ୍ରୀ ଜବତ ହୋଇଛି । ତେବେ ଭାସ୍କର ନାଁରେ ଥିଲା 25 ଲକ୍ଷର ପୁରସ୍କାର ରାଶି ।

ବିଜାପୁରର ଜାତୀୟ ଉଦ୍ୟାନ ଅଞ୍ଚଳରେ ଲଗାତାର ଦୁଇ ଦିନ ଧରି ସୁରକ୍ଷାକର୍ମୀଙ୍କ ଅପରେସନ ଜାରି ରହିଥିବା ବେଳେ ଶୁକ୍ରବାର ଅପରାହ୍ନରେ ମାଓନେତା ଭାସ୍କରଙ୍କୁ ହତ୍ୟା କରାଯାଇଥିବା ଖବର ଆସିଥିଲା । ତେଲେଙ୍ଗାନାର ମୋଷ୍ଟ ୱାଣ୍ଟେଡ୍ ତାଲିକାରେ ଭାସ୍କରଙ୍କୁ ସାମିଲ କରାଯାଇଥିଲା। ସେ ଅନେକ ବଡ଼ ଆକ୍ରମଣର ମାଷ୍ଟରମାଇଣ୍ଡ ମଧ୍ୟ ଥିଲା। ଲଗାତାର ଦ୍ୱିତୀୟ ଦିନ ଗୋଟିଏ ପରେ ଗୋଟିଏ ବଡ଼ ନକ୍ସଲଙ୍କୁ ହତ୍ୟା କରିବା ନକ୍ସଲ ସଂଗଠନରେ ଏକ ବଡ଼ ହଇଚଇ ସୃଷ୍ଟି କରିଦେଇଛି ।

କୁହାଯାଉଛି ଯେ ଏହି ଅଞ୍ଚଳରେ ସୁରକ୍ଷା ବାହିନୀ ଓ ନକ୍ସଲବାଦୀଙ୍କ ମଧ୍ୟରେ ଏବେ ବି ଏନକାଉଣ୍ଟର ଜାରି ରହିଛି ଏବଂ ସର୍ଚ୍ଚ ଅପରେସନ୍ ମଧ୍ୟ ଦ୍ରୁତ ଗତିରେ ଚାଲିଛି। ଗୁରୁବାର ଯେଉଁ ଅଞ୍ଚଳରେ କେନ୍ଦ୍ରୀୟ କମିଟି ସଦସ୍ୟ ସୁଧାକରଙ୍କୁ ହତ୍ୟା କରାଯାଇଥିଲା ସେହି ଅଞ୍ଚଳରେ ଭାସ୍କରଙ୍କୁ ମଧ୍ୟ ହତ୍ୟା କରାଯାଇଛି। ଏହା ସହ ଭାସ୍କରଙ୍କଠାରୁ AK 47 ମଧ୍ୟ ଜବତ କରାଯାଇଛି।

ଏନକାଉଣ୍ଟର ସମୟରେ ଭାସ୍କରଙ୍କ ପତ୍ନୀ ଏବଂ ନକ୍ସଲବାଦୀ କମାଣ୍ଡର ଅନିତା ମଧ୍ୟ ତାଙ୍କ ସହିତ ଥିଲେ, କିନ୍ତୁ ଏପର୍ଯ୍ୟନ୍ତ ତାଙ୍କର କୌଣସି ସନ୍ଧାନ ମିଳିନାହିଁ। 2799.03 ବର୍ଗ କିଲୋମିଟର ବିସ୍ତାରିତ ଇନ୍ଦ୍ରାବତୀ ଜାତୀୟ ଉଦ୍ୟାନ ଏବେ ସୁରକ୍ଷା ବାହିନୀର ନିୟନ୍ତ୍ରଣରେ ଅଛି ବୋଲି ଜଣାପଡ଼ିଛି ।